【獨媒報導】新一季港超聯周五（21日）晚於旺角大球場上演揭幕戰，在3,329人入場見證下，新升班的至尊沙田以3：1爆冷反勝東方。班主兼球員王至尊今仗未有上陣，不過他賽後坦言「好開心」：「踢波就係為咗呢啲moment。雖然係第一場，仲有好多場要踢，但我哋開幕戰喺旺角場算爆冷啦，話俾大家聽香港足球都係可以做到啲嘢出嚟。」
林嘉緯復出任正選
東方今場由高俊把關，6名外援包括柏拉達、高華、大久保優、羅倫素、阿朗素及馬高斯，配合羅振庭、李俊霆、林衍廷及隊長梁冠聰。至尊沙田同樣用盡6名外援，包括澳門守門員何文輝、占士史葛、龜谷宇護、馬利安奴、祖迪艾法及安沙。羅梓駿擔任隊長，41歲的林嘉緯亦復出正選登場，配合鄭進泓、梁立天及趙正宇。班主兼球員王至尊則先列後備。
東方先開紀錄 至尊沙田半場前扳平
上半場東方較主動，多次於邊路傳中製造險象。8分鐘，至尊沙田祖迪艾法接應角球二傳，被高俊快一步沒收，為至尊沙田首個攻勢。14分鐘，何文輝出迎撲跌大久保優，球證劉晃熙直指十二碼點，大久保優自行操刀，射入領先1：0。至尊沙田之後一度反壓東方，不過多次傳中均被主隊一一化解。44分鐘，祖迪艾法禁區施射，皮球門前彈地收死高俊，扳平1：1，他更跑向後備席與王至尊相擁慶祝。
至尊反超前掀高潮
下半場53分鐘，至尊沙田一輪猛攻，占士史葛壓入禁區施射先被高俊擋出，龜谷宇護截得皮球拗腰再射又被擋出，最後由占士史葛門前撞入，為至尊沙田反先2：1。63分鐘，梁振邦後備入替梁冠聰，為第179次於港超聯上陣，打破葉鴻輝紀錄，成為港超上陣最多次數的球員。68分鐘，後備入替的馬文爆開龍梓軒傳地波，另一後備兵林學曦門前剷入，為至尊沙田拉開到3：1，有球迷更高呼：「We want Jim !」東方之後大軍壓境，但無功而還。87分鐘，至尊沙田動用最後一個換人名額，以林樂賢入替梁立天，意味王至尊今仗出場無望，有球迷即笑指：「回水！回水！」至尊沙田維持比數至完場，升超首場即全取3分。
貝鈞奇主持開球禮現噓聲
今日入場人數為3,329人，鄭進泓獲選為賽事最佳球員。港隊主教練盧比度、標準流浪榮譽顧問李輝立、歌手JW 王灝兒及饒舌歌手Novel Fergus均為座上客。在熱身時，至尊沙田班主兼球員王至尊已成為焦點，有球迷向他歡呼，他揮手致謝，亦有球迷向他索取簽名。中國香港足總會長貝鈞奇及副主席徐英偉等人主持開球禮，惟貝鈞奇出場時，有球迷發出噓聲。
王至尊：踢波就係為咗呢啲moment
班主兼球員王至尊賽後坦言：「好開心，踢波就係為咗呢啲moment。雖然係第一場，仲有好多場要踢，但我哋開幕戰喺旺角場算爆冷啦，話俾大家聽香港足球都係可以做到啲嘢出嚟。」被問到未能上場是否美中不足，王至尊就不認同：「我覺得隊波贏波最重要，成績係第一，團隊係第一。成季流流長，一定有機會出賽。」他指對球迷渴望他出場感到受寵若驚，又笑言只要加入成為會員，就可見到他踢波，「我覺得我自己隨時ready㗎啦，但都係聽教練講。大家話『老細足球』，我宜家就話俾你聽，我都係無得出場。」
對於有媒體預計至尊沙田將於積分榜包尾，王至尊亦「隔空反擊」：「幾個媒體話我哋係包尾、充數隊、板凳唔夠深度，我哋第一場就贏咗上季第四，即係話俾大家聽足球呢家嘢，只要肯跑肯熱血，冇嘢冇可能。」被問到首場勝仗是否較預期快，王至尊果斷否認：「如果咁多年都追逐我哋嘅故事，我哋去到呢個位置其實冇嘢輸。今日唔可以話無諗過，真係好開心。」他重申自己只是一般人，希望透過經歷向大家說出「屬於至尊沙田、屬於香港嘅故事」。
郭嘉諾：表現超出預期
至尊沙田主教練郭嘉諾賽後讚揚球員表現超出預期，稱「最緊要第一場開得好」，但指今日只是勝出第一場，直言：「又唔係贏咗咗冠軍，咁開個好頭，下場就對理文，可能隨時啲嘢就跌晒落嚟，所以好小心我哋繼續stay humble。」他提及草地的草較長，一開始雙方皆未能適應，即使有港超經驗的羅梓駿與林嘉緯亦需時適應，又談到先失球：「嗰個十二碼真係個草場啜住咗個波，出迎時間真係差少少。」
郭嘉諾強調「條路都好漫長，都只係第一場」：「我哋同護級仲差好遠，我哋總之一句護級同俾啲年青球員踢」，並點名讚揚小將梁立天及趙正宇表現出色，盼往後有更多年青球員出正選。《獨媒》問到半場休息時，如何鼓勵球員。郭嘉諾就笑言：「我覺得我哋場波贏得到，正常就係咁講，哈哈！」
林嘉緯踢足全場：體能未達最佳、靠經驗搭救
被問到年屆41歲，相隔兩年在港超聯賽場復出，兼踢足90分鐘。林嘉緯在賽後形容「爽」。不過，他坦言沒有想過要為至尊沙田踢足全場，體能上仍未達最佳狀態，自言靠經驗搭救。
林嘉緯指隊友「好肯跑」，自己在過程中亦很集中，但不諱言在上半場初段尚未入局，在慢慢調整後感覺較預期好：「始終之前踢開甲組、乙組，有2、3秒時間俾你諗，開頭都要啲時間入局，所以有啲甩漏。」他又表示，今場體能上的感覺較預期好，因為早已預期開季的賽事不會容易，早前已作好準備。
此外，林嘉緯認為今場的比分是催化劑，當看到球隊反勝的時候，已忘記了疲倦的感覺，「咁就捱到落去」：「體能方面滿意，但整體表現有少少失望。」
談到今場的部署，林嘉緯重申一直提醒隊友在比賽初段避免失球，惟最終亦在15分鐘遭對手攻入一球，「對於升班馬嚟講係好難處理嘅情況」。林嘉緯讚賞東方今場用波十分好，認為球隊今場反勝有點運氣成份，欣賞球隊在先失一球後未有氣餒。對於最終反勝，他承認球隊實力上仍有差距，所以必須把握對手失誤，在反擊中爭取入球：「都要讚成班球員，好有紀律做呢樣嘢。」
被問到林學曦今場亦取得入球，林嘉緯認為證明了老將的價值，笑言「一場波不能擺3、4個老將」，但老將的閱讀球賽能力較佳，只要在適當位置出現便能協助球隊，認為至尊沙田贏波是合理。