【獨媒報導】屠俊翹，27歲，職業足球員，球迷都叫他「翹叔」。他出道十一年五度遇上散班，前季效力港超聯愉園，又遇上欠薪自降；去季轉投港會，為幫補收入，在疫情下兼職做運輸送貨，又做過演唱會和銀行保安，「踢職業有無後悔？能夠為咗夢想狂奔係無悔。宜家可能係送貨，但我真正身份始終係守門員。」
足球是職業，職業應有收入，但職業足球員在香港不是穩定的職業。在六年前踢飛馬的時候，屠俊翹已開始返兼職，他去亞博做演唱會保安，笑言寓工作於娛樂，直至2020年疫情爆發才暫停。
屠俊翹是睇《球迷世界》長大的，但家人常常看賽馬，他小時候其他是想成為騎師。後來一家由紅磡搬到粉嶺，踢足球成為唯一嗜好，哥哥喚他一起踢校隊，便由小二踢到今天。
深水埗出道 跟李志堅出身但非「堅家軍」
香港球壇近年有「堅家軍」，李志堅曾任教深水埗、橫濱FC、大埔和東方龍獅等球隊，一班子弟兵多年跟隨門下。說來話長，屠俊翹都是跟李志堅出身的。
首次做守門員，是小四學界踢北區，小六參加麥當勞足球計劃，屠俊翹到11歲才開始接受較正規的訓練。有一次教練問邊個想「守龍門」，眼見無人舉手，他想了想便舉手，由於球隊得一個龍門，便即時入選。後來加入北區U12 青年隊，球隊的「上線」原來是傑志。
就是這樣，屠俊翹獲得跟隨傑志訓練的機會，「嗰時覺得只要繼續踢，就會有階梯踢上去。」但傑志一年後只搞U20，16歲的屠俊翹被迫離開，去了大埔跟陳家麒練習。翌年追隨對方一起加盟甲組深水埗，2011年的他由「𡃁仔」踢預備組做起，另一邊也由董之英轉校荃灣遵理，可說是真正跟起李志堅來。
深水埗在該季降班，李志堅翌年拉隊過檔橫濱FC（香港），叫埋屠俊翹。不過，屠俊翹有這樣的說法：「我唔算係堅家軍，人哋11、12歲就跟佢，我呢啲只係半途出家。」
做𡃁仔月薪僅四位數 屠俊翹：成功之前不應埋怨
讀書唔叻，但有波踢，又搵到錢，屠俊翹沒有拒絕的理由。雖然每月人工只有5,000元，但總算叫檻了隻腳入行吧。加盟橫濱FC（香港），屠俊翹最深感受是「職業足球唔係簡單」。球隊在季前到橫濱集訓兩星期，這對一名初出茅廬的年輕球員來說，更是大開眼界，他至今仍酷愛日本足球。
球隊第三季易名YFC澳滌，李志堅和日本贊助商意見分歧，最後「拆夥」，結局是散班。屠俊翹向另一港超球隊「夢想駿其」叩門，梁志榮說可以，人工是6,000元。屠俊翹認為，食得鹹魚抵得渴，在成功之前不應埋怨，「你要收高人工，你都要問下自己值唔值呢個價先。」
駿其一季後又唔搞，這是他第三次遇上同類事情。幸好，球隊總監朱偉霖很照顧手足，喚屠俊翹、黎洛賢、蕭俊銘、鍾偉強和梁國威等一起轉會飛馬。
屠俊翹還記得，那年暑假去了加拿大探望已移民的兄長。朱偉霖打電話問他，是否可以，屠俊翹當時心想，「都冇球會㗎啦，唯有繼續行囉。」
「香港唔似人哋日本踢波有最低工資，自然要由低做起，因為呢個行業無嘢保障你。但係咪就代表唔做呢件事呀？唔係下下都講錢，哦咁你做差佬囉，入職就三萬幾蚊。」
政府工、紀律部隊唔考慮 千迴百轉只求守好龍
「你有無諗過考紀律部隊？」記者不禁問道。屠俊翹性格爽快，是一句到尾的那些人，今次的答案亦沒轉彎抹角。「無，我一直都無諗過做政府工，無諗過考紀律部隊，因為做政府工唔係我理想做嘅嘢，好悶，人生就會不斷重複，好刻板，講得難聽啲就係戇鳩鳩咁。」
千迴百轉，為的不但是守龍門，更要對外界證明自己是稱職的守門員。2016年簽約飛馬，人工終於剛剛好有五位數。屠俊翹以為時來運到，但卻是事與願違一點都不開心，「根本都唔似一隊波，個個都只係為自己，唔會覺得係好齊心一齊做一件事囉。」
在飛馬下半季連後備都不是，預備組亦無份，後來更受傷，機會近乎零，每日只是齋操。那陣時的屠俊翹學會，球圈有不同「規矩」，「有啲教練用開嗰啲球員就嗰啲球員。」
屠俊翹效力夢想FC時期
夢想FC首成常規正選 西班牙跟操迫自己成長
在飛馬僅留了一季便轉會夢想FC，飛馬其實加了他1,000蚊。屠俊翹揀了轉會，一來夢想FC待遇好飛馬一大截，人工翻了一翻，二來也想轉一下環境。夢想FC和飛馬相反，一班職球員打成一片，「翹叔」第二季更有一定上場機會，屬常規正選。
季尾再次傳來惡耗，屠俊翹獲悉夢想有機會散班，在經紀安排下2019年6月到西班牙雷加利斯跟操。「反正年年都要搵，點解唔試啲新嘢？」
在出發前，屠俊翹拍心口對經紀說，希望環境能迫自己成長。在馬德里的一個月，講英文無人識，他努力學了一點點西班牙文。每日操練時撲救100至200球，「翹叔」笑言，這較香港每日50至60球已叫「開大」相距甚遠。雷加利斯的教練又特登考他身手，在訓練後為他送上額外20球射門。
有時候，機會就在一瞬間。雷加利斯曾向「翹叔」開出合約，條件是要為球隊帶來贊助商，「你可能好驚訝，但外國好平常。香港球隊就係抌錢，人哋外國就要可持續。」屠俊翹未能做到，但這一課令他感受到，職業足球商業化的重要。
在返香港前，屠俊翹原本有機會去意大利一趟，雷加利斯打算帶他去參與季前比賽，但他在練習中遭足球省中眼受傷，更一度看不清事物，最終被迫先行回港。
屠俊翹曾落戶愉園，但最終欠薪收場
疫情休季做銀行保安 「香港地一定要周身刀」
關關難過關關過，在遠赴西班牙前，愉園董事林燦彬已邀請屠俊翹加盟，返港後落戶快活谷屬理所當然。在愉園終於成為一號龍門，這是「翹叔」夢寐以求的事，但又遇上新冠疫情，球隊後來由遲出糧變拖糧。
在休季期間，屠俊翹跑去了做銀行保安，「有咩問題？至少有收入，坐下又唔影響身體狀況。」窮則變變則通，一般人認為是馬死落地行，屠俊翹則認為香港地一定要周身刀，才能生存下去。在每日上班前，屠俊翹早上4點便去練習、跑步，先做好運動員的正經事。
「愉園仲差緊我六位數糧。成班球員去勞資審裁處，個官都唔幫你，香港仲有得救咩？佢話我哋遲出7日就應該要反映，點解成大半年先做呢件事？講真，如果佢可以講粗口，佢即係想話我哋戇鳩啦。」
說到愉園欠薪，屠俊翹有點勞氣，在他眼中足球不比其他職業，加上當時轉會窗已完結，如果和愉園鬧翻，不但無得踢亦無法轉會，「你知啦，香港球圈有幾大啫？但我唔後悔㗎，條路自己揀嘅。食得鹹魚係要抵得渴，但唔代表要渴死吧。」
愉園自降收場後，友人介紹他去標準流浪跟操，之後參加郭嘉諾安排的失業球員訓練，獲港會教練相中，總算叫有著落。數月下來，正選上陣的機會不多，港會主教練東尼咸美頓對屠俊翹有點意見，在對標準流浪的賽事中，更「不滿」他向對方守門員梁興傑「教路」；他一笑置之，選擇繼續做好自己。
自嘲應對散班經驗豐富 見步行步路駁路
第五波疫情下，球場關閉，聯賽腰斬，球員轉行不再是新聞。屠俊翹幾乎全職送貨，剩餘時間則教波，「我OK呀，只要有人搵，我都會踢落去。香港地肯做，餓唔死。」
出道十一年，五度遇上散班。港會來季亦去向未明，「翹叔」自嘲有豐富的應對經驗，已較其他球員睇得開，「香港足球好多隊波都無乜歷史背景，今日喺度第日就可以唔喺度，唯有搵下一個機會，香港足球就係咁。」
屠俊翹多年來足球路上，見步行步，人生如是，「啲路行完一段，就會駁到出嚟。」「大環境可能唔係幾好，但唔會咁易認命，咁已經對得住自己啦。」這不是賣慘的故事，這是自強不息的故事。
記者：麥馬高、周頌謙