（獨媒報導）那日多雲，不時下起雨來。走進西營盤的飛雲書店，頓時感到安心，甚至很神奇地出現deja vu的感覺，尤其是書櫃與延展的台階⋯⋯原來，飛雲前身是「覺閣knock knock」，於2023至25年期間營業；再之前是「舍下Hiding Place」，2021年初開張，經營至2023年。換言之，這店舖已經歷兩次頂手，之前兩任老闆也是賣書。
不怕生意難嗎？店主Tony說，「我好奇問過上一手，點解開書店，佢話想開囉。依家有其他人問我，我都係話，想開囉。好似去到最後都係遺傳，或者繼承咗嗰份意志。」
《獨媒》記者笑稱雖然曾經到訪，卻不肯定是「哪間」書店，只記得當時有張「豬肉檯」，擺放新書和暢銷書，如今不見影蹤。另一位店主T摸著下巴思索：「嗯⋯⋯咁應該都係飛雲書店喎！我哋以前都擺咗一張大檯，的確可以幫助銷量，但後來都係想空間大啲，加上我哋又成日搞活動呢！」
上個月，飛雲書店舉辦48場活動，冠絕全港。今個月，他們的日程表同樣排得密密麻麻，包括圍棋、咖啡渣花樽、八字斗數、桌遊、單弦琴、香水工作坊等。飛雲書店共六位店主，不少是心理學或社工系出身，他們認為，近年社會情緒低落，正正需要一個空間去連結彼此：「有人叫呢樣嘢做倦怠（社會），有人話係disconnected嘅年代，我覺得（大家參與活動）正正係對於呢個現象嘅反撲，就係想搵返自己，搵返人同人之間相處嘅感覺。」
他們不寄望人長久：「人會聚合離散，好似雲一樣，由水份蒸發上去，形成之後又會跌落嚟，一個循環。不過雲幾舒服，幾柔軟。」店主Tony抱住白雲公仔笑說：「仲有一層意思！就係『機會嚟啦，飛雲！』」
繼承風雨不改的意志 以活動開拓機會
飛雲書店共有六位店長，全部身懷絕技：兩位是心理學家及講師，一位是社工兼大專講師， 一位是哲學作者，一位是教師，一位是會計師。有趣的是，這6位店長本來並不認識彼此。
上一手覺閣knock knock書店結業時，其中一位店長打聽到消息，本來有意接手，但計數後發現需要更多人合資，於是「朋友搭朋友」找來另外五個人。他們抱著不同的想像，出來吃飯一兩次後，便決定創立書店。
對Tony而言，開書店難得的機會：「我好鍾意書店，佢有個先天獨特優勢：就係你開間cafe，大家都要買杯咖啡先可以坐一日，但書店係歡迎人打書釘，如果睇唔啱，可以唔買。睇啱買完返去，過幾年又變成二手書，賣返俾我，我都唔介意！」Tony豁達，不求賺錢：「我好奇問過上一手，點解開書店，佢話想開囉。依家有其他人問我，我都係話，想開囉。好似去到最後都係遺傳，或者繼承咗嗰份意志。」
店長Tony相信，開書店不是為錢，而是為了建立社群。
至於店名的由來，源自一位住坪洲的店長。有日坐渡輪時，街坊建議他：「（新書店）叫雲啊！雲很舒服。」很快，六位店長就決定取名為「飛雲書店」，既呼應香港配音動畫《魔神英雄傳》其中一句經典配音對白「機會嚟啦，飛雲！」，寓言知識為人帶來機會；也比喻讀者如行雲，有時聚合，有時離散，但總有一天水份足夠時再聚。
訪問當日下雨，走入飛雲書店時，格外覺得舒服又安心。店主T卻回想起去年七月試業那日，天色極灰，刮起狂風暴雨；更誇張的是，開張前一晚更掛八號風球，朋友都WhatsApp他：「你們是否繼續啊？」T果斷回應：「是！風雨不改。」結果那日很多朋友到場，擠滿了整個空間，連轉身也有困難。
對T或其他店長而言，這算不算一種啟示？就算外面風雨再大，飛雲書店總可以默默做好自己，創一番成就？不過，開業首一個月，他們很快又迎接另一種無形的「風雨」，就是沒有生意。
跳出傳統機構的官僚框架 嘗試千奇百怪
店主T回憶當時的景況，與Tony相視而笑：「我成日都覺得呢條街好有趣，叫保德街，即係保住德行，唔係刻意經營。原來呢度真係無咩人經過，然後真係會『零』㗎。」他暗示的是，書店營業額為零，沒有收入。Tony打趣回應：「零真係屈機，真係好完美嘅數字！」
飛雲書店位於西環保德街，鄰近香港大學站B出口。
他們發現，要繼續下去，首先就是需要人流，累積讀者社群。於是，幾位店長發起大大小小的活動：除了不同主題的展覽、作者和專家分享，還有一連串以哲學和心理學為主題的活動，例如鼓勵深度交流的「雲上deep talk」，知識型面向的「飛雲讀書會」。此外，他們還舉辦各式主題的活動，涉獵動物保育、佛學、音樂、圍棋、茶聚、詩聚 、易學、八字斗數、桌遊、手工藝創作、藝術分享等⋯⋯愈做愈多。
店長Tony鍾情哲學，其中一幅在飛雲書店店內的鏡子就寫有KNOW THYSELF (認識你自己) 的字句。
店長T憶述，有日他剛好在港大上課後，來書店坐了一天。他遇到第一個活動是關於苔球植物，第二個活動是講南美旅遊的，第三個活動是哲學主題，非常充實。
訪問當日，飛雲書店正舉行「3EYESALON三眼沙龍」，在不同角落開展了四個圍棋局，多名高手到場博弈。
上個月，飛雲書店舉辦48場活動，冠絕全港。幕後的主力搞手Tony相信，活動是連結社群的最好方法：「唔使去到⋯⋯（唔開心）先嚟搵我哋㗎，認真。社交就係精神健康嘅第一防線，某程度上有啲似primary health care。」
聽起來，Tony像個學者嗎？他其實是一位大專講師，曾以社工身分在幾間機構工作。他的經驗告訴他：「其實社工能夠提供嘅服務，有佢嘅侷限。KPI不外乎三大類：case, group, programme，你跑咗就得⋯⋯如果以前我話想搞呢啲活動，上頭唔會批。（不批的原因？）『喂，得唔得？有無用呀？同機構理念align嗎？』」
Tony以貼地說法解釋：「有啲嘢多咗就無得減，即係如果今年搞咗活動，下年無？老闆會問點解呀？所以部份機構員工都會覺得，你痴線啦，做咩俾咁大壓力自己？本身條數都夠難跑了⋯⋯」
店主T說，香港人性格內斂，不愛發問，但以他觀察，活動參加者都會問問題：「呢度空間細都好，因為講者同觀眾可能真係得幾步之隔，好自然好容易會互動。」
社會抑鬱 更要抓緊機會一起變身
在飛雲書店，他們有更大自由和彈性，把理論與方法實驗出來，嘗試建構理想的社群。另一位店主T是臨床心理學家，他喜歡觀察香港社會，並認為市民有抑鬱或情緒問題根本是結構造成：「有本書叫《民困愁城》，就係講一個弱嘅社會結構，會影響好多人。個結構就係話俾你知，你必須為自己『變身』，即係你要為自己生命入面嘅選擇，負好大責任。」
這裡的「變身」，意指離開經典的道路或規劃，擁抱自己想做的事情。聽起來很正面？但在香港「變身」其實不容易，T說香港人太習慣一種思維模式，就是甚麼都要自己處理好：退休？當然是自己儲錢打點；照顧老人家？找朋友或資源幫忙，或聘請外傭──「依家成日講合格嘅大人，就係要自己為每一次『變身』失敗負責，而我覺得呢個就係香港人陷入抑鬱嘅狀態。」
不論陰天晴天，總可以來飛雲書店看書。
他希望每一個孤獨或受傷的人都可以來飛雲書店，好好看書、充電、放空，並遇上志同道合的朋友：「我哋可以一齊去『變身』。因為剛才提到嘅『變身』都係個體，但我哋想要嗰種係一齊面對。你中有我，我中有你。」
記者：馮曉彤