【獨媒報導】全國政協常委何柱國曾多次公開批評行政長官林鄭，他下午在會展投票後見記者，再勸林鄭反省：「幾廿歲喇，朝頭早起身嗰陣望下個相，望下件衫，望下個樣 」，批林鄭「破壞多過建設10倍」，他直言19年時有參選特首的想法：「唔係我自己認叻，做蠱惑嘢、做依啲嘢我唔比鄧炳強差。」
喚林鄭不要連任
何柱國日前在電台向林鄭下戰書，邀對方同台辯論，題目為林鄭曾經自詡「對香港建設多於破壞」。何柱國表示，辯論目的是勸林鄭不要再參選特首選舉， 讓她有自知之明：「一個人自己反省下啦，幾廿歲喇，朝頭早起身嗰陣望下個相，望下件衫，望下個樣。 」
他又勸林鄭的支持者應一同反省：「你哋自己照下塊鏡，諗下佢錯嘅多定功嘅多。」他指「我其實心裏面都係為佢好」，但不期望林鄭會願意辯論：「除非佢傻，佢梗輸嘅。」
稱曾考慮選特首：做蠱惑嘢我唔比鄧炳強差
何柱國指出，在前年7、8月社會運動期間，看見林鄭心驚膽跳、六神無主，「嗰時我諗佢都廢㗎喇冇咩用」，但「嗰時唔可以亂」，才表示會支持林鄭，喚對方別辭任特首。他透露，至11月、12月情況未有改善，當時便有參選特首的想法：「唔係我自己認叻，做蠱惑嘢、做依啲嘢我唔比鄧炳強差。」但他認為，在《港區國安法》落實後，香港已沒有暴亂危機 。
被問到下屆特首的理想人選，何柱國認為將來香港最大危機為金融，點名有處理金融危機經驗的人，包括全國政協副主席、前特首梁振英、滙豐非執行主席王冬勝、及金管局前總裁陳德霖為合適的特首人選。
嘲林鄭衣著「日日好似鳳凰蝴蝶咁」
在見記者時，何柱國多次批評林鄭，斥對方「破壞多過建設10倍」，令不少人移民到英國、加拿大等地，又反問：「如果唔係佢 ，洗唔洗咁多人離鄉別井？」他提到，在前年社會運動期間，香港市民生活沒有安寧，兼一直未解決陳同佳事件及通關問題，又嘲諷林鄭發表施政報告後的衣著：「日日好似鳳凰蝴蝶咁，日日件衫都唔同。」
截止下午四時半 選委會界別投票率達九成三
截止下午四時半，選委會界別已有1,353人投票，投票率達 93%。多名選委在下午陸續到會展投票，包括長江實業集團董事局主席李澤鉅、前全國政協委員、美心集團創辦人長女伍淑清和新鴻基地產發展有限公司董事局主席郭炳聯等。
