2025上半年，有27間公司喺香港上市首日爆升，其中泰國椰子水品牌IF母公司IFBH Limited就威威——2681倍超額認購，首日高開58%！反觀李澤楷旗下啱啱上市嘅富衛保險，首日掛牌升1%，表現淡定。李先生旗下嘅另一猛將，貴為香港演藝界藍籌股嘅姜濤，佢成日話要衝出亞洲，但係直到而家，「姜濤灣」嘅版圖止於銅鑼灣，最近有波及西環，但距離亞洲......表現待定。
大眾對一間上市公司嘅了解，就係閱讀招股書裏面嘅故事；至於招股書嘅背後，就家家有本難念嘅數。大眾對一個藝人嘅了解，就只限於幕前網上嘅故事，背後嘅一切就不為人道。故此，講好一個故事就係面向大眾嘅關鍵。究竟做生意同做藝人，要講啲咩故事先可以「衝出本土」呢？或者可以參考下IF椰子水個故事點講！
大市場小縫隙嘅一哥
IFBH係中國內地同香港椰子水銷量冠軍，香港市場佔有率高達60%，連續九年蟬聯榜首。內地市佔率約34%，連續五年保持領先。佢唔係要同汽水、果汁、奶茶搶，淨係揀「健康又唔會太甜」呢個細縫隙，一樣做到一哥。
46個員工撐起11億港元市場
46個，你冇睇錯！冇工廠、冇倉庫、冇直營銷售團隊，全靠代工同分銷。46個人，專心做最核心嘅事：揀好椰子、連接渠道、講好故事。
我細唔代表我唔賺錢
2023到2024年，IFBH嘅營收由0.87億美元躍升到1.58億美元，同比增長約80.32%。2024年淨利潤3331.6萬美元。
精準定位：天然健康嘅「啱啱好」
飲水係健康但淡茂茂，飲果汁汽水奶茶又太甜唔健康，IF就係呢幾樣之間嘅「啱啱好」。用泰國香水椰子，低糖、低熱量、有電解質同維生素——呢個定位，啱晒追求「自然輕健康」嘅大眾。
對社交媒體傳播嘅深刻理解：用「滲透」代替「轟炸」
唔揀廣告狂轟濫炸，淨係靠社交媒體「滲透」：「肖戰同款椰子水」抖音話題播放量5億；李佳琦直播間5萬樽秒光；劉畊宏健身時拎住飲，間接話畀大家聽「健身飲呢支最啱」——每個場景都啱晒目標客群，唔「轟炸」。
套用返以上橋段，富衛有冇「講啱故事」？
賺錢嗎？近幾年業績波動大：2022年到2024年淨利潤分別係 -3.2億美元、-7.17億美元、1000萬美元。兩年蝕超過10億，2024賺嘅比椰子水小，好大原因可能係「好大」——好大嘅泛亞市場、好大嘅銷售團隊、好大嘅債務......聽落似唔似一個賺錢嘅故事呢？
再看姜濤
定位精準嗎？佢係歌精舞勁？創作才華洋溢？靚爆鏡？型爆正？演技絕塵？係好似椰子水咁天然健康？姜粉認為以上全部都係。假設粉絲「好得太過份」是一個定位，要衝出本土，將一個一個「死心塌地，作我護蔭，詆毀咒罵，仍舊堅持，說我可以」嘅姜粉故事無限擴大延伸到亞洲不同國家，會是一個怎樣的故事？
對社交媒體嘅深刻理解：用「滲透」代替「轟炸」。舉一個例子：姜濤西環意外墮海事件發生後嘅處理，事件引發嘅網上流量，滲透咗啲咩？有為姜濤轉化成精準嘅定位嗎？流量有轉化為錢？抑或流量孕育咗一個海外市場機會？如以上皆非，敢問姜濤嘅團隊，你哋對社交媒體嘅深刻理解，從何說起？（要進一步探討如何將流量變成國際化機會，認真諮詢一下AI。）
要成功衝出本土，富衛同姜濤都要問一個問題：「我嘅故事係......？」
（利申：本人現無持有IFBH 或富衛保險嘅股份，可見將來都不會持有。）
（本網歡迎各界投稿，文章內容為作者個人意見，並不代表本網立場。）