近日政府為左推人買樓托高樓價，已經無所不用其極，早前就話公屋供應封頂，最新就話會研究可以拎強積金做首置，釋放大家既「老本」進貢地產市場。
呢個行為其實證明左一樣野，就係對政府黎講，強積金既概念根本同退休安老可以係完全冇關，強積金既目標就係「強積」本身，要俾人強制囤積你手上既錢一大段時間，剝奪你自己行使財富既各種自由，話幫你儲錢根本只係一個藉口，唔係根本就唔會俾你將棺材本都轉移去做房屋投資。
而買樓明乎其實都係一種「強積」既變種，尤其買綠置居同首置樓，逼你借20-30年一半人生供你半份糧，最後俾你好彩無風無險供完個物業都唔知升左定跌左，睇著個樓市息口就好似睇著份強積金月結單咁無助，臨老拎番間樓出黎做逆按揭每個月都唔知按得番幾多，最後好可能俾金融地產霸權玩足一世。
好多人問我你地做土地房屋研究，有冇地產商lobby我地，我答冇佢地唔信。其實好易理解，依家所有土地房屋政策最大得益者都係地產商，佢地有香港名義上最話得事個位幫佢defend所有野，佢地連明益地產商既公私合營都幫佢地講成為政府既「一貫做法」，咁神通廣大，重駛鬼lobby我地啲民間研究組織？
有啲人話林鄭係坡粉中左坡毒，成日抄新加坡既政策黎用，但係我覺得佢最虛偽既地方，就係人地新加坡每年8-9成政府地都係用黎起公營房屋，相比香港每年得3-4成地做公營，又唔見你敢公地公用拎多啲賣地表既地放番入去起公屋？
葉公好龍得個講，借人地過橋，講錯左要道歉但政策照舊，壓榨啲基層後生又話重視佢地既聲音，拎埋你老本等你恐懼臨老無助要自甘剝削努力打工。但仍然有好多人睇唔到，依家香港既房地同財金呢種「被強積」既思維，正不斷對普通市民製造緊巨大既生活壓迫，而亦都唔似有迫爆既跡象，所以啲官員先可以咁肆無忌憚。