最近因為出現打完疫苗都中招的案例，坊間出現「打嚟都冇用」的說法。呢個時候，數據分析可以幫大定搞清楚件事。數據講嚴謹定義，同我哋平時講嘢好唔同。呢件事上面，好多人會將「有人打完都中」同「打嚟都冇用」兩句說話等同。數據上，當然差好鬼遠。
我哋先睇吓左面張圖，個正方形代表嘅係成個洛杉磯打左咗針嘅人。係咪有人打咗針都中呢？係，但係好少，個正方形右下角好細粒果忽先係。考慮到美國本身疫情流行，呢個比例真係好低。此外，打咗針不單止冇咁易中，就算中咗都冇咁易入院，圖中最右下角橙色部分就係。因為太細粒，要放大8倍先睇到。
咁有打針相對冇打針呢？我哋睇下右面張圖：黃線係冇打或未打晒，綠線係打完。首先，綠線唔係零，打完都係有機會中嘅 -- 但係綠線一直都低過黃線，說明打咗針真係冇咁易中。最緊要嘅，係七月以嚟黃線爆升；綠線雖然都係升，但係就慢好多。七月以嚟，Delta橫行，呢個時候就實證見到打咗針點樣可以防埋變種。
講完數據，講下實例。我咁橋有個以前博士班嘅同學宜家響三藩市，打晒兩針，尋日確診Delta。佢一啲都冇埋怨，冇呻「點解打完都中」；相反，佢覺得自己好好彩，因為已經打完針，所以就算中招都好輕微，醫生叫佢響屋企自己隔離兩個禮拜就得。
其實「打完都中」呢個概念，我哋日常生活成日都遇到。你搭小巴，攬咗安全帶，係咪就保證你撞車一定冇事？當然唔係，撞起上嚟，如果嚴重，一樣會受傷，但係就肯定輕好多。咁你會唔會因為見到有一單「有人攬咗安全帶之後撞車都要入院」，就得出「攬安全帶冇用」嘅結論，然後死都唔攬安全帶呢？段估唔會有人咁諗嘢呱⋯⋯
（本網歡迎各界投稿，文章內容為作者個人意見，並不代表本網立場。）