【獨媒報導】「你住嗰度都唔夠擺。唔要，我全部唔要，唔夠位擺，太細喇我哋嗰度。你咁多嘢擺唔到落啟德。」收拾過程中，這番說話孫仔Dorz說了幾次，87歲的嫲嫲周喜珠依然埋頭，執意將20多年來存放在家中的物品，通通放進紅白藍袋內。
嫲孫二人住在宏新閣1404號單位20多年，上月嫲嫲因為肺炎初癒，錯過了首次上樓，上週是她首次和孫仔回家。
訪問上樓居民時，記者常常會問對方想帶走什麼物品。在嫲嫲眼中，所有仍能使用的，紙巾、牙膏、圓凳等等，她都想帶走，收拾時會嚷著：「要㗎要㗎！唔使買呀，買一個都幾多錢。」
Dorz明白割捨之難：「斷捨離對一個老人家嚟講，係一個好難嘅課題」。他看著嫲嫲不忍地說「佢有啲嘢用到最後一刻唔爛，佢都唔會掉。見到佢咁樣好激心，但係又有啲痛心，唔捨得呀嘛，唉。」
就算收拾時表現較撇脫，要離開心愛的家，34歲的Dorz同樣做不到：「我冇諗過自己上樓後，我係好想原址重建，因為我真係發現，好掛住呢個地方」。
一口氣登14樓 全場鼓掌
第一次上樓時，嫲嫲大病初癒剛出院，只能與家人視訊了解家中情況，上週五（22日）是嫲嫲第一次回家，她牽著孫仔的手來到宏福苑。嫲嫲說前一晚睡不著，有些緊張，但可以回家覺得非常開心，又指現在住在過渡屋，和孫仔分住不同樓層，已習慣行樓梯。
上樓前，社工和心理學家為嫲嫲準備了手提折凳，讓她可以在梯間休息。不過嫲嫲踏上第一級樓梯開始就沒有停下，身邊人問她需否休息，她都沒有回應，緩慢但穩步拾級而上。最後一口氣回到14樓的家，大家都忍不住為她鼓掌，Dorz更高呼：「你好黐線呀，冇停過，好叻呀！」Dorz說嫲嫲體力比想象中好，「超乎我幻想，究竟執念有幾咁強，先做到呢件事？」
悶熱房間收拾不停歇
闊別半年，回到變樣的家，嫲嫲第一個反應是家裡「黑鼆鼆」，但她無暇細察，一個箭步走到自己房間，屋內窗戶雖大多爆破，唯獨嫲嫲房間完好，房內物品因此沒怎麼受波及，卻因此猶如密室——嫲嫲不出數分鐘已滿臉汗水，拿下口罩唞氣，她直呼「哇出晒汗，很熱很熱很熱」。
Dorz上次上樓，已將嫲嫲的物品放在床上，讓她今次分揀。嫲嫲檢視房中的物品，說了很多次「我呢個都未燒」。有些物件她拿在手上，會問自己「呢個有冇用？」例如年輕時從醫的她拿起針灸包，說「以前同人針灸，而家都唔用囉」，就隨手放下。
此時Dorz走進來，問是否要帶走生前任中醫的爺爺留下的牌匾，嫲嫲就說上次上樓已帶走一個，「唔要喇，有一個都足夠喇」。
但放得下的，只是少數，只要物品還能使用，嫲嫲就不捨得丟棄，她拿起維他命D等藥瓶想帶走，大家擔心已受熱變質，勸阻嫲嫲。她又不捨地擦拭一罐奶粉，說「都未開，未開。」
嫲嫲逐一打開床上的隨身袋檢查，在孭袋內取走平常使用的雨傘、消毒酒精和原子筆。她又拾回家中很多未用過的毛巾，說要帶走抹地；多袋包裝紙巾，她都用毛巾小心包起。
Dorz多次著嫲嫲離開悶侷房間唞氣，嫲嫲有時會說好，然後繼續執拾，有時甚至沒有回應。Dorz揶揄她「聽唔到喇，唔聽人講喇」，嫲嫲嘴裡說著「聽到聽到」，但隨即爬上上格床，吩咐孫仔「幫我照吓上面」。
看見嫲嫲收拾大量家當，Dorz苦勸她要取捨，「你住嗰度都唔夠擺。唔要，我全部唔要，唔夠位擺，太細喇我哋嗰度。你咁多嘢擺唔到落啟德（過渡屋）。」但Dorz也明白，「斷捨離對一個老人家嚟講，係一個好難嘅課題」。
廚房尋壓力煲、瓜刨
過了一段時間，嫲嫲終於願意步出家門停歇，但在走廊坐下不到1分鐘，就逕自走入廚房。廚房損毀嚴重，頭頂有鐵條搖搖欲墜，令Dorz大為緊張，隨即呼叫危險勸阻，嫲嫲固然不聽勸，踏著瓦礫，著大家用電筒照亮廚具擺放位置，Dorz只好臨時為她戴上頭盔，在一旁扶著嫲嫲。
嫲嫲伸長脖子張望，要尋找親戚買給她的瓜刨：「我有一樣嘢好好用嘅，德國嘅，嗰個冇晒喇。冇晒喇，算啦算啦算啦。」
Dorz雙手扶著嫲嫲肩膀要求她離開廚房，嫲嫲餘光仍在不停搜索，說「啊呢個冇燒到」，Dorz不由得眉頭緊皺：「出返嚟，你唔好激我，激死我同你講！」嫲嫲就笑笑說：「哈哈！冇事。」
擾攘完一輪，Dorz已感到疲累，自言要冷靜片刻，他熟知嫲嫲個性，形容「啲老人家好慳家，唔捨得掉，佢有啲嘢用到最後一刻唔爛，佢都唔會掉。」
嫲嫲不知何時已返回房間繼續收拾，他在門外看著嫲嫲，說「佢個人好硬頸，唔願聽人講嘢，選擇性失聰，有時候好炆，見到佢咁樣好激心，但係又有啲痛心，唔捨得呀嘛，唉。」語畢Dorz又心軟，放輕聲線對她說「比我，你鍾意執乜嘢就執啦。」
Dorz回想嫲嫲半年以來，一直牽掛家中情況：「上到去嘅時候，口講話唔緊張，好開心，但其實佢好緊張，不斷喺度摷。因為間屋自己買返嚟，廿幾年，自己屋企，佢心情我理解。」
相簿也要斷捨離 手機記錄損壞照片
嫲嫲回到家第一件事就交托Dorz尋找相簿。找到的其中兩本舊相簿，是嫲嫲榮休日拍攝，以及她跟隨福音隊服務內地少數民族的重要回憶，大家看到都不禁歡呼。
他們找到兩本舊相簿，是她榮休日拍攝，和以前跟隨福音隊向內地少數民族傳福音的重要回憶，大家看到都不禁歡呼
Dorz在客廳找回存放相簿的膠桶，這才知道家中相簿之多，他笑言「全家都好鍾意影我」。Dorz逐本翻開回憶成長片段，帶走，爺爺嫲嫲、父母的舊照。
不過部分他孩提時的照片、和公公婆婆的合照，因浸過水發霉，Dorz不捨說：「唉，呢啲好珍貴呀，我好細個嘅相嚟㗎」。Dorz用手機拍下照片，淡淡然道：「呢個我唔會帶走，爛到咁」，隨即將要放棄的相簿擱在一旁。有時他放下了相簿，又會拿起再翻幾頁，看看自己嬰兒時候的樣子。
Dorz放下浸壞相簿，又會拿起再翻幾頁，看看自己嬰兒時候的樣子
留下衣物 盼有新開始
相比嫲嫲，Dorz收拾時較為灑脫，嫲嫲拿著他的背包問「阿仔呢個你要唔要㗎」，Dorz說不要。Dorz的衣服也通通不拿走，嫲嫲看著衣櫃較完好的衣衫，不解地問他「呢度都冇燒到，唔要喇？」Dorz答得決絕：「全部唔要」。
Dorz解釋自己不想拿走充滿煙燻氣味的衫褲鞋襪，只會取走有紀念價值物品，「我覺得洗完之後永遠都有嗰陣味，同埋我諗係當一個重新開始」。
Dorz來到自己房間，看看上次收拾有無遺漏，同樣很快知道什麼東西不會帶走。他看著熏黑的林家謙首場Summer Blues演唱會海報，用手機拍下照片留念。不少熏黑的擺設他都沒有帶走，包括朋友送給他的三眼仔公仔，不過他仍將桌面上凌亂的公仔整齊地排列在鏡子邊框上。
房間內的毛公仔，Dorz一早決定不帶走，自言「比較迷信，唔敢」，但是他拿起IKEA的紅毛猩猩，還是把玩了一會，說是公仔剛推出時獲贈，自己「勁唔捨得佢」。
熱愛運動的他看見客廳羽毛球拍袋，興奮地說「個羽毛球拍冇事呀！真係好想攞返，五嚿水呀！」不過他取出融化手柄，已心知不妙，球拍果然已經變形，但他隨即自我安慰，「以為冇事㖭，唔緊要啦。」
Dorz今次帶走的東西不多，其中包括兩本書《自由未竟》和《日常風物詩》，以及就讀廣福邨阮鄭夢芹小學時的練習簿，他說「呢個留低先，雖然唔知留嚟做乜嘢。」
臨別一曲《耶和華是愛》 小心擦拭琴鍵
嫲嫲是虔誠教徒，3小時時限將至，她在上格床翻翻找找希望尋回的，是預備帶去內地傳福音的「耶穌愛你」毛巾。Dorz問嫲嫲，「下次先好冇？」嫲嫲就說「下次冇喇，冇下次。」Dorz告訴她會有下次，她才答應下床，離開房間。她又再確認「下次有冇再嚟呀？或者冇喇！所以呢我要攞一本詩歌返去」。
以前嫲嫲在家常常練琴，預備在教會做詩琴。臨行前她最後心願是彈奏一曲《耶和華是愛》。她在鋼琴前坐下，又站起身翻自己的背包，拿出預先印製的琴譜派發給大家，叫大家一起唱：「感謝主呀！」
嫲嫲說原先預計鋼琴已燒毀，說「不過我都唔會好難過，部琴好耐喇」，不過其實她很愛惜鋼琴，坐下後下意識就用紙巾擦拭熏黑琴鍵。
歷經高溫，鋼琴經已變調，嫲嫲彈奏片刻就指著琴鍵說「壞咗」，又反覆敲打同一個琴鍵，說「冇聲」。她熱身過後後，數了「123」就開始正式彈奏。大家用三、四個電筒照著琴鍵，隨著嫲嫲彈奏而移動光源，彈到一半，由於現場太昏暗，她仍說「睇唔到」。嫲嫲彈唱一遍後，又轉用另一個調，避開壞掉的琴鍵彈奏一遍。
Dorz問嫲嫲要不要帶走琴譜，嫲嫲不捨地逐頁翻揭：「呢個都冇燒過，不如我揹走啦」，Dorz就在一旁說，她不捨得的其實是鋼琴。嫲嫲看著琴頂的琴譜，再度自問「呢個使唔使攞呢？冇地方擺。」
嫲嫲琴譜
她最後帶走了數本詩歌集，但拿著電筒照來照去，還是找不到福音粵曲集。此時時間差不多，屋外傳來社工提醒聲音，嫲嫲最終放棄，「哎呀太重啦，如果有下次，下次嚟攞，有冇下次呀？」
嫲孫合奏了幾句《快樂頌》後，嫲嫲一邊小心合上琴蓋、琴布，一邊又說剛才不算彈琴：「奈何尚未彈到琴」。不過嫲嫲已覺感恩，「感謝上帝仲可以上嚟執嘢啦，我呢個房間冇乜嘢燒到，所以好開心啦，但係都真係幾攰下」。
直到最後一刻，嫲嫲在琴凳底還找到打算帶去內地傳福音的五色珠、單張，說「這個很寶貴，去到邊度，邊度都會傳福音。」
「望到屋企咁混亂好唔舒服」
嫲嫲臨行前忍不住數度回頭看清家園，她將散落地上的雜物稍作整理，放在椅子上，說「望到屋企咁混亂好唔舒服」。她腳步最後停留在玄關，檢查櫃子內的食品，被旁人勸阻說「唔食得」，嫲嫲還是拿走了數個空的食物盒，念著「怎麼會不要呀」，再打開抽屜檢查過後，才終於步出家門。
開心可以回家 遺憾未帶走新買圓凳
嫲嫲愛乾淨，收拾時已多次表示「手好黑」，下樓後第一時間找洗手盤洗擦隨身袋，吃飯、搭車都不時看著被弄黑的指甲，不斷擦拭。
在回啟福居途中，嫲嫲笑言上樓感覺開心，回看整個過程她覺得有些趕急，要不斷問自己什麼東西需要帶走，「因為間房冇乜點燒，執呢樣嘢、執嗰樣嘢，要執咩嘢呢？要攞咩嘢呢？」
上次上樓只能從手機視像了解家中情況，嫲嫲說房間情況比預期好，「原來想像應該冚唪唥燒晒，但係未有，我個房間好多嘢都未燒到，好感恩。」問她是否想「成間房搬走」，她開懷笑了一會，應道：「都唔係，有嘢可以用，但係你搬去又冇地方，咁就算囉。」
不過有些未尋獲的物品，嫲嫲一直掛在嘴邊，包括準備去內地傳福音用的一袋物品。她怔怔地看著前方，停頓片刻，說「仲有被套、床笠呀......」她又牽掛著鋼琴旁邊6張新買的圓凳，說是為了接待教會執事上門吃飯，特地購入，自己更親手製作了椅套，「買咗冇幾耐，火燭之前幾個月，冚唪唥好乾淨全部都冇燒到，我都想要。買一個80蚊，嗰時我屋企會時時有人上嚟。但係搬去擺邊度呢？唔方便。」
盼儘快安置 「等兩三年我都上天堂囉」
住在啟福居半年，嫲嫲說始終未能習慣與孫仔分住兩個房間，「一個人住，係過渡，長期唔習慣。長期要自己一個屋嘛，同阿仔、孫女一齊住，先有歸屬，有一個家。而家呢個都唔似家。唔知幾時可以攞屋呢？」
嫲嫲現在仍每週回廣福邨返教會，她最希望安置在大埔墟附近。她指最重要樓換樓有理想選址可以選擇，舉例東涌、觀塘交通就太遙遠，暫時覺得粉嶺比較方便，九龍灣就較快入伙，「有啲地方要等兩三年，等兩三年我都上天堂囉」。
二度上樓較冷靜 歸功嫲嫲正能量
忙碌大半天，Dorz在送嫲嫲回啟福居後，將多袋紅白藍袋搬至迷你倉。Dorz回憶第一次上樓，情緒失控，只能全程低頭步入單位，「情緒激動，會喊、好低落、好emo。」
今天上樓，他指自己「冇咁激動，情緒平穩好多」，認為要歸功「正能量發電機」的嫲嫲，「可能佢行為表現令到我成件事冇咁stress」。他指今次自己比較理性，可以多觀察家園：「個屋苑燒成點，公園夷為平地」，行後樓梯時又會看看欄杆和所經過的單位。
如果再上樓，Dorz說「我會想攤下我張床，因為自己房間而家頹垣敗瓦，心有啲唔舒服，想留耐少少，發下呆都好」。他也想和自己房間、家中每個角落都拍下照片。
上樓後欲原址重建 「發現好掛住呢個地方」
災後曾經訪問Dorz，那時候他說，自己心理上難以接受原址重建，不過上樓後，他的想法有改變。他說「我冇諗過自己上樓後，我係好想原址重建，因為我真係發現，好掛住呢個地方，由細到大住嘅地方，嗰種不捨，同埋你見到間屋損毀程度，再修葺過其實有機會住返。」
比起悲傷，Dorz指自己現在是「憤怒主導」。他指收到收購建議信，「業主大會又仲未開，成件事好似搵支槍指住你，『你好快啲簽』，但大會係無限期拖延，咁有咩意思？有好多地方你都唔肯同我哋商榷，成件事係硬食。」
他希望大會上街坊能真正討論前路，「大家有個真真正正業主大會，等我哋坐埋投票表決、否決，有個真正嘅數據，起碼心服口服。原唔原址重建，起碼都要大家行出嚟真正有個數據。就算死都想死個原因。」
他最後感慨居民訴求遭冷處理，「我諗呢段時間，全香港人都知道我哋宏福苑嘅人係好calm，好有教養好有禮貌，唔係啲野蠻人。你而家嘅態度令我哋更加憤怒，逼我哋變一個野蠻人。你覺得我哋好想嘈你咩？我哋都攰㗎其實，我哋真係心力交瘁。」
