（獨媒特約報導）大埔區議會今續議來屆地區足球隊安排，會上最終通過援權柏禧體育會為新區隊，以大埔名義出戰來屆丙組聯賽。有區議員質疑民政事務局，重新授權後會否繼續資助已被取消授權的大埔足球隊。民政專員陳巧敏「漏口風」，指民政局正審視相關政策，不排除同時資助同區兩支球隊，引起區議員狂轟，「咁仲傾咩啫，你哋自己都決定好晒啦！」
柏禧體育會欲申請代表大埔出賽
大埔區議會於7月7日已通過收回大埔足球隊的地區授權，不得再代表區議會及大埔參與香港足球總會旗下賽事。大埔區議員胡耀昌於今日會上，提出續討論來屆地區足球隊安排，並邀請柏禧體育會（柏禧）創辦人兼晉峰總教練何信賢出席會議簡介計劃。
何信賢表示於7月透過新聞獲悉大埔足球隊被褫奪地區授權，遂向胡耀昌查詢申請代表大埔區的方法，希望以大埔名義出戰來屆丙組聯賽。他強調希望將個人以至球會培育青訓的理念，在大埔區發展，並普及足球運動。
民政事務專員陳巧敏
民政處稱非區會授權隊伍都可獲資助
胡耀昌則提到大埔足球隊秘書長陳平在7月曾於電台節目上，表示球隊正接洽新贊助商，或能續戰來季港超聯。胡向民政專員查詢，詢問不管今天柏禧能否通過成為新授權的地區球隊，民政事務局會否再資助已被褫奪授權的大埔足球隊。
大埔區民政事務專員陳巧敏起初未有正面回應，僅指大埔足球隊早於7月7日區議會褫奪該隊地區授權前，已向足總申請參加來屆聯賽。陳又「遊花園」指地區球隊有4項指標供民政事務局監察，如議員有意見可幫忙反映。經議員一番追問下，陳巧敏始承認「唔一定係區議會授權的隊伍，先可以向民政（事務局）申撥款」，又「漏口風」指民政局正檢討是否每區只資助一支地區球隊，「到底係唔係只可以一隊呢？我都仲等緊佢哋回覆」。
胡耀昌
區議員狂轟民政有前設 促去信禁資助舊區隊
胡耀昌即狂轟民政專員，「係咪你哋屬意嘅球隊就俾錢，唔使尊重區議會決定？」、「當我哋今日通過（授權柏禧）到，你就即刻話要檢討。兩隊都俾錢，總之最尾大埔足球隊點都會有錢」。胡又批評民政局盲目批准地區球隊的165萬資助撥款，「人地喺入面洗黑錢、打假，你哋都唔睇。咪俾佢哋批死你實批錢，一早同傳媒講定會踢嚟緊港超囉」。
姚躍生亦怒斥民政專員，「咁仲傾咩啫，你哋都決定好哂俾錢邊個」。陳振哲要求主席關永業以大埔區議會名義向民政事務局發信，要求禁止資助大埔足球隊，「唔係問佢攞意見呀，係直接指出佢唔可以咁做」。
區鎮樺
遭質疑只邀柏禧或違程序公義 胡耀昌區鎮樺掀罵戰
另一方面，區鎮樺在會上亦質疑，只邀請柏禧體育會討論來屆地區球隊安排或有違程序公義，「法團都要公開招標啦，咁樣好唔公開透明」。他又稱：「可能有人話我阻住地球轉，但如果我哋好似以前咁做嘢，咁我哋同建制有咩分別？」他重申對個別球隊沒有個人意見，只希望有公平公開的機制。甚少發言的建制派當然議員李耀斌亦「開金口」，批評議員自相矛盾，亂搬龍門，黑箱作業。
姚鈞豪要求區鎮樺清楚指出違反了哪項程序，「你喺咁講程序公義，咁係違反咗邊項？如果我哋依家補返係要招標程序，但以往根本冇，話佢違反咗咁又公平咩？」
胡耀昌亦反駁指，區議會正面對現實的政治問題，「我哋就係要打破建制團體喺民政入面予取予攜，私相授受」。他指「我哋唔可以咁官僚、義正辭嚴咁講啲似是而非嘅嘢」。他強調下個賽季安排的實際問題已擺在眼前，「我哋唔做決定，就要眼白白睇住啲錢落入我哋唔認同嘅團體」。
陳振哲
區鎮樺在胡耀昌發言時發出「哼」一聲，又指駡胡「你講就得，人哋講就唔得」、「我講完又俾你上綱上線」、「我要更好程序又唔得，你依家咪上網同人講『區鎮樺你阻住地球轉呀』。」胡耀昌要求區指出他哪句上綱上線，區又回應「好呀，咁聽返帶囉」。會議氣氛緊張，二人不斷疊聲，陳振哲嘗試調停，指「私底下你哋兩個咩關係我唔知，但議會入面就講返議會嘅嘢。」
區議會最後以9票贊成，11票棄權，通過授權柏禧體育會作為20/21球季代表大埔區的地區球隊，參與足總旗下賽事。
柏禧體育會創辦人兼晉峰總教練何信賢
何信賢對通過授權感興奮：支持年輕人踢港超係我哋理念
柏禧創辦人何信賢會後興奮向記者表示「成立左20幾年，終於有多啲資源」。他指過去柏禧體育會靠晉峰提供資源，例如球衣、場地費等。他強調最重要是讓大埔年輕球員有多個「跳板」，「好似晉峰咁，支持班年輕人踢港超，係我哋嘅理念」，又認為「大埔區好多球練都好有心」，希望他們可以留在區內培育青訓。