技術性討論
一直以來，遊行集會或普通的示威，安全是依靠各方，要主辦方、警方、參與者共同合作，而不是依靠一紙公文（即現行制度上的不反對通知書）。主辦單位的能力只能盡量令事件安全，而不是有能力令大家完全安全，有能力令大家完全安全的是警方。這道理相信大家都會明白，也不多說。
警察違法胡亂拘捕同驅散市民就已經發生好幾個月，如果發起任何活動，相信大家都不會期望警方不會違法。所以，作為主辦方或參與者過去都會在遊行/集會前自己做好準備，當中準備功夫的確好多，而且非常謹慎，因為不得不否認今時今日依然有好多和理非會聽發起者安排，而且好多人都依靠現場資訊，所以今時今日做發起，責任同壓力都好大。如果少少做錯，影響緊既可能係好多生命，所以真係好小心同要諗好多。
自問民陣甚或自己都好多做得不足同好多野要改善，一場運動咁耐，不停檢討同觀察反思都係必須，因為仲要做下一次。好記得前輩講過：做差一次大家會原諒，但明知而不反省不做好就一定比人屌，而且呢家仲要講生命，所以我都會不停諗點做得更好，以下係我既觀察、過去做法同建議，歡迎討論。
咁點樣先係叫安排得好？
無話點樣做一定最好，但至少有基本野，例如：
1. 無不反對通知書就要同人講被捕風險同後果
2. 有同無不反對通知書都要準備好超過三條離開路線
3. 係離開路線上安排人手做觀察
4. 將所有資訊盡快確實，並且現場通知各地點既人，所以有音響都好重要，音響覆蓋範圍都要大
5. 聯絡立法會議員同first aid幫手
6. 有足夠糾察幫忙
有關行動策略轉變問題
6月在港島的集會／遊行中，警方除了612，其他日子都是完結後才行動，而大部分示威都有不反對通知書，港鐵也不會關閉，所以當時無需要考慮太多。
7月遊行大部分都有不反對通知書，但就有黑社會係各區無差別攻擊，以及警方會發不反對通知書，但就施加限制，甚至直接改路線或中斷遊行。而當時我記得要安排係大量人群如何到安全地方離開，同時不停聯絡立法會議員到各地方協助，例如721盧押道離開，我地都請大家到中環離開一樣，因為有巴士、港鐵、船離開，而安全系數都較灣仔安全，當然最後721元朗恐襲避唔到，但至少當時知道後已立即瘋狂用可行方法通知大家。
8月：818沒有遊行，只有集會，而維園流水式集會整體上做得不錯，原因在於818當時有不反對通知書，同時開會時已要求警方在人數迫爆後封路，所以如果大家記得，當時我地係請大家先迫爆維園，警方封路後，維園附近路段基本上完全無車無警察後，流水式集會先正式開始，而出高士威道再去軒尼詩道都比較安全，當時示威者都不用因為人車並行而有危險。其次，當時警察未一開始就打。
9月：當時已無合法遊行，而要刻意做公民抗命，希望更多人出來，同時當時都刻意講清楚風險，而如果大家有去，會見到我地係起點同終點講離開方法同被捕支援熱線，仲有各議員係各地方提供協助，當然仲有first aid，咁大家最後都可以比較安全離開。而警方當時都係較後時間先痴線。
10月：10月1日係我最醒覺既一日，當日終於明要發起九龍遊行，原因係港島由銅鑼灣去中環，連山路都只有十條直路去，同時無港鐵，只有巴士，同時紅隧、西隧及東隧都有警察，根本好難安全。相反，九龍橫街直路較多、無車都易行，難被包圍，同時都確保到大家去到走到。當然都要做基本功，例如講清楚離開路線、附近情況。
10月20日雖無Nono，但主要令大家安全既係前線，前線開路，和理非行，最後和理非大部份都安全離開到。同時，當然基本功都要做，有去都好記得我地除左講被捕支援，發起公民抗命既人都有留到最後，同時都講得好清楚離開路線，確保大家安全。
10月27日尖沙咀集會，無不反對通知書情況下，警察同過去唔同，一早放人係尖沙咀，並且直接衝入人群，不論和理非還是前線，甚至遊客都任意襲擊同拘捕，當時我不是發起者也不在香港，但對此事極深印象，原因警方策略又改變，變得更差更打壓。經過呢件事，我當時睇法係如果之後做發起，我唔會叫大家一齊去一個地方集合，相反大家沿路中途加入最好。
11月2日就大家都好清楚狀況。
根據以上，咁去港島定九龍好
無錯，的確無一地方安全，但我地有得選擇比較安全既方法，港島老老實實警察肯定熟過大家，又大家都清楚港島被包圍好容易，同時真係離開唔到，或者好難離開。至於九龍，路多巷多橫街多，巴士／船都好易走到，再唔係咁多黃店同商場，都會安全少少，所以個人立場上我會選擇九龍。
另維園雖然係過去集合地點，但安全係極差，容易比人包之餘，仲好難走，夏天就熱爆，落雨就暈好多人，維園真係唔係一個安全集合點，更何況無不反對通知書，所以維園真係唔好再入。
其實如果人數夠多，18區當然最好。