看見港鐵盈利168億、總資產權益去到1664億，仲想加價3.14%，大家既反應可能係「嘩賺咁多唔應該加價啦」。其實話唔「應該加價」，已經對佢非常厚道。
因為17年港鐵「香港本地客運」（即係唔計過境及機鐵）的票價收入，只有128億；就算無哂呢筆收入，168-128，都仲有40億盈利。加你票價只係要賺得更盡。
點解既？因為真正既利潤，係來自其他地方，尤其物業：車站商務47億、物業租賃及管理業務40億、物業發展11億。而且港鐵業務一早就唔止於香港，中國境內及國際的鐵路、物業租賃及管理業務加埋都30億。相比之下，整體香港客運業務（本地列車加上過境列車和機場快線等等），扣除成本後利潤貢獻都只有16億。咁做乜仲要係票價上搶錢？
而盈利當中，係隱藏左巨大既社會成本 - 又係土地問題。政府要起鐵路，好似非常為公眾利益，所以是接近無敵的收地、發展藉口。全世界鐵路好多都會虧蝕，發展鐵路上蓋去賺錢養住鐵路營運，更是全世界都覺得勁的構思。但係多得政策嚴重向鐵路傾斜，加上跨區、跨境人數太多，港鐵只計客運本身都不會蝕，根本沒有需要去賣地狂起私樓養客運。