（獨媒報導）黃大仙祠過往在新春期間香火鼎盛，但政府推出新一輪辣招抗疫，明日起關閉所有宗教場所，直至24日才重開，但未打針非豁免人士就不得內進。大批善信今趕在黃大仙祠關閉前押線參拜，有善信批評政府離地，措施反而令人群聚集增加感染風險。早前頭柱香取消，初一至初三關廟，令香檔生意蕭條，有檔販直言對重開無期望，大嘆「一句說話，香港執笠」。
黃大仙祠旁的檢測站大排長龍
嗇色園黃大仙祠宣布，將由2月10日起關園至2月23日。由2月24日起重開，但實施所有進園人士必須擁有「疫苗通行證」及掃描「安心出行」。黃大仙祠內之嗇色園中藥局亦會跟隨黃大仙祠於2月10日至23日期間暫停服務。連同早同取消廿九頭柱香儀式、再加年初一至三亦曾關廟，廟外的香燭檔生意慘淡。
檔販嘆：「去返兩年前咁得唔得？」
祠外香檔的七旬温婆婆表示，從小與長輩在黃大仙祠賣香，至今近60年，形容從未見過生意如此冷清，「蕭條又蕭條，講起就傷心」。被問到會否擔心繼續閉廟，婆婆的兒子温先生直言無期望，「你要清零先至開嘅，咁唔洗開㗎啦」，婆婆亦附和道「一句說話，香港執笠」。被問及對黃大仙有何祈願，温先生嘆道已無甚可求，「求佢可唔可以去返兩年前咁，得唔得？」
真善美蓮姐香檔的店主阿偉則表示，「成個黃大仙（的生意）已經好大鑊」。他又對頭柱香及初一至初三關廟的決定表示不解，預計比往年少了十萬人流，每日生意額只剩數千，大跌七成。對於會否擔心本月24日後仍要繼繼閉廟，阿偉苦笑「預咗佢會，佢一定會，佢唔會理民間嘅痛苦」，並指現時只求清貨，不求利潤。
被問到自己今年對黃大仙有何祈願，他無奈指「冇咩好苛求」，只望有健康身體繼續開檔，「五濁惡世嘅時代太多壞人」，寄望年輕人韜光養晦，亂世中鬥長命。阿偉因心臟血壓問題而一直未有接種疫苗，惟他認為無須過份擔心，又懷疑Omicron殺傷力不大，類近傷風感冒，不滿政府製造恐慌。
善信亦同樣受影響，任職保險業的詹先生與同事以往在正月十五才參拜，但得悉明日關廟，提早前來祈福。他認為政策宣佈得太突然，「有啲人可能諗住星期六日放假先過嚟，但係已經封到過晒年。詹的同事因為要輪班工作，無去參拜。他認為打第三針的影響比關廟更大，「咁一定係擾民㗎啦，但係你無辦法嘅，咁佢想谷針，就要係做啲令人唔方便嘅措施，咁你先會去打針」，又補充「都無得點睇，唔滿意都係要跟，你無得反抗，無得選擇」。
詹先生
黃大仙祠旁不足五十米距離，則設有檢查中心，目測高峰時期超過60人排隊檢疫。善信陳小姐每年均來為公司祈求平安、生意興隆，她得悉關廟，「依家即刻喺公司仆過嚟」。陳小姐每年都會前來為公司參拜，祈求平安、生意興隆，是公司的習俗。她表示原本打算下星期一才來，但今早返到公司才發現祠廟即將停開，只好倉猝趕來，她指太倉猝之餘，亦增加市民感染風險，「佢話唔好聚埋一齊，其實基本上無咩分別㗎咋」，她認為如果政府真的有心減人流，倒不如即日關廟。
陳小姐
祈求港人早日恢復自由
阿權指自己每年農曆新年都會到黃大仙廟參拜，被問到宗教場所將列入疫苗通行證範圍對他影響，他透露已接種疫苗，實際影響不大，但稱「無計啦，呢個社會逼住人哋打針，作為星斗市民都好難避免到」，又表示「希望政府態度唔好太強硬，應該多啲了解我哋嘅民意」。阿權又指，政府應了解如何才可真正保護市民，而非「樣樣嘢到刻意去圍封、監管我哋」，他笑言「不過可能佢都唔會聽㗎啦」。被問到會祈求甚麼，他指希望身體健康、香港市民可以早日出國，並冀可「自由活動、食餐安樂茶飯」。
阿權