【獨媒報導】宏福苑居民今日繼續上樓執拾，有居民不滿政務司副司長卓永興早前「斷捨離」的言論，居住在宏仁閣12樓的謝先生表示，上樓後「有嘢都要攞㗎啦」：「唔通真係好似卓永興講，可以斷捨離呀？」他指假若卓永興的屋企受災，是否同樣可以做到斷捨離：「如果佢間屋燒咗，佢係咪可以咁決絕，可以斷捨離同埋道別？」
謝先生已居住在該單位8年，他今早攜帶了板車、保鮮紙及孭帶，「好似人哋搬屋咁落嚟」。他稱沒有收到「一戶一社工」的相片，但看過當局的報告稱單位沒有受災。謝先生表示「好多嘢都想帶走」，希望取回證件、文化及具紀念價值的物品。
不滿當局未有修復升降機
對於或未能取走較大的物品，謝先生不滿當局未有修復升降機，「正常人都應該整部𨋢」：「擔心都無辦法㗎，有得揀咩？你只能夠喺佢個選擇入面作選擇。」
記者追問對斷捨離的看法，謝先生就顯得有怒火：「咁你要問返講斷捨離，同埋道別嗰個人。如果佢間屋燒咗，佢係咪可以咁決絕，可以斷捨離同埋道別？」被問到3小時的執拾時間是否足夠，謝先生再次反問：「成屋都係嘢、又無燒過，你覺得夠唔夠呀？」
災後居住在共享空間 被迫與家人分開住
對於政府提出的居住安排方案，謝先生則稱「唔知點答你」。他現時居住在大埔區內的共享空間，更被迫與家人「分開住」，太太與兒子居住在位於廣福邨的外母家中，兒子亦在區內上學，相信較難搬到大埔區以外的住所。
不少連日上樓執拾的宏福苑居民，均表示會用自己的方式向單位道別。謝先生稱「我企喺度都可以道別」：「我唔洗望住佢都可以告別嘅，今日最重要任務都係執嘢。」