題為編輯所擬。
今日明報頭版揭示了儼如曾樹和經濟屬地的元朗橫洲，政府放棄棕土卻轉去搞附近綠化帶的原因：原來唔單只曾樹和，重有新世界份。
早期我地做《棕跡》研究一直有睇著橫洲個個案，質疑政府點解唔棕土優先而走左去揀綠化帶。今日我再按明報查番份近月新世界份規劃申請（Y/YL-PS/2）睇，真係睇到嘩一聲，新世界你3座30層高既豪宅發展計劃，竟然可以同政府新建議的綠化帶公屋規劃的邊界完全無縫含接，政府規劃個迴旋路口位起正個豪宅隔離俾你駁，要知道新界冇路口駁好難做到大規模發展，依家連基建錢公帑都幫你出埋。
最奇怪既係，原先成30公頃既橫洲棕土可起到足夠成年目標既公屋單位，依家轉左去綠化帶就縮水4分3，起初重諗點解細左咁多？原來係就著啲地唔收埋新世界個塊地做公屋，留俾佢自己申請豪宅發展，擺到明。
點解個公屋計劃唔揀曾樹和收租屬地，剩係集中收三條非原居民鄉村啲地，旁邊新世界個塊就留番俾佢自己起，路口位都安排好哂等佢接。官商鄉黑勾結，在元朗橫洲的土地規劃一目了然。