Photo Credit: Michelle duQuesnay Jones
某教會要建堂，打正旗號要教友一齊奉獻。但教會有著我哋呢班八十／九十後廢青，真係一場悲劇。剛剛大學畢業冇耐，個身仙都唔仙吓，出完糧又要畀家用，又要還grant loan，又要做十一奉獻，又要貯錢結婚買樓，尐円跌到63都唔敢去日本旅行，邊度會有額外錢奉獻畀教會建堂。之但係，教會睇中我哋呢班廢青各懷異能，冇錢科水嘅話就貢獻所「能」。作為一班「耶能」，教會睇中你，應該開心先係。
「耶能」Jack（化名），多媒體創作人，理大設計系一級榮譽畢業，喺廣告界撈咗幾年，曾經喺國際廣告設計比賽獲得冠軍，最近自己開公司接job。阿Jack喺廣告界嚟講算係幾有名嘅新力軍。有一日，傳道人就走埋嚟同阿Jack講：「聞說你嘅設計揚威海外喎！不如咁啦，幫吓教會手，整返張建堂宣傳海報啦。一嚟可以鼓勵弟兄姊妹奉獻更多，二嚟可以畀多尐人欣賞到你嘅才華丫嘛。」（潛台詞：義務幫教會整海報。）
（呢個處境令筆者聯想到，早排有港媽用「like & share」換贊助拍攝。）
「第一次教會搵我整Poster喎，作為教會一份子，係時候發揮我嘅小宇宙貢獻教會。」阿Jack一口答應。如是者，阿Jack前後用咗幾日，整咗份稿畀傳道人過目一吓。
「嘩，呢個角好似太尖喎，不如轉返做圓角啦。咦，嗰個十字架好似太細喎，要整返大佢。」傳道人用咗一分鐘審視阿Jack嘅手稿，但用咗一粒鐘時間改呢樣改嗰樣。
又如是者，阿Jack又用咗幾日，改好咗份稿畀傳道人過目。
「嗱，上次咪同你講話個十字架大尐囉，而家個十字架都係唔夠大喎。」傳道人甲說。
「唔係喎，個色水好似唔夠鮮艷喎，都係轉返用Sharp Pink好尐。」傳道人乙說。
「咩啊，上次話要個logo細尐，先可以突出個十字架。」傳道人丙說。
差不多兩個月，阿Jack仲做緊教會建堂海報。經過修改廿幾個版本後，教會終於收貨喇。當阿Jack以為佢張海報會順利出街嘅時候，點知，教會喺冇通知佢嘅情況下，唔用佢嘅海報，轉咗用一段短片（後文會解釋）做宣傳。呢兩個月以來，除咗一般應酬以外，阿Jack做完自己公司嘢之後，就埋頭苦幹幫教會整海報。但辛苦咗兩個月嘅心血，一下子化為烏有。
第一次幫教會做嘢嘅阿Jack，遭受滑鐵盧衝擊之後，決定同傳道人理論。閉門會議後得出嘅結論係：錢冇（義務）、時間又冇（用咗兩個月以嚟嘅放工時間）、作品都冇（教會一改之前收貨時語調，改稱貨不對辦）。
事後，一臉氣憤嘅阿Jack搵咗幾個曾經幫過教會做嘢嘅朋友，一齊盡訴心中情。佢哋幾個人異口同聲表示經歷過類似阿Jack嘅遭遇。阿Jack綜合各方朋友嘅經歷，提出一個疑問：「教會叫教友免費幫手做嘢嘅現象，係咪愈來愈普遍呢？」
好喇，「耶能」Jack嘅故事完結，正正係另一個故事嘅開始。
前文講到一條短片代替阿Jack設計嘅海報。事緣，教會高層暗地裡搵第二個宣傳方案，就係拍微電影。微電影呢家嘢，都係交由專業人士拍好。傳道人們又出動喇，呢鋪搵咗一個拍開微電影嘅「耶能」Chris（化名）。阿Chris同樣係多媒體創作人，專門拍微電影，幾年內跟十幾間唔同類型嘅公司合作過，一般都按巿價收費。所謂巿價，包括：打燈、收音、化妝、後製、劇本、等等各樣成本（人力、物力、工資）。
最估唔到嘅係，嗰班傳道人以為拍微電影只係用手機錄吓片就搞掂。於是，阿Chris解釋返，拍一段出得街嘅微電影（有劇情內容、有視覺質素），係需要不同資源，例如：器材和人力。但離地（離奇）嘅事隨即發生。佢哋好似之前叫阿Jack整海報一樣，叫阿Chris拍硬檔（義務）拍好呢套微電影。甚至補多句：「呢條片會用嚟籌錢for建堂用，教會真係冇乜額外嘅錢可以畀到你。」
後來，阿Chris為免其難，開咗一個成本價（不包工資）畀傳道人，傳道人隨即一口答應。當阿Chris花咗半個月時間，寫好稿、叫齊相關演員、準備好拍攝所需嘅道具，傳道人突然間用whatsapp同阿Chris講，教會因為建堂緣故，冇乜budget可以放喺宣傳上，不如求其用手機拍段牧者分享就算。
如果你係阿Chris，嗰一刻都唔知係好嬲定好笑。但最後，阿Chris真係好求其咁，用手機幫幾個傳道人錄咗一堆類似建堂異象嘅分享片段，再求其剪輯便播出街。
其實，教會內有不少多媒體創作人，大部份都係專業人士，例如：音樂人、設計師、導演編劇、等等。佢哋嘅專業，就係佢哋嘅搵食工具，亦都係佢哋唯一收入來源。不過，當教會需要用到多媒體嚟宣傳嘅時候（甚至用嚟做傳福音嘅工具），會試圖用呢種「拍硬檔」嘅方式邀請有關教友幫手。
話說回來，短片播放嘅時候，牧者喺台上再三呼籲教友為教會建堂奉獻，莫使神家缺糧。究竟，係邊個令到邊個缺糧呢？