血洗大學，香港兒女經歷內戰，這一個星期，有良知的香港人，沒有一個睡得著。被捕、襲擊，不分男女老少，無一幸免。過去一個星期，「理工之圍」，市民展現了《十萬火急》的對白，救得一命得一命。面對這墮落與殘暴不仁的港共軍政，可能大家覺得手上的選票，並沒有太大的作用。可是我們自2003年以來，一直於捱打的狀態，這次是唯一機會，在體制內向港共極權報仇還拖。過去五個月，大家都在極度崩緊下抗爭，一次勝利是很重要的第一步。
殲滅保皇黨的放血行動
過去民主運動四分五裂，遊行、區選被視為沒有作用，這些固有的心態，某程度助長了保皇黨的不斷坐大。雖然年青人未必啱聽，政治話語權，是取決於議席。有了區議會議席，可以18區正式開花，舉辦反警暴活動，同時在社區落地，做意識提昇的工作，黃色經濟圈論壇等，不再蛇齋餅糭。大家的稅款用得其所，不再批地區大白象工程。或許大家未必留意，區議會好多時成功爭取，保皇黨用盡方法去阻止民主派在議會提議程。或者將民主派的議案修正作討論後，就不當議案存在，結果我們的錢去了資助不知名的團體，國慶一百幾十萬擺酒，社區設施十年都整唔好。
大家會問投票有用嗎？沒有抗爭，哪有改變？這次選票，是香港人以血淚換回來，每一票都彌足珍貴。這次不是血債票償，但面對極權的壓迫，手上的選票是成本最低的還拖戰略。接近半年的抗暴之戰，和理非從沒有放棄任何勇武手足，齊上齊落。各位勇武手足，今次不用大家SET RB，去投票就得。沒有你們的選票，殲滅保皇黨的願望是不能達成。你甘心身邊的老人家，再受蒙騙嗎？每個區議會議席，都花費大量金錢，若果保皇黨失去大量議席，等於放血行動，有血，你唔係唔放呀！
不能對掌心雷仁慈
和理非與勇武手足，都懷有一顆仁慈之心，會禮讓老人家，今次區議會投票，記住，對任何人都唔可以仁慈，堅持一定要排隊，不能讓人插隊。如果見到一車又一車的老人院輪椅來到，一定要向票站主任說不，要他們排隊，記住講多一次，話之佢係100歲坐輪椅既阿婆，老X都要排隊，天王都無情講。因為保皇黨最叻係數夠票就收工，如果俾佢地數夠票，跟住唔知一班乜野人黎攪而終斷選舉，即時截票，大家就死不眼閉。今屆區選保皇黨係乜野都做得出，今時今日香港選舉，可能同伊朗差唔多，大家要有心理準備，今次投票記住以下五點：
- 晨早流流排隊，最好六點就排定，等票站開門，同保皇黨阿婆阿伯鬥早，當跑渣打馬拉松同毅行者，瞓少幾個鐘，幫保皇黨送終。
- 今屆吹晒風，中資機構叫晨早投票，下晝可能唔知乜事，越早排，條龍越長，大家投越安全。仲有可能手足下午出街，都因為你早排隊長龍保皇無勝算，減低流血衝突。
- 如果多人，最好做埋考順仔，幫阿媽阿爸排隊，全家一票都不能少，多一票，好重要。
- 帶多張櫈落街同一把遮，作為7種武器之首，當然唔係攻擊，而係預防排長龍，阿爸阿媽有得坐，老人家投票開心，又可以防身，警察又唔嘈得你。
- 擾亂票站訪問，可以做。保皇黨調查通常會問你投乜票，第一條通常問你上屆邊個，記搵返上屆候選人名字，話投佢。第二條佢會問你立法會投邊個，記得答返保皇黨候選人，唔好答錯。第三條係超區投邊個，記得答：瓊子、午餐肉或頂頂是但一個。第四條可能問你點解投保皇，記得剔同運動有關的。你地嘅答案，係會打亂保皇黨未來部署。
或者你對部份候選人不滿，有乜唔啱，立法會選舉仲有得揀。區議會係單議席單票制，無得配票，分散就一定輸，點投，自己識諗。呢十年，我地俾保皇黨恰到上心口，你甘心將寶貴既一票射落海？抑或令保皇黨仆街，齊齊開心一次？呢次唔係路線之爭、唔係政見之爭，而係敵我分明的黑白之戰。唔想用悲情消費死去義士，不過睇保皇黨仆街，係200萬人既心願，大家可以還自己一次心願嗎？11月24日，票站見。
P.S. 18區熱烈祝賀保皇黨落選，是暫時最治癒的事情，期待一齊慶祝。