（獨媒報導）兩年間，巴打鮮菓從一間小網店擴大至擁有兩間門市，更聘請了約20 名「手足」。外人以為老闆梁東麒的創業之路一帆風順，他卻說其實至今仍未完全回本，「錢就一定有賺嘅，只係睇你會唔會將所有錢擺哂入去盤生意啫。」他形容自己「all in」這盤生意：「咁手足都要食飯㗎嘛，場仗仲要繼續落去，始終要識自己生存。」
梁政治立場鮮明，從不懼於高調表態。贏得同路人支持的同時，他亦為自己惹來不少麻煩。在言論空間日漸收窄的香港，他稱會堅持繼續「講事實」，「我只係講咗人地唔敢講嘅嘢，同埋大聲啲啫。」
「我同每個伙記都講，如果有日真係煲底見，我執咗巴打都無妨。」問為何有此說法，他沒有多想便答道：「始終巴打鮮菓業績上升係因為場運動，同埋最想達成嘅嘢都做到喇。淨係煲底見就夠啦，點會有唔抵呢！」
拒入內地貨 只賣外地生果
巴打鮮菓於2018年開張，最初主要做果欄檔販的批發生意，或以網購包送貨的形式出售。以「巴打」為店舖命名，是因為梁原計劃與一名「好兄弟」一同創業，惟最終因兩人「各有各忙」，變成由他獨自經營，但一直保留店名。
巴打出售的生果全由外地入口，如台灣、日本、美國、東南亞等，亦會按季節調整來貨。梁指從開店至今，自己從未曾從內地入貨：「食完日本蘋果之後，你係唔會再食內地蘋果㗎嘛，呢個係事實。當然有啲政治因素，但係（日本產同內地產係）兩樣嘢嚟。」
開業半年多，巴打便遇上反修例示威。梁東麒不時在社交平台上發表反對政府的言論，如「所有狗與警察不得內進」，又曾轉貼文宣、支持罷工。漸漸，巴打引起不少抗爭支持者的關注，被標籤為「黃店」，Facebook專頁的追蹤人數增至2萬。梁坦承生意變得更好，去年11 月在葵涌工業區開設第一間實體店後，今年8月再於九龍灣工業區開設第二間門市。
all in營利開第二間門市 中秋賺6位數仍未回本
梁解東麒解釋，開設門市是希望方便客人在網上落訂後，下班後能直接前來取貨。巴打標榜「驗貨後付款」，顧客無須先付訂金，而是在親身檢查貨品後才付錢：「驗貨後付款又未至於好偉大吖，我只係想香港人之間可以多啲信任。」
梁又補充，生意其實尚未回本：「有好多人最近見我開分店，就問我賺咗好多錢咩——錢就一定有賺嘅，只係睇你會唔會將所有錢擺哂入去盤生意啫。」中秋節剛過去，巴打出的生果組合反應不俗，扣除所有開支後錄得6位數字收益。但梁形容自己「all in」這盤生意，幾乎將所有營利都用作發展業務：「要畀人工同租，頭半年蝕咗差唔多50 萬。直到今年4 月，我哋先開始有錢賺，不過都未cover返當初蝕咗嘅。」
「屋企有3 個細路，點都有啲壓力嘅，但係而家香港人仲有咩可以輸啫？仲驚咩冇錢？最多咪拎綜援！」
高調表態惹恐嚇被起底 不怕得失客户
雖說生意因反修例運動而得益，但因為高調表態，梁東麒持續收到恐嚇訊息和電話，甚至遭人起底，個人資料和地址被刊登在「香港暴徒網」。「我固然會擔心屋企人，不過冇可能日日返放學長期保護仔女㗎嘛。況且，又唔係我做錯乜嘢，我只係講咗人地唔敢講嘅嘢，同埋大聲啲啫。」
梁指，自從遭人起底之後，言論稍為收斂了一些，但立場始終如一，亦會繼續「講事實」：「示威者掉汽油彈係唔啱，咁警察咪拉佢哋囉，無理由要係咁打佢。」他語帶怒意，「成班人又蒙面蒙到呀媽都認你唔到，都係唔夠膽畀人知你身份啫。」
他強調，若果越多香港人不敢發聲，香港的言論自由只會越縮越窄。不介意因政見而失去客户青睞嗎？「由開張到而家呢刻，如果我只係為錢而做呢門生意，我諗巴打執咗好耐㗎喇。」
「有唔少人問過我，點解我有3 個細路都要行咁前。我就反問返佢哋：不如你諗吓，點解我有3 個細路都要行咁前啦。」年輕時的梁東麒貪玩，中二被人踢出校後曾「撈偏」，更入獄3 年。後來因為女兒出生，他才收心養性：「做人爸爸嘅就一定『要定，要乖』，唔可以好似以前咁。」他為女兒取名為「梁芯」，「改呢個名係為咗提醒自己同身邊人，時刻要保存良心。」
巴打鮮菓Facebook圖片
一年三度招聘手足 盼助同路人「儲吓子彈」
若有留意巴打的Facebook專頁，便可見他們今年三度刊登招聘請廣告，招聘條件表明有案在身的抗爭者為佳。梁東麒指，他前後共僱用了約20 名「手足」，當中有人尚在讀書。他指，「有啲人俾屋企趕出黎，好等錢洗，我就喺佢地第一日返工畀定一堆糧先。
梁說每次請人都沒有特定程序，大多只是「傾吓偈」。遙想起當初刊登第一個招聘廣告，「有個女仔whatsapp聯絡我，傾傾吓偈，我就問佢『你夠唔夠膽聽日就返工』，跟住佢就話『你夠唔夠膽聽日就畀我返工吖』，咁就有咗第一個同事。」
他指，招聘手足的目的，是為了幫助他們「儲吓子彈」，「咁手足都要食飯㗎嘛，場仗仲要繼續落去，始終要識自己生存。」
梁東麒至今仍有在舖頭擺放蘋果日報和「撐蘋果文宣」。
曾任壹傳媒職員生情意結 出錢落廣告撐《蘋果》
除了幫助年輕的「手足」，梁東麒亦曾買下整頁《蘋果日報》廣告，以示支持壹傳媒。今年8 月10 日，警方突然闖入壹傳媒大樓，肆意搜查記者桌面資料，拘捕壹傳媒多名高層及創辦人黎智英。不少商戶先後以落告的形式表態「撐蘋果」，巴打亦於8 月15 日落了一整頁廣告，寫着「賣廣告 落蘋果 因為我係賣生果」。
梁東麒稱，自己約廿歲時曾於《蘋果日報》的工廠工作，負責監察印刷品有否出錯，故對《蘋果》尚有一份情意結。他至今仍每天在店裡擺放《蘋果》供客人取閱，「我撐佢哋，係因為蘋果係講真實嘅嘢。而你喺東方唔會見到，TVB都唔會見到。」
自認曾是港豬、盲撐楊岳橋 反送中後轉撐本土派
梁東麒指顧客中不乏藍絲和港豬：「佢哋明知我哋立場㗎，不過見啲貨平靚咪買囉。同佢哋講五大訴求，佢地都會話『唔好講呢啲啦』。」
「其實港豬知道警察唔啱，只係佢地一直唔敢講，唔想承認事實。」梁東麒自言，自己從前也是不太關心政治的港豬之一：「淨係吃喝玩樂，間唔中跟人屌吓政府咁囉。」2014 年雨傘運動期間，他雖曾到金鐘現場留宿，但指「其實嗰時我連白皮書係咩都唔知，純粹想感受一吓係乜嘢一回事。」
說到此時，梁不禁笑了起來，「我16 年嗰陣仲好buy楊岳橋㗎！仲覺得天琦好暴力。見有選舉，咪盡下公民責任投票囉！」在反送中初期，他對《逃犯條例》的認知僅僅是「香港人可能會俾人捉去大陸受審咁」。
令他政治覺醒的契機，是多次過百萬遊行後，政府仍然一意孤行。「當時一百萬出黎行，之後甚至二百萬，係你（政府）話畀我地聽和平遊行冇用㗎。第一個人喺金鐘跳咗落去，連死埋阻你唔到！示威者當初都冇用暴力㗎，根本冇人鍾意暴力。」
盼助流亡抗爭者：最想喺台灣開分店
談到未來，梁東麒指希望能在港島開設下一間分店，「不過最想喺台灣開分店。嗰邊多手足，幫到嘅話梗係幫。」
至於抗爭之路，梁直言會一直堅持下去，「呢段日子發生太多嘢喇，唔係話突然有件開心事，你就會忘記過去一年嘅事。」對於未來要做些什麼，他思量半晌後道：「我真係唔係好知道未來要點樣……真係唔知，但係我知道而家呢刻做緊乜咪得。」