【獨媒報導】今屆區議會選舉地區直選投票率僅得27.54%，創下區議會選舉以來最低。全國港澳研究會副會長、全國人大前常委譚耀宗稱投票率合理，指按照過往經驗，社會較平靜、沒有太大爭拗，「投票率相對靜啲」：「如果話各種力量扯到行晒，咁咪投票率會高。」
翻查紀錄，2011年及2015年區議會選舉的投票率，亦分別為41.49%及47.01%，2019年區議會選舉投票率則高達71.23%，今屆在新選制下僅得27.54%。
譚耀宗稱毋須過份解讀 「120萬人投票都唔少啦」
譚耀宗今早在商台節目《在晴朗的一天出發》稱，外界不應過分解讀，重申投票率涉及不同因素：「宜家睇返有120萬人投票，都唔少啦。」不過，主持指出「但係歷屆都係新低喎」，譚耀宗稱「都唔少啦」：「都係合理範圍啦，唔洗話過份解讀，唔洗太緊張。市民自己覺得有需要出嚟作選擇，咪出嚟作選擇。」
此外，譚耀宗指按照過往經驗，區議會選舉投票率會較立法會選舉為低，加上現時社會平靜：「大家又覺得啦，無問題啦。而且有啲出咗去出面喎，可能加加埋埋各種因素，都好正常嘅。」
建制「谷盡」仍僅27.54% 譚耀宗：沒定下任何指標
對於建制「谷盡」仍只得27.54%的投票率，譚耀宗重申沒有定下任何指標：「因為新選制，驚住好多人唔係好清楚，盡量要解釋清楚。」
主持問譚耀宗，既然社會平靜，未來所有選舉的投票率料都會偏低，「預計個社會都會和諧，唔會好亂㗎嘛」。譚耀宗稱同意，指按照過往經驗，社會較平靜、沒有太大爭拗，「投票率相對靜啲」：「如果話各種力量扯到行晒，咁咪投票率會高。」
錄2.2萬張廢票較以往高 譚耀宗：不排除有人剔錯
政府為今次選舉作鋪天蓋地宣傳，但投票日仍有共304,609名港人出境，當中約23.4萬人前往內地，人次較上周日更高。譚耀宗則認為「呢啲嘢你無辦法㗎啦」：「大家鍾意返咗上面，平靚正咁啦，有假期就返去開心下。」他指港人過去幾年受疫情影響，未能到內地遊玩，現在復常就「很難制止」，政府只能用其他方法，吸引市民先投票才前往內地。
另外，今屆選舉錄得約2.2萬張廢票，佔總票數1.85%，同較以往高。譚耀宗就認為，今屆選舉採用新制度，即雙議席單票制，不排除有人尤其長者「剔錯」：「所以有時我都擔心呢，喂，會唔會覺得兩個都幾好喎，剔咗兩個。」