【獨媒報導】下周三是五一勞動節，工聯會、勞聯等提出最低工資加至55元。行政會議成員、自由黨黨魁張宇人在一個節目表示：「最低工資係唔應該有，呢啲係畀啲政客選舉呀，搵嘢做呀，招收會員呀，而成日講最低工資、標準工時，講唔完㗎！」張宇人表示，現時領取最低工資人士可以聯絡他：「嚟我度做洗碗啦，你叫佢嚟搵我呀，佢肯做洗碗，一個人都可以搵萬八，仲可以住近佢屋企！」
本港法定最低工資由2011年5月1日開始實施，時薪為28元，及後多年提高金額，至去年上調到時薪 40元。張宇人今早在Now新聞台節目《時事全方位》講述最低工資，指本港大部份時間全民就業，最低工資會削弱本港競爭力，認為「最低工資係唔應該有」。
李國強（Now新聞台截圖）
受最低工資保障人數下降 工會指已失去意義
港九工團聯合總會主席李國強表示，「打工仔」在搵食之餘，希望能同時幫補家庭開支，舉例指食環署外判清潔工，以時薪40元計算每月薪酬只有8,400元：「佢老公附近大廈做保安，一個保安一個清潔，又係8,400，兩公婆加埋16,800蚊。」
李國強指出，社署四人綜援家庭月入約16,900元，現時最低工資金額令人失去工作意欲，認為40元是不切實際。他更點名張宇人：「當年就係張生提出廿蚊嘅時間，政府提出嘅時薪就係第一個法定最低工資就係28蚊，保障18萬人，全體僱員人數6.4%。」
根據最低工資委員會報告，現時最低工資時薪40元保障約2萬人即1.5%，李國強認為已失去意義。對於增至時薪55元，李國強表明除了工會，絕大部份公務員工會都支持，並能涵蓋25至30萬人。
張宇人（Now新聞台截圖）
澄清從未提出時薪20元 稱飲食業洗碗缺人
張宇人反擊稱：「喺工會嚟講嚟呢，如果我係工會代表就覺得離譜𠻹啦，應該去到300蚊個鐘，標準工時就應該一個禮拜20個鐘，大家可以做廿個鐘就搵好多錢。」他澄清表示，自己從未提出時薪20元，只是20元影響飲食業約1,000名員工：「咦，咁幾好呀，如果係廿蚊，無殺傷力喎，可以接受喎！」
在節目中，張宇人強調，如非李國強提出便不會特別澄清，指聯會當時曾作調查，業界認為時薪24元亦能接受：「佢唔講個歷史，我唔會再去澄清，但好多人都鍾意去誤解呢個問題。」張宇人認為，工資不應靠最低工資提升，更喚正在領取最低工資人士可以找他：「嚟我度做洗碗啦，你叫佢嚟搵我呀，佢肯做洗碗，一個人都可以搵萬八，仲可以住近佢屋企！」
本身是飲食界立法會議員的張宇人，他一度十分激動，稱自己住在沙田，附近的馬鞍山亦沒有人洗碗：「所以無同我講啲人搵唔夠呀！陰公，綜援家庭四個都萬六蚊呀！」張宇人更表示，如果當局准許業界現金出糧，資方不用為其供強積金：「我閒閒地無一萬，都有八千個員工多咗嚟做。我唔知證明係乜啦，綜援俾得錢多，定還是啲人等緊公屋呢？亦都可能樣樣都有，而家公屋嘅輪候，你係一萬九千幾蚊，你一個人同我做洗碗你都爆燈，咁你點呀？放棄個公屋啊？咁咪叫人無做囉。」
Now新聞台截圖
張宇人：飲食業最大支出是工資 令本港失去競爭力
然而，李國強回應指，最低工資時薪訂立的時候僅28元，已是輸在起跑線，及後每兩年增2至3%，在13年間僅加了12元：「我問吓張生，一年都唔夠加一蚊，咁可唔可以接受呢？宜家出去食個飯盒，三、四十蚊、四、五十蚊，最低工資做一個鐘都搵唔到飯盒食！」他批評政府傾斜商界，最低工資委員會以政府、資方成員佔多數：「我哋嗌點樣嘅價錢都提升唔到。」他更質問張宇人：「你就話請唔到人，我洗碗出萬八蚊，但你又反對加我哋55蚊，好似我聽落有少少矛盾呢？」
張宇人反駁李國強「你聽乜嘢都矛盾」：「你自己覺得講嘅嘢唔矛盾，其實最矛盾就係你。」他認為工資應按生產力，而不是購買力，「你通漲係你嘅問題」：「工人想越加得多，越提升你嘅生產力。好似你哋啲咁嘅工會，不停咁嗌最低工資，做到乜呢？就係我唔洗增加生產力，我人工都加喎。所以點做呀？」
李國強一度未能反應過來，張宇人最後「乘勝追擊」，指飲食業現時最大支出是工資，而工資推高物價，直接令本港失去競爭力：「你睇清楚呀，你唔係盲㗎！你盲㗎呢你都會聽到，除非你聾嘅，你宜家睇我哋同鄰近嘅競爭力！」