（獨媒特約報導）你上一次購票入場看band show，是甚麼時候？
上星期一連兩日的「INDIE IS DEAD?」音樂會為獨立音樂表演場地Hidden Agenda（HA）籌款，應付高昂租金。驟眼看又是一貫的故事情節——九龍東發展，工廈租金急升，獨立音樂被逼遷，音樂人艱苦經營，生存空間不斷萎縮......元凶直指地產霸權。經營6年，HA創辦人之一阿和看到的，不只這樣。
加租與佔領行動
HA起初是賣樂隊產品的品牌，2009年阿和與友人忽發其想搞live house，便立即租下千多呎的band房，成了第一代的HA。之後業主賣盤，HA辦了一場音樂會籌錢搬遷，搬到了第2代，又因業主被地政處控告違反土地用途，要再次搬走。3年前搬到現址永富工業大廈，租金雖然由第2代的$10,000大升至$25,000，但總算捱得住。不過，3年合約剛滿，業主要求加租至$35,000，HA再度遇上難關。
加上3個多月的佔領行動，對HA生意打擊很大，觀眾睇騷意欲大減，很多節目都被取消，每個月HA只餘下4場演出。阿和說，冰島著名樂隊Bang Gang於10月1日的演出，本來預計會賺錢，但結果只有80幾人入場，與預算中的200人相距甚遠，「又蝕」。
HA在生意低潮遇上加租，Ni.ne.mo主音Tedman得知後籌辦是次「籌旗」音樂會，隨即獲獨立音樂圈一呼百應，1日內便完成籌備工作，找到25個單位演出，全部不收報酬，收益全部撥捐HA。阿和說音樂會完全是自發，並非由HA主辦，甚至沒有在HA的Facebook專頁宣傳。他形容，HA與樂隊的關係是「我爭你、你爭我，你還俾我、我又還俾你」，一份不求回報的人情味，在這場音樂會中表露無遺。
過了這關，又如何？
音樂圈義務拔刀相助，觀眾反應熱烈，阿和相信這關能跨過。但是，跨過了，然後呢？由第一代至第三代，HA不是第一次靠「籌旗」渡過難關，「如果我搞到落去，但以後仲要過咁嘅生活，其實我覺得對呢個live house都好唔公平。」經營HA 6年，阿和看到的是本地樂圈根本無力支撐這個小小的場地。
HA位處偏離商業中心的牛頭角工廈，沒有嚴格規矩守則，甚至不一定收場租，「一班人捱義氣，冇收入的騷唔會出糧，難搞的騷會主動幫手」，為了做喜歡的事堅持著。有些人認為「獨立」就等同「冇錢」，必然要「捱窮」，阿和絕不認同，「有一種人覺得indie唔需要收入，只需要大家一齊搞。交唔到租？大家夾錢！下個月搞唔掂，大家又夾錢啦......我覺得呢個唔係叫『獨立』。『獨立』係包括獨立去營運，香港好多人搞『獨立』嘅嘢，就係一班人不斷付出，但我覺得我哋提供服務、表演，係應該有人工。」台灣live house文化成熟，知名獨立音樂場地The Wall不會替知名度低的樂隊辦音樂會，而且場租收費不菲，「唔會因為獨立，價值就平」。
HA經常籌辦外國樂隊演出，這事並不簡單，因為外國樂隊越洋過海，搞手要維持成本，必須以巡迴形式舉辦，要與其他城市協調，台灣、上海、北京、日本等，須認識每一個地方的搞手。阿和經驗豐富，早已建立完整網絡，他說在外國能有如此網絡的人，都能以此維生，「我在馬尼拉的partner成日計賺幾錢，我就喺度諗點樣唔洗蝕，溝通唔到！」
要人「捱」，不是必然，「觀眾、樂隊鍾意呢個地方，理應支持呢度，至少俾呢度出到糧，有個生計，唔可以剝削任何一人的生活」，這是他未來目標，如HA的伙伴繼續是「純粹幫忙」，他寧願「執咗佢」，不想再消耗別人時光，「好多人已經幫咗手好多年」。
冇音樂、冇樂迷，有咩用？
可是，這些年下來，阿和對香港音樂圈已失去信心，「近年音樂圈睇落去好似百花齊放，其實只係上面嗰浸百花齊放，indie都係冇乜起色」，「可能好多樂隊出騷、搞騷，佢哋出碟嗰日咪多人，過咗咪又係冇人睇，好唔健康。」他覺得，撐了6年，已完成了一個使命，「場地喺度冇用，成個氣氛唔得，大家純粹當睇騷係娛樂，音樂唔係生活一部份，十年、廿年、三十年都係咁，其實我覺得冇咩用」。
要吸引觀眾入場，也極不容易，「要用好多腦、搞gimmick」，製作精美海報，甚至連門票也要花心思設計。今個月HA舉辦美國音樂人Tycho的演出，門票附上精緻的膠片可作收藏，「人地（其他城市的演出）張飛一張白紙幾隻字」。阿和坦言「不甘要做到咁樣」，喜歡音樂的人應該自然會來，不用推銷，「音樂唔應該係咁」，「live house靠音樂先可以生存，冇觀眾、冇樂隊，我哋就生存唔到，唔係話我有錢就可以維持落去」。
倒模教育制度下的產物
香港音樂生態的問題，阿和歸咎於教育制度。他指現行制度下，大家學的東西一樣，只重視古典音樂，扼殺了發揮空間。他說，諷刺的是，連北京都有幾間音樂學院，號稱較自由開放的香港卻缺乏音樂教育，「香港政府一路唔想呢樣嘢發達，就係唔想你識咁多嘢，外國好多出名band係鬧政府鬧到九彩」。
在經濟效益至上的香港，很多人學音樂只為考取證書裝飾履歷，真心想玩音樂的，在這樣的教育制度、政經結構下，面對重重壓力，沒有發展空間，被冠上「搵唔到食」的罪名，多少夢想只能以業餘性質默默進行。「觀塘有幾千隊樂隊，又如何？」，阿和說歐洲一些地方可能只得幾百隊樂隊，但當中有百多隊是有名的，香港的樂隊難以比擬。
阿和認為傳媒都有極大責任，內地、外國音樂雜誌寫樂隊，會問關於音樂的尖銳問題，讓讀者認識樂隊，但香港傳媒只談吃喝玩樂、影靚相、著靚衫，渲染「明星」、「rock star」的刻板形象，讓人忘記了音樂的本質。
應該撐，就出嚟撐
縱然悲觀，阿和強調在HA幫忙的人的想法最重要，如果大家想繼續經營，便會繼續。他說，這6年得到自己想要的生活和一班朋友，是最為重要，感受工作團隊「連埋一線」、不用說出口的默契，叫他最有滿足感。訪問中他不斷強調「好驚人俾光環」，HA其實只是在做自己想做的事，說不上是甚麼殿堂、聖地。
那麼，獨立音樂真的無力回天了嗎？阿和這樣回答：「喺好多樂隊心目中就死咗好多年架喇！其實Tedman都覺得indie is dead，唔dead就唔會咁樣啦。或者係一個週期，有起有伏......但我唔想只係得幾個人去捱，成件事點樣先靚？好似佔領行動咁樣，唔係兩條友坐係條街，係一百條友，望落去先精彩！」
宣傳海報上問「Indie is dead?」，一個答案是「Yes - Go fuck yourself」，阿和同意：「如果你覺得indie is dead咪go fuck yourself，但其實好多人話indie is dead，都仲出嚟撐」。所以，你可以選擇另一個答案「No - Come to the show」，「你覺得音樂圈應該撐落去，大家就一齊出嚟撐，就係咁簡單。有私心唔緊要，你要真普選、你要乜乜乜，大家唔同唔緊要，出嚟撐咗先。」
音樂圈的生與死，音樂、觀眾、場地三者缺一不可。作為樂迷，至少選擇就是力量，別再哀悼，讓音樂成為日常。
訪問：劉軒、梁泳儀