【獨媒報導】港足在亞洲盃首仗不敵阿聯酋，陳肇鈞一度替港隊追成平手，這個入球是亞洲盃決賽周第1,000個入球，可說是意義重大。在主教練安達臣麾下，陳肇鈞已成為港隊常規正選。不過，在一年多前，陳肇鈞曾經有半年時間無班落，他在今仗賽後接受香港傳媒訪問，便談到曾想過是否要放棄職業足球，最終都選擇堅持走下去：「從來每個人都唔可以放棄自己。邊個都可以放棄，但你自己唔可以放棄你自己。」
《獨媒》記者麥馬高、周頌謙 卡塔爾直擊
在港隊今場三個失球中，兩球都是輸十二碼，唯一「慶幸」的是陳肇鈞，取得港隊今屆亞洲盃決賽周首個入球，這亦是亞洲盃決賽周第1,000個入球。無獨有偶，在1956年首屆亞洲盃，射入決賽週史上首個入球的都是港隊球員，他的名字叫區志賢，港隊在該屆賽事更贏得季軍。在68年後，香港球員再次名留青史。
今場比賽後，陳肇鈞便先接受亞洲足協的官方訪問，再接受香港傳媒訪問。
球證判決惹爭議 陳肇鈞稱「向前諗方法晉級」
對於陳肇鈞來說，今場賽事可說是五味雜陳。他指攻入第1,000球固然值得慶祝，但對今場賽果不高興，失望的是球證判決、防守不集中，便遭對手阿聯酋反超前：「我覺得扳平嗰一刻，係有機會攞到分嘅，我哋期望攞到分，等之後嗰兩場波可以易踢啲。你見到我哋部分球賽可以進攻到，呢樣係成功嘅嘢。」
球證今場的判決同惹來爭議，陳肇鈞認為不必再多講，因為球證是比賽一部分：「足球就係咁樣樣喺場上我都好嬲，真係好唔明白佢嗰個制度係點樣。」亞洲足協在決賽周開始前，曾向各隊球員舉辦工作坊講述新賽制。說到這，Philip 仍顯到有怒氣，「完全睇唔到，完全反映唔到」：「不過唔緊要啦，我哋唔會逗留喺呢個位，我哋都係向前諗方法晉級，俾球迷睇到我哋好嘅一面。」
入球歸功自己 陳肇鈞嘆「呢幾年喺香港踢波唔容易」
現年31歲的陳肇鈞自2011/12年球季出道，13年間曾效力9支球隊，在2021/22年球季約滿傑志後，有半年時間無班落，休息半季後在去年1月加盟晉峰。心水清的球迷，應會記得「足總職員」事件。有足總職員前年在社交網站的帖文留言侮辱球員，點名指責陳肇鈞，「兩次出到國際賽都係災難級，唔好啦」。
然而，在安達臣執教的港隊下，陳肇鈞備受對方重用，是球隊的中場擔當。Philip 指，安達臣知道自己的優點，所以必定盡力配合：「佢會知道我去到咩位做到啲乜嘢，我希望一路都可以提供到我嘅服務俾佢。」
父親是前冠軍練馬師陳柏鴻，球迷都愛暱稱陳肇鈞做「少爺仔」，他亦從不掩飾其真性情。記者在賽後便問陳肇鈞，今場的入球要歸功於誰？陳肇鈞就當仁不讓：「當然要歸功於自己！」有記者笑說：「估到你咁講啦！」陳肇鈞解釋，香港球員在過去數年來過得不容易：「第一個歸功係我自己啦⋯⋯大家都知呢幾年喺香港踢波唔容易。超級難！話俾你聽！簡直係捱打，每一日都係。」
曾被質疑不適合迫搶 陳肇鈞：為咗香港隊龍門都照踢
在前年約滿傑志後，陳肇鈞曾有半年時間無班落，外界認為其職業球員生涯或要告終。Philip 強調，從沒有懷疑自己：「就算我唞半年又好咩都好，我都照樣出返嚟，照樣咁樣踢。」
「我從來都無停過，繼續一路去。或者當中可能有諗過繼唔繼續⋯⋯但都無！繼續去到喺亞洲盃度入到波。呢個係每個人都應該有嘅鬥志，從來每個人都唔可以放棄自己。邊個都可以放棄，但你自己唔可以放棄你自己。」
「少爺仔」，早已成為有經歷的人。
至於曾被質疑不適合迫搶的踢法，陳肇鈞則指出，球員的基本原則就是執行教練戰術：「如果佢要我踢左閘，話我出個波好好，我都要咁樣做。嗯，再講為咗香港隊，你要我去打龍，我都會去打龍，無乜所謂。」
盼對所有對手均可製造威脅 拒只縮後「等人嚟攻」
Philip 又認為球員不能只有一個長處，如真的只有一個長處，亦要自我發掘更多：「無停過步！我一路都係諗吓點樣進步。就算宜家31歲，都係諗緊自己有咩缺點，唔係諗自己有咩優點。」
首次在亞洲足球最高殿堂登場，陳肇鈞最希望證明，香港是有力挑戰亞洲任何一個國家，尤其不論對手排名較港隊高，亦能向對方製造威脅：「我哋一樣咁去迫，一樣咁去埋門，希望嚟緊呢一代，或者下一代都係會往呢個方向去行，去威脅到對手、同對方撼過，唔係縮喺後面等人嚟攻。」
感謝遠征球迷 陳肇鈞：大家都知香港人請假幾咁難
而在整場賽事中，從香港遠征到卡塔爾的球迷，都沒有放棄為港隊打氣，與球員一樣作戰到最一刻。
每當聽到球迷呼喚自己的名字時，陳肇鈞都十分感動：「佢哋咁遠嚟到！八個幾鐘頭機，仲要請咁多假，大家都知香港人請假幾咁難！無話嗌我個名啦，嗌我哋任何一個人嘅名，我都feel 到嗰種感動、開心，希望佢哋可以同我哋有幾遠行幾遠！」
《獨媒》亞洲盃採訪開支由逾130名熱心讀者贊助，波事春秋 冠名贊助 ⚽️🇭🇰，以及 Footstop 買波飛 贊助