【獨媒報導】大埔宏福苑宏建閣、宏昌閣居民今日第二輪回家收拾，居住宏昌閣低層的陳氏姐妹與親屬一同穿上印有「原址重建」、「I❤️WFC」、「回家」、「宏福苑」字眼和「毛毛蟲攀爬架」圖案的白色上衣上樓。姐姐陳小姐強調不會出售業權，多次指希望原址重建，她相信比起四處張羅十個屋苑供災民「樓換樓」，原址重建的方案更能解決災民的安置問題：「其實你都要解決㗎啦，好過你周圍搵啲地方俾我哋左揀右揀，唔係我哋想要嘅樓囉，喺俾我哋嗰啲選擇嗰10個屋苑，我只可以咁答你哋，所以我要原址囉，我哋要原址！」
不滿無原址重建選項
陳小姐怒斥，雖然政府在第一份安置意向的問卷中有提到原址重建，但其後則刪除了此選項，「佢根本就冇呢個方案俾我哋揀！佢 day one嗰份問卷就係有嘅，咁但係我哋至今都係剔咗唔會選擇（出售業權）嘅。」她強調不會出售業權，又相信不少居民亦堅持希望原址重建：「我哋都企硬！有一班街坊其實係企硬㗎！」她質疑政府並沒有公布驗樓報告，無從考究政府說辭是否屬實：「呢個好唔 make sense真係，你有乜理由所有報告唔會俾我哋睇到？係咪先，得你哋講嘅冇我哋講嘅，仲要打散晒我哋居民，等我哋又冇得開業主大會啦乜嘢都冇！」
她又質疑，政府把民間捐予災民的善款當作公帑使用，作為「樓換樓」補償或收購業權金額的做法是否適當，「之前嗰啲善款啊全部去晒公帑嗰度，咁然後就話撥嚟俾我哋做樓換樓，或者可以攞錢走嗰啲方案啦，咁其實公帑人哋捐出嚟俾我哋，咁點解會攞嚟咁樣做呢 ？」
稱政府曾數年內起好公屋
陳小姐提到，政府幾年前在鑽石山港鐵站上蓋興建公屋，從2021年開始興建、至2024年公開抽樓，到2025年正式入伙，只花費不足5年的時間，「2021年嘅九月份就係吉嘅，咁但係佢到 2024年已經可以俾人抽公屋，2025年已經起好晒入咗伙啦 ，十幢八幢喺鑽石山地鐵站上面，嗰個公屋已經係起好晒。」她批評，政府在最後一次上樓前已把公園的設施拆遷，但宏福苑的地基仍然保留，她不相信政府無法於幾年內在原址重建宏福苑，「所有嘢都拆晒 ，但係個地基仲喺度㗎嘛，啲樓都仲喺度嘛，咁你而家之後要鏟晒我哋啲嘢，再叫我哋 last一次（上樓），之後拆晒我哋啲樓，之後咁你係咪可以用個地基去起返，幾年內起返俾我哋呢 ？」
陳小姐多次強調希望原址重建，她相信比起四處張羅十個屋苑供災民「樓換樓」，原址重建的方案更能解決災民的安置問題，「其實你都要解決㗎啦，好過你周圍搵啲地方俾我哋左揀右揀，唔係我哋想要嘅樓囉，喺俾我哋嗰啲選擇嗰10個屋苑，我只可以咁答你哋，所以我要原址囉，我哋要原址！」
批政府咄咄逼人 要求問責
陳小姐的單位由父母第一代購入，一場大火致祖屋化為烏有，父母亦葬身火海。她對由聽證會至今仍未有人被問責和追究感憤怒，又批評政府官員咄咄逼人，「咁我都想問下啲官員啦，各大高官啦，嗰幾位咁嘅局長啦，即係唔好咄咄逼人囉，好老實講句，他朝君體也相同！」她亦激動地反問特首所謂的公平公正公義為何：「佢所講嘅公平公正公義到而家，聽證會到而家問責咗咁多地方咁多部門，都冇人認罪嘅，亦都搵唔到邊個去認罪！」
懷疑金器被盜
陳小姐表示，第一次上樓時發現遺失大量金器，價值達六位數字，今日再次上樓希望能夠尋回，指金器是父母的遺物，當中包括父母留給妹妹的嫁妝、龍鳳鈪，意義重大。她指上次上樓能夠取回部分白銀，而黃金的熔點更高，不相信金器會被高溫燒熔，懷疑藏於盒中的珠寶和金器被盜竊，「有乜理由嗰個餡唔見咗？」、「我深信佢哋話俾水沖走、俾火燒毁，係冇可能囉！」她於上次上樓時已向警察報案跟進，不過沒有回音。她說，雖然警察已協助四十多戶居民尋回失物，但卻仍有「百幾二百戶」仍未能找回。
質疑政府強迫居民賣樓
居住在宏泰閣3樓的莫女士同表明不想賣樓，又指政府表示若不接受收購，之後不排除會用立法方式處理的說法，是「嚇居民」，「幾多街坊係好唔想賣，唔想走，有啲係被逼，好無奈政府壓到埋嚟，咁大嚿石頭壓落星斗市民」。
她批評，政府現時的收購方案是強迫居民賣樓，形容如同「強姦」。她不解為何宏福苑大多座樓未有嚴重燒毀，政府卻沒有場供原址重建方案，「講得難聽啲，係好有懷疑，究竟場火係真係意外定有心人為？如果唔係縱火，點會謀住笪地，堅持唔重建呢？」莫女士認為重建會比收購便宜，亦不會額外佔用社會資源，「唔會同人爭居屋」。
莫女士指，她的單位本身未補地價，若接受政府收購將得到300多萬，「唔需要落區，上網篤吓，攞依舊錢出去買到邊間屋？喺大埔區我唔係冇搵過，得一間，我起碼要再俾50至80萬重新裝修間屋。我邊有咁多錢？」
莫女士今日是再度上樓，單位在大火中被燒毀。她說，上次上樓是緊張，今次上樓是憤怒，因為她想回家，而不再是要先登記、再繞大圈才能進入宏福苑；家中被外人進入搜掠過；又指如果不是大火，本月屋苑應該正拆棚。