【獨媒報導】前港足代表成員卓耀國，過去兩年先後涉及刑事毁壞，感化令期間驗出含大麻而入獄，再捲入襲擊導致身體傷害罪。卓耀國今季加盟丙組球隊駿達重新出發，已成為球隊神射手，他接受《獨媒》訪問表示，出獄後曾感到「抬唔起頭」、「好醜」，自言已洗心革面，不再辜負親友，包括年邁的祖父母：「都就嚟三十歲，以往『壞孩子』，宜家做返個人，要面對返之前自己做錯過嘅嘢。」
駿達周日（21日）晚上在跑馬地遊樂場迎戰福建，兩支球隊均力爭來季升班乙組。28歲的卓耀國今場正選上陣，他更梅開二度，協助球隊3:2擊敗對手，保持升班希望。
朝九晚六辦公室工作 卓耀國的第一次正式返工
卓耀國在賽後接受《獨媒》訪問，談到其近況。他去年在庭上求情指，當時在地盤工作，早前在前隊友介紹下現職市場營銷，每天朝九晚六返辦公室工作，收入穩定。「我國」苦笑說，「終於知道咩叫攰」，夜生活現時已少之又少。
不過，卓耀國坦言初時不太習慣：「始終第一次正式返工，以往做足球員，都唔會接觸過其他工作。知道宜家要返工，知道原來係咁樣，要過有規律嘅生活。」
昔日從沒想「之後」 卓耀國：我覺得唔應該係咁樣
「卓耀國永遠都存在」，這是香港足球近年的一句戲言。球員成名太早，容易迷失自我，本地球壇亦屢見不鮮。在過去兩年來，卓耀國三度罪成兩度入獄，從刑事毁壞、違反感化令，到襲擊導致身體傷害，裁判官叮囑他要洗心革面，不然便在法庭再見。
接近一年過去，卓耀國自言已變得低調，他有一段日子甚至不想見人：「見返以前啲隊友、其他人，有啲陌生但又好熟悉。」
「以往覺得自己後生，覺得踢波，我都唔會諗之後，經歷咗⋯⋯兩次坐監，知道機會真係唔係必然。以往成日都話珍惜，但係宜家真係知道咩係機會，真係錯失咗。好老實講，覺得自己真係嘥咗。嗯，我覺得唔應該係咁樣。」
感謝羅國豪給予機會 出獄後感抬唔起頭、好醜
駿達由羅國豪任主教練，羅國豪曾任港超聯球隊流浪教練，現為理文教練，多年來桃李滿門，更可說是「睇住卓耀國大」。卓耀國就感謝對方給予機會，能與一班昔日英華的同學繼續踢波：「我第一句有問⋯⋯佢哋會唔會介意？佢哋話邊個無過失啫，我都好多謝佢哋容許我喺度，俾空間我發揮，同接受返我呢個人。」
「都想同所有人講聲Sorry 同Thank you，令到俾機會我嘅教練、隊友佢哋失望，真係Sorry。」卓耀國主動提到，在出獄後感到「抬唔起頭」及無比頹廢：「嗯，因為覺得好醜，同埋驚人哋唔會接受我。」他有感而發，當下最重要是「做返一個人」，球場上的表現已是其次。
分享獄中感受 卓耀國：原來我要經歷到咁樣
卓耀國希望，球迷能原諒自己多一次，在街上、球場內看到他仍願意打聲招呼，「或者係奢望，但我會穩定落嚟」：「以前三、四點先瞓覺，踢職業我都唔會理作息時間，因為我覺得自己踢晒，呢一期係咪都會係我㗎啦，宜家正正常常做返個人。」
球迷或許對屢次犯錯的卓耀國有點保留，他則這樣說：「其實係無得我唔去改變，因為錯得太多次，我踢波都無咗⋯⋯同埋入面嘅生活令到我真係⋯⋯。」
卓耀國更分享了在荔枝角收押所囚禁期間的感受，指每日的時間都過得很慢，不折不扣的度日如年，「睇戲、睇電視睇得多，原來我要經歷到咁樣⋯⋯無得唔令到自己去改變，都好多謝你哋（記者）去接受我，我覺得唔係人人接受到呢一樣嘢。我唔可以怪人哋，係因為我真係做錯咗。」
今季改穿95號 卓耀國親自解釋原因
曾經滄海難為水，沒有切膚之痛應該不會明白。卓耀國現時與祖父、祖母居住，他指兩老年紀已不小：「佢哋都80歲，苦口婆心勸過我好多次，俾咗好多次機會我、想我好。我希望我嚟緊都可以做返個正常人，唔想再令人失望，唔想『卓耀國』呢個名係壞嘅嘢。」
「想繼續踢波，始終好鍾意踢波。就算唔係踢職業，都希望可以踢返自己嘅足球。」卓耀國今季在駿達身穿95號球衣，記者追問：「點解唔著7號？」卓耀國終於露出了笑容：「我handle 唔到7號呀，求其號碼一個就可以啦。」
記者：麥馬高、周頌謙