（獨媒報導）荃灣足球會早前遭區議員賴文輝指「hea踢」，及在未獲區議會授權下，以區隊名義出戰丙組聯賽。球隊今日在主場海濱公園球場比賽，獨媒記者到場了解，荃灣足球會總監陳慶榮反擊指，賴文輝的「hea踢」說法對球員非常不公，指球員每人每場只有70元車馬費，「大家都係捱義氣頂硬上，佢啲批評好唔公平，搞到好唔開心。」
荃灣足球會總監陳慶榮
球員每場70蚊車馬費 總監：已同區會冇關係
「原本係連70蚊都無，如果我哋收2,000蚊一場，你就可以詐型。」陳慶榮稱。荃灣足球會今季原本未有報名參加足總賽事，但在限期後決定報名續戰丙組聯賽，目前依賴民政局的40萬元撥款勉強支持。
在前年區議會選舉後，民主派執掌十七區區議會，區隊出現鬧雙胞、拒絕對原來的區隊授權和撥款等情況。荃灣區議會康體藝術文化普及委員會在今月月中開會，通過去信足總及康文署，要求澄清荃灣足球會並非區隊，不應享受區隊待遇。民政處官員當日在會上表示，荃灣足球會為18支區隊之一，更強調區隊的身份是由足總決定。
民政局透過地區體育活動資助計劃，向地區體育會提供撥款資助，荃灣足球會獲40萬元。陳慶榮表示，球隊在今季季初更未有任何車馬費，所有球員均是捱義氣上陣；又指球隊目前已和區議會沒有關係，承認更換標誌正是希望脱離關係。
陳慶榮承認，球隊今季季初成績欠佳，理解「外界見到包尾，係會詐型」，但重申在限米煮限飯的情況下，球員已有所交代。「港超聯南區今季1,500萬元班費，你睇下咩成績？如果要追究睇嚟都應該追究佢哋先。」（編按：南區為港超聯唯一區隊，目前位列聯賽榜第六。）
球員年代效力荃灣、東方和愉園等球會，並曾入選香港足球代表隊，陳慶榮在退休後曾任教另一區隊葵青，近年則在荃灣足球會協助打理球隊。
總監：搞足球不能唔睇過程，只睇成績
陳慶榮對獨媒強調，搞足球不能「唔睇過程，只睇成績」，更反問記者，「請前港超聯球員踢？阿體記哥哥你話得唔得先？」他質疑賴文輝的說法十分離地，「講真，唔通搵美斯同C朗就掂哂？足球係團體運動嚟。」
荃灣足球會近年在低組別賽事浮沉，今年在丙組聯賽成績欠佳，在今場之前，7場比賽僅得1勝1和5負。陳慶榮邊嘆氣邊說，「70蚊一個人，你想佢點？荃灣只係希望球員有得踢波。我哋好唔想理政治，但目前情況係好唔理想。」
在疫情下，今季甲、乙和丙組聯賽不設降班制，陳慶榮表示感到慶幸，承認輸贏相對不重要，只希望能讓年輕球員有上陣機會，「唔好做最尾嗰四隊吧。」陳慶榮表示，球會今場比賽的正選陣容中便有三名U22以下的球員，強調球會給了很多機會予年輕球員。
邱梓俊
荃灣隊長邱梓俊：呢個批評好唔公平
前後踢了荃灣區隊14年，34歲的隊長邱梓俊接受獨媒訪問，他表示：「（荃灣）波一定唔好，但呢個批評好唔公平。」
區議員賴文輝、林錫添和陸靈中曾在季初觀看荃灣足球會的比賽。邱梓俊點名質疑，指賴文輝等人沒有再前來觀戰，未有機會深入了解球隊情況，「個次睇半場就走咗，然後就Facebook出張相話嚟咗睇波。」
「你想搞得透明啲，就應該要嚟了解，唔係每次開會就插。一個好少少嘅球員，一場都要成千蚊車馬費。」邱梓俊重申，荃灣足球會球員的技術可能不太好，但絕不存在hea踢，「我哋肯追肯去，請問點hea法？你有無再嚟睇我哋踢波呢？你冇，然後就每次開會都話我哋俾人大炒、hea踢，咁對球員係好唔公平。」
邱梓俊又認為，賴文輝的建議不可行，指邀請前港超聯球員的作用成疑，認為對年輕球員的實際幫助不大，「寧願青春班踢仲好，呢十幾年有試過搵啲前甲組球員，成績一差佢哋就好易沉。如果後生肯俾心機踢，大家捱義氣，一條心去踢仲好。」
聯賽兩連勝 五球大勝恆華龍城康體
在面對另一丙組球隊「恆華龍城康體」的賽事，荃灣足球會全場不落下風，上半場攻入一球，下半場再入三球，加上對手擺烏龍的情況下，總比數以5:0勝出。這是繼上星期以4:1贏駒騰後，荃灣足球會在丙組聯賽錄得兩連勝。
記者：麥馬高、周頌謙