呢排吹「本土風」
香港自從雨傘運動後，中國政府堅拒俾香港人真嘅普選權利，「民主回歸」嘅願望宣告破滅，「大中華」一詞似乎喺社會討論入面絕跡，亦出現政治人物紛紛表態支持「本土」議題／使用「本地」標籤嘅趨勢。呢一股「本土風」亦吹到嚟澳門，曾公開聲言「假普選」都可袋住先嘅吳國昌議員，最近都將「城邦」（傳統定義：城市為一個主權國家自治）等本土標籤納入發言中揮舞。
我對澳門本土意識形成持開放態度，雖然我個人抗拒身份建構同社群主義，我只能對「澳門人」身份形成、澳門本土價值形成提供反思嘅問題。
本土訴求並非新鮮
澳門「本土優先」嘅訴求好早已經有人提出，喺政權移交之初，由失業工人示威要求削減外勞，至最近博彩業工會要求以立法方式確保庄荷一定要由本地人擔任、博企外勞管理層要有退場機制令本地人有晉升機會等。喺澳門居民集體利益上面－工作機會優先權嘅訴求一直非常強勁。近年吳國昌參考梁振英提出「港人港地」（現已彈票），提倡填海新城「澳人澳地」，亦為一個共同利益議題。
共同利益之外仲有乜？
香港發展出引以為自豪嘅法治、自由市場等核心價值，咁「澳門人」有咩共同珍惜嘅特質或價值呢？「共同利益」遠未可稱為共同特質或價值。價值係喺社群的精神／行為上體現，並唔係好似中國咁週街貼滿標貼「宣稱」有咩「價值」就可叫價值。如果有人話「法治」係澳門嘅價值，相信唔多人會同意。
我由純粹描述嘅角度，嘗試探究澳門人有咩共同特質／價值：
一）由澳門年青一代普遍由細到大都被期望入公職嘅現象，可以睇到澳門人普遍尋求薪高糧準、人人有得撈嘅安穩生活，相對嘅係唔係好似香港咁鼓勵競爭上遊。有人話，如果存在年青人嘅「澳門夢」，應該就係 「430（高級技術員點數）＋經屋」；
二）澳門係一個非常講人情嘅社會，有人話「識人好過識字」，澳門人普遍重視人際關係，生活／工作上盡量避免產生衝突產生破壞關係。
無論你認同與否，我客觀地觀察到，重視人際關係、非競爭性（人人有得撈）係澳門人共同利益以外嘅特質。而呢啲特質我認為唔可以叫做／成為價值之外，亦唔係好令人自豪嘅 …
共同歷史／環境？
構成本土身份另一元素係共同嘅歷史同埋生活環境，曾幾何時我對澳門啲古蹟好有感情。以前中學時期外出交流時（當澳門仲未「申遺」），當聽到人地話澳門淨得賭場嘅時候，我會立即反駁話澳門嘅燈塔、大炮台、教堂有好耐歷史㗎。但後來有較多機會外出旅遊睇多少少之後，開始發覺澳門有特色嘅建築其實真係少之又少。澳門旅遊局可能影相影到好靚，但身處澳門世遺城區已冇乜歷史感覺。令我反思，啲古蹟係咪單純由細對到大有感情？定係好有啲咩獨特嘅價值？
香港有英國統治嘅光輝時期值得懷愐，但葡國統治時期嘅澳門政府，難有事可以懷愐。1999年政權移交後，平心而論澳門政府對市民服務、前線公務員廉潔方面有好大嘅改善（但當然，高層嘅貪污、利益輸送變得更嚴重）。雖然澳葡政府唔係冇可取地方，例如不斷起公屋嘅政策係好嘢（以前經屋平到冇人買），但整體上澳葡唔係一個理想嘅政府。
最近喺網上見到有網民活化市政廳旗／徽號嚟代表澳門，如果你唔鐘意用「五星蓮花」嚟代表澳門，我對探索新嘅符號／標誌代表澳門表示開放。但作為世俗主義（政教分離）嘅支持者，我認為有「天主聖名之城」口號嘅市政廳徽號唔適合成為代表澳門嘅新標誌。
話到事，澳門先係你嘅
以上對於澳門人身份嘅探討只係吹下水，無論我鐘唔鐘意澳門人嘅共同特質／歷史／記憶，至少，澳門嘅政治未來應由我哋掌握。希望從政者唔好停留空談「城邦」嚟消費本土標籤，唔好出賣澳門人取政治自主嘅可能性， 打破政權移交後親共利益集團輪流治澳嘅格局。
最後，最近保育愛都、松山燈塔／主教山對出嘅天際線等議題入面，都顯示澳門人對本土歸屬感增強，有望未來呢種歸屬感可提昇到當家作主嘅意識。
原載2015年8月17日《愛瞞》