【獨媒報導】港足繼續備戰亞洲盃決賽周，昨晚與塔吉克進行閉門練習賽，最終以1：2落敗。今仗以正選後衛身份上陣的羅梓駿賽後對《獨媒》表示，塔吉克與分組賽對手伊朗、阿聯酋及巴勒斯坦類型相近，認為練習賽有預演之效，更指「自己個狀態都feel到一路提升緊」，希望在決賽周正選上陣。他又形容在阿聯酋是「豪華版集訓」，酒店更特備平時在香港吃得到的米飯，而非中西亞的長米：「最好嘅休息，最好嘅準備，去迎接亞洲盃決賽周。」
足總圖片
盼從友賽中提升狀態爭取正選
現年26歲的「羅梓」一向非鎂光燈下焦點，即使今場正選擔正，但足總提供的比賽照片亦難見其身影。他賽後接受《獨媒》訪問，表示塔吉克與分組賽對手伊朗、阿聯酋及巴勒斯坦類型相近，兼具速度與體力，「我覺得呢場波係好好嘅預演，俾到我哋球隊一個經驗知道同組對手嘅踢法係點」。他又認為雖然今場輸波，但未有影響在決賽周的信心，相信球隊上下都有得著。
常規正選右閘茹子楠因受傷缺陣，主教練安達臣今場起用「羅梓」踢正選兼踢足全場。「羅梓」亦坦言，今場是很好的機會提升自己比賽狀態：「因為始終喺亞洲盃對嘅對手都係類似呢啲中亞嘅對手，所以都係一個好好嘅機會俾我自己提升狀態，去感受吓佢哋嘅速度，同埋都係一個好嘅機會俾我去表現俾教練睇，從而力爭正選位置。」他表示對自己有信心，「因為自己個狀態都feel到一路提升緊」，又指參與決賽周可能是其足球生涯裏唯一一次的機會，很希望能落場表現。
足總圖片
羅梓駿談位置轉變：踢閘都有踢翼感覺
原先於港隊中司職翼鋒的「羅梓」今次以「後衛」身份出現在決選名單上，「羅梓」向《獨媒》表示對位置未有不適應：「始終球會都係踢閘為主，咁就算去到香港隊之前係踢開翼鋒，宜家要變踢閘，咁都唔會話適應唔到。同埋香港隊踢法都係比較進取，去逼搶，所以其實踢閘都係有少少踢翼嘅感覺，所以都冇太大分別。」
他又提及今次集訓中從安達臣身上學會「要直接啲」：「可能喺進攻上面要我哋再進取啲，即係喺逼搶完之後，以往我哋可能比較迂迴。宜家嘅指示，新學習到嘅嘢就係要直接啲，因為喺決賽周對嘅對手係唔同。」
足總圖片
豪華版集訓 酒店特備米飯助適應
港足今次集訓下榻於阿聯酋的高爾夫球俱樂部中，「羅梓」笑言與早前亞洲盃外圍賽泰國集訓感覺相近，「不過係豪華版」，不論食宿還是運動設施上亦見改善：「可以俾我哋好專注喺訓練上，每日嘅生活作息都好定時，即係有訓練，跟住你訓練完可以自己去做gym，所有嘢都可以好定時咁樣，最好嘅休息，最好嘅準備，去迎接亞洲盃決賽周。」
「羅梓」續指阿聯酋天氣清涼，當地比想像中更適合集訓，時差方面已適應得「七七八八」。他更指酒店有為球隊在膳食上作「細心安排」，「去到呢啲西亞，中亞地方，佢嘅米係好長嘅米，即係唔係我哋平時喺香港食開嗰隻米，但係呢度酒店都有幫我哋準備到，每次晏晝夜晚都有呢隻米食」，認為對球員適應有很大幫助。