【獨媒報導】港超聯賽會盃在元旦日上演季軍戰，標準流浪以3:0擊敗東方。千呼萬喚始出來！ 34歲的歐陽耀冲今場正選上陣，這是他外流三年後即自2020年3月以來，首次在正式賽事比賽中上場。「歐冲」更射入十二碼，替流浪先拔頭籌，賽後更獲逾百名球迷包圍要求合照、簽名。對於在日本期間遭冷言冷語，今場則每逢觸球都有球迷歡呼，反差似乎很大。「歐冲」認為「實有人支持，同埋唔支持」：「唔支持嘅多數網上留言，上場無出現，但成場咁嗌我個名，我知道支持我嘅球迷係會入場，我自己都好感動。」
歐陽耀冲出場獲掌聲鼓勵 東方繼續青春班
流浪今場由盧兆崎把關，外援金旻奎、林遼太、盧美菲亞及神田夢實都正選出場，17歲的趙正宇同在11人名單。歐陽耀冲在上周四賽事中未有上場，今場則一如所料，獲得正選機會出任右翼，神田夢實則移入中路。「歐冲」在出場的時候，就獲得球迷的掌聲鼓勵。
東方則繼續青春班，球員名單共有17名U22球員，球員平均年齡19.4歲，正選球員平均年齡22.3歲，後備包括年僅14歲的黃安游。兩名特邀球員巴拉克正選上陣，于揚就先任後備。
操刀十二碼勁射入網 歐陽耀冲指向天道酬勤紋身
上半場13分鐘，盧美菲亞頭球攻門，東方門將麥珈菕勉強拍出。15分鐘，林千裕撞跌神田夢實，球證黃偉倫直指十二碼，「歐冲」操刀勁射入網，替流浪先開紀錄，領先1:0。他在入球後跑向場邊慶祝，拉起波褲指著其右腳大腿「天道酬勤」的紋身。
28分鐘，「歐冲」頭也不回地分予右路的盧均宜，後者出波到遠柱，盧美菲亞門前撞入，流浪再下一城2:0。43分鐘，東方右路角球攻勢，黃浩然頂中楣。
下半場換邊後，戰情變化不大，「歐冲」改任左翼，在62分鐘遭巴拉克侵犯倒地，及後換出由梁凱俊入替。71分鐘，2009年出生的黃安游亦後備上場，換出丹尼爾。87分鐘，陳耀祖斜傳，梁凱俊接應轉身，左腳一射入網，標準流浪最終大勝東方3:0。
重返旺角場「回憶出晒嚟」 歐陽耀冲：我知道好多球迷好想睇我踢波
歐陽耀冲今場以特邀球員身份，在今次的香港超級聯賽會盃賽事為流浪比賽。「歐冲」在賽後表示，能協助流浪取勝感到高興，「新一年開咗個靚頭」：「好耐無返香港踢波，旺角場都算係我主場，以前細個喺度踢咗無數嘅比賽，所以啲回憶出晒嚟。」
「歐冲」今場僅上場63分鐘，但稱比賽能令自己重拾信心，不過由於太久沒有比賽，所以肌肉感到不適應：「希望如果之後再有機會，比賽俾大家睇，再做好啲。」他表示返港後只練習了數課，相信如有充足狀態，表現會更好。
被問到是否會重返本地球壇，「歐冲」稱「未傾」，今次為球迷而踢：「好老實講，今次嘅比賽大部分為咗球迷先踢，因為我同流浪係無簽過任何嘢，如果要受傷自己負責，無人會理我。但我知道好多球迷好想睇我踢波，我自己都好想落場，所以一定要喺呢個機會出場俾大家睇到。今日好彩自己發揮都OK呀，入到球波，希望有交代。」
歐陽耀冲：日本經驗好寶貴 冷言冷語的人不會經歷到
記者問歐陽耀冲，有球迷揶揄其在日本只是「煮嘢食」、「做agent」，今場入球是否有一吐烏氣的感覺。「歐冲」表示沒有，而且不會理會別人的閒言閒語：「好老實講，日本嘅水平去到邊大家知。我作為第一個香港球員去到日本職業踢，我經歷嘅嘢⋯⋯，我相信冷言冷語嗰啲人一定唔會經歷到，我自己呢個經驗對我嚟講好寶貴，對我之後比賽，好似今日嘅比賽都好大得益。」
另外，歐陽耀冲亦指日本比賽節奏較香港快很多：「好老實講，我返咗嚟都無咩點練過，唔好話踢唔踢到，我表現都OK。但我覺得如果我喺日本，我唔會有呢個情況出現，所以個差距真係好大。」「歐冲」笑言，歡迎任何球隊找他，並對球迷的支持感到鼓舞：「作為運動員，咁多球迷支持，已經唔係錢唔錢嘅問題，嗰種嘅感覺係有錢都買唔到。」
有記者追問是否未接獲本地球隊的合約，歐陽耀冲再三表示沒有，更自嘲稱：「因為我太耐無比賽，你都唔會同我傾啦係咪，經過今日可能會好啲，原來仲行得嘅、踢得嘅。」
記者：麥馬高、周頌謙