【獨媒報導】港隊昨晚（1月31日）在省港盃首回合兩球擊敗廣東隊，中場球員陳肇鈞射入世界波。這是陳肇鈞替港隊在亞洲盃決賽周取得零的突破後，再次取得入球。不過，陳肇鈞就指，在對巴勒斯坦輸波、從卡塔爾返港後感到自責、失落，希望為港隊付出更多以彌補遺憾：「我喺亞洲盃返嚟，並唔係開心返嚟，有遺憾⋯⋯有啲壓力、落差⋯⋯喺亞洲盃嗰度，都好怪責自己，可以再做好啲，好似虧欠咗球迷咁樣。」
在省港盃比賽後，陳肇鈞接受一眾傳媒訪問。對於今場再次替港隊取得入球，Philip表示沒有想太多，每場比賽都希望交出表現：「去到邊啲位要埋門，我自己知道要做啲乜嘢。今日嗰球波都有啲好彩，一射埋去就直飛死角。」
資料圖片
亞洲盃返港後感失落 陳肇鈞自責「可以再做好啲」
不過，陳肇鈞就表示要調整一下心理，指自從卡塔爾返港後，感到有點失落。他解釋：「喺亞洲盃嗰度，都好怪責自己，可以再做好啲，好似虧欠咗球迷咁樣。」另外，陳肇鈞早前為大埔在港超聯賽事中後備上陣：「嗯，都睇到自己原來仲好OK，只不過個腦要調整返，都要俾返一樣咁嘅力度。」
陳肇鈞表示，在亞洲盃入球不止是成就，更成為自己要為港隊付出更多的動力：「當然亞洲盃曝光率係好強，第1,000球，同埋唯一，唔係香港隊⋯⋯中國隊都入唔到波⋯⋯係唯一一個華人入到波。嗰個壓力喺我度，我要迫自己再做多啲，多啲代表性嘅嘢。」
訪問期間一度幾乎哽咽 陳肇鈞：球迷盲目撐係福份
向來是性情中人的陳肇鈞，在接受訪問期間，更幾乎說到哽咽。Philip 表示，今場能夠取得入球固然開心，但更高興是交出好表現、好賽果：「好多球迷⋯⋯我知道好撐亞運嗰班，好撐香港隊⋯⋯有好多無去卡塔爾都有出嚟，呢度可以⋯⋯低咗上返去。」
在對阿聯酋的賽事中， 陳肇鈞替港隊射入今屆亞洲盃唯一一球，這不但是港隊在亞洲盃歷來的第10個入球，亦是亞洲盃決賽週第1,000個入球。在分組賽最後一場賽事，港隊三球不敵巴勒斯坦，無緣晉級淘汰賽，Philip 指一眾隊友均感到不舒服，自己亦有機會做得更好：「見到球迷咁撐我哋，佢哋係盲目咁撐我哋，係一種福份嚟。」
最後，陳肇鈞指從港隊青年隊到大港腳：「永遠喺香港隊入波，無論喺咩比賽，由青年隊到宜家，都係一種榮幸，都係一個榮譽嚟。」
記者：麥馬高、劉苑嫻
攝影：周頌謙