「你哋有冇信心可以長期營運？」
「其實都擔心……但有信心，因為信得過香港人。」
（獨媒特約報導）籌備兩個月以來，重光號遇到的困難多得數不清：難以聯絡供應商、沒資金租貨倉、被「同路人」誤會……「日日都諗緊（放棄）。」圑隊成員Jason說得坦白，「但唔可以架嘛，有啲嘢就係要堅持落去，先會見到希望，就好似呢場運動咁。」另一成員Vivian搭嘴：「我諗冇人諗過放棄（反送中）……」「一開頭可能有嘅……但當你見到大家都堅持緊，你憑咩話放棄？」
「光前裕後」的意義
兩個月前，連登上出現了數個關於「抗赤化」的帖子，帖子大意為：要推動黃色經濟圈，就需要建立一個平台，推廣本地製產品和宣傳黃色小店。因為數個帖子，十多個互不相識的陌生人走在一起，成立了重光號，並於一月初正式開始營運。團隊成員Jarvan解釋，「重光號」的名字取自「重建我港，光前裕後」八字——「光前」意指透過革命，光復、改變現有的事情，從而「裕後」，即使下一代受惠、不再受壓迫。由於網購平台的門檻較低，亦可以容納不同類型、不同品牌的產品，團隊在「重光」後加上「號」字，把平台比喻為一艘「可以乘載各式黃色商家，讓香港人有更多選擇」的船。
重光號的成員大多身兼全職，來自各行各業，有設計師、電腦工程師、退休人士，甚至家庭主婦。成員們全是義務性質幫忙，通常每星期抽空二至三天，於下班後到貨倉處理重光號的業務，包括聯絡供應商、包貨、出貨、管理網頁等；他們差不多每次都留到深夜才趕尾班車回家，隔天按時起床上班。Vivian形容為：「對住佢哋（重光號成員）仲多過對屋企人！」
抵制「中國製」，才能推動可持續的黃色經濟圈
開業第一天，重光號網站上已經有各式貨品出售，包括食品、家居用品、個人護理用品、醫藥等。所有產品均有一個共通點：全部「非中國製」。從事採購的Jarvan解釋，拒絕中國製產品是重光號的核心理念之一：「其實香港過去一直好依賴內地貨源。直至反送中爆發，唔少與抗爭有關嘅物品例如口罩、黑色衣服、雨傘等無法進口，大家先意識到香港嘅市場一直被中國製產品壟斷。」
「但只要有多一蚊流入中國，佢（中國）就多一蚊打壓返我哋。」因此，重光號希望感染大眾，透過改變消費模式，「抗赤化」香港。Jarvan打了個比喻：「每一位消費者都係手足，每一張鈔票都係一張選票。當商家為迎合消費者，就會加入黃色經濟圈，並減少喺大陸製造產品，令資金唔會流去中國。」重光號團隊認為，要避免流出資金，同時吸納商家加入，才能真正推動「可持續的黃色經濟圈」。
「可避則避」的原則
「我哋連送貨嘅紙箱都係香港製造！」Jarvan隨手指一指角落，又拿起桌上的可樂：「其實大多數產品都會寫明生產地。除此之外，睇barcode嘅頭三個數字都可以知道公司註冊地，例如489係香港，690至695係中國。」
重光號的產品全是本土出產，或從台灣、日韓、歐美等地來貨，但Jarvan承認，即使已刻意尋找「非國貨」，他們亦無法得知產品的原材料產地是否來自中國，只能採取「可避則避」的原則：「始終無辦法知道曬所有嘢……」而除了拒絕中國製產品，重光號亦會「避開」親中或「藍」品牌產品：「例如幸福傷風、四洲呢啲。」
由於政治立場敏感，重光號對外亦一直採取「可避則避」的原則，儘量避免曝光，亦不會主動接觸「藍」或「親中」的供應商，故至今不曾因政治立場受到任何打壓：「因為唔會向佢哋拎貨，（佢哋）都冇機會打壓到我哋，哈哈！」Vivian笑道。
有啲嘢需要努力不懈咁去做，先會成功
不過，不少大供應商已有固定客源或只供應中國製產品，重光號要找到足夠和合適的來貨，亦非容易的事：「最開始成日食檸檬。Send email比十個（供應商），十個都唔覆。」亦有供應商會「比說話」他們聽：「嫌我哋訂太少貨，或者唔放心喺我哋到上架，怕網站唔夠靚，影響brand image。」此外，貨倉租金是重光號面對的另一大難題：「一開頭最怕冇錢租貨倉。一般租倉要交一個月按金同兩個月上期，至少成三萬幾……」而最讓他們委屈的，是被人質疑重光號「藍扮黃」：「話我哋背後有『金主』，明明其實係我哋每人拎四位數字出嚟start up。」
說到種種辛酸，三人幾乎停不了口。Jason亦坦白道：「日日都諗緊（放棄）。但唔可以架嘛，有啲嘢就係要堅持落去，先會見到希望，就好似呢場運動咁。有啲嘢需要努力不懈咁去做，先會成功。」Vivian亦笑言：「雖然（找供應商）有好多困難，但厚臉皮啲就ok架啦！」
沒想到，重光號開設Facebook專頁後，問題隨即迎刃而解：數十個供應商主動聯絡他們，表示希望把產品上架，亦有人以低價，向他們「借」出百多尺的空間作「貨倉」。Vivian解釋，原來不少本地公司與香港品牌的政治立場偏『黃』，亦曾參與罷工，故十分支持重光號。至今，網站上已有近300款貨品，但Jarvan透露，手頭上仍有過千件產品等待上架。「真係越做越唔擔心！」他笑道。
採取最信任的態度：真係好多小朋友需要幫忙
除了推動「可持續的黃色經濟圈」的概念，重光號亦明言會把利潤用作支援抗爭者，包括提供就業機會和經濟援助。至今，重光號開業不足一個月，重光號至今仍由義工全盤負責營運，但Jarvan、Vivian和Jason表示，目標是於三個月內「站穩腳步」，順暢營運並聘請「手足」。
說起他們口中的「手足」，三人的臉色認真起來：「我哋希望請到越多越好，其實真係好多小朋友需要份工……」Jarvan說得有點咽哽，Vivian和應：「真係好多……平均每日都有幾個（抗爭者）會inbox重光號facebook，問我哋請唔請兼職。」「有一次我哋代供應商出post請人，好快就full咗。好多（應徵者）年紀都好細，其中有一個係學生，佢好緊張，好怕冇咗份工，even只係請一日……雖然佢因為要返學，最後都係嚟唔到。」說到這裡，愛笑的Vivian臉上失去了笑容，Jarvan於是接口：「經過呢次，我哋更加清楚有唔少小朋友需要幫助，亦令我哋清楚，真係要小心計好條數，有足夠能力先招聘人。」Jarvan強調，重光號希望提供一份穩定的工作職位給抗爭者：「冇理由請幾個月，之後就因為冇錢炒咗佢，我會覺得對唔住佢，好似害咗佢咁。」
除了提供工作機會，重光號亦會把部分營利用於「緊急小額資助計劃」，為有需要的抗爭者提供小筆金額資助，作應急之用。Vivian說，他們只是希望略盡綿力，讓抗爭者可以「食個飯，睇個醫生」：「每次睇新聞時都覺得好心痛，點解要因為政治而影響小朋友成長、令佢哋冇家人關愛？」此外，重光號亦在構思於未來加設「醫療援助計劃」，撥出每個月部分收益或進行義賣，為抗爭者支付醫療費用。三人強調，求助者不需向他們提供任何證據，「我哋會採取最信任嘅態度去幫每一個人。」Jarvan肯定地說：「好多小朋友都好乖，我哋相信佢哋唔會濫用。」
讓黃色經濟圈盛放：成為大多數，就唔洗怕被打壓
長遠而言，團隊希望能認真擴展、越做越「大」：「請多咗人，就當然要做更多事情。」義工團隊協定，至少會協助重光號營運一年，日後若聘請足夠人手營運網購平台，義工便會發展更多目標，進一步推動本地港牌發展，並使黃色經濟圈「盛放」：令不同類型和行業的公司均加入黃色經濟圈，使大眾購買不同日常用品時均能選擇非中國製的產品，「咁就最舒服啦！」Vivian亦認為，黃色經濟圈一直太著重於在飲食業，導致其他行業的小店「感覺被忽略了」：「要令到黃色先係多數，先唔洗怕被打壓，都唔洗特別避開藍店了！」
三名成員的腦海裡有一大堆構思，並早已想好要如何在未來一一實行。不過，他們真的有信心能長期營運嗎？「其實都擔心……」Vivian頓了一頓：「但有信心，因為信得過香港人。」她認為，現時已有越來越多人關注「中國製」的問題，亦會避免購買中國貨：「我哋相信香港人會堅持……要一齊堅持，我哋先會成功。」
攝影：湯璧瑜
記者：梁皓兒