【獨媒報導】只有部分高層或個別號數單位損毀嚴重的宏福苑宏道閣，今日（26日）首日開放居民上樓，由於不少單位結構完好，沒有受火災波及，不少居民都準備好搬屋工具上樓執拾。相對而言，魏先生一家就沒那麼幸運，正好是損毀嚴重的2、3號單位。他指據「一戶一社工」提供的相片，可見「燒到全部地下都係垃圾」。不過魏先生卻顯得豁達樂觀：「我樂天派！我乜事都冇⋯⋯唔燒都燒咗囉。」
上樓盼取回金飾紀念品
今日上樓，除了手套、環保袋等物資外，魏先生亦特別準備了燒烤網，鏟灰時作筲箕用，他即席示範，指如國外淘金者一樣，「手錶、戒指一剷就執到」。此外，亦希望能拾回重要的紀念物品，其兒子表示：「因為始終由細喺度住到大，四十幾年啦，可能我哋細個嘅相啊、爹哋媽咪後生嘅相啊、或者一啲可能去旅行嘅相啊。」不過他亦希望不大 ，「因為都真係見到都燒得七七八八㗎喇」。
憶起火災當日，魏先生指「我哋唔係逃生，唔使走難㗎初時，點知落到嚟變咗走難之嘛」，他與太太二人慢慢走下樓，連身份證也沒有拿：「冇拎嘢⋯⋯有呀，拎左個人囉！真係拎左佢（魏太）出嚟㗎。」
入住初期曾見證警察防暴隊排練
他是宏福苑第一批入住的居民之一，「第二批未入住時，睇到警察防暴隊喺度練習，好多人未見過。」街坊多年關係「梗係好啦，識左幾廿年呀，啲仔細細個喺到玩、讀幼稚園、讀到大、讀到結婚㖭。」
十年原址重置 「等唔到咪到我仔等」
魏先生重申對宏福苑「鍾情」，就如「鍾情我老婆一樣」。因此對於安置方案，魏先生表示最希望能「原址重建」，「但政府方案話咗唔俾啊嘛，想冇用㗎！我夠想發達啦！」他又表示只要「佢肯起我要呀，但佢唔肯起」，就算重建需時十年也要等：「我等！等唔到咪到我仔等。」又笑稱「不過十年你睇我咁後生實等到啦！」
晚上七時，警察及工作人員都相繼離去，魏先生的兒子才緩緩離開，滿頭大汗、笑容滿臉的跟記者打招呼，高興的表示「好多嘢執」，又指父母最想拾回的首飾、金器等都找到了，惟相簿因為潮濕而部分內頁黏在一起。