純粹個人觀點，將近日讀過既食物安全同野味市場既文章整理一下。
武漢華南海鮮批發市場好可能只係其中一個武漢肺炎爆發介面，因為最新英國醫學期刊Lancet發佈論文，追蹤武漢一間醫院裡面最早感染4名感染者中，3個都沒到華南海鮮批發市場 （見圖），即係話好可能個疫源地 （唔只係） 批發市場，源頭仍然不明。
如果源頭唔係網傳緊既實驗室病毒洩漏，或者重有再早啲既感染個案被隱藏，就有可能係批發供應上游既野味養殖場及肉類加工場出事，咁就同依家整個中國農產品批發供應縺安全問題有關。
出事既地方就有可能係：
1. 專收野味既黑市商販集中放置野味既地方，令動物集體感染，再供出去唔同批發市場／社區散播。
2. 養殖野味商販放置野味既地方，令動物集體感染，再供出去唔同市場／社區散播。
3. 收集野味屠宰的肉類加工場，將感染動物肉類散開。
4. 感染動物將病毒傳到供應過程既運輸工具，令用過同一款運輸工具再向外傳播
或者養殖野味既、黑市收野味既同屠宰野味既都係同一批商販三位一體。早前被訪問武漢賣野味市場既商販，自己都承認分唔清楚啲野味係養殖定野生，「偷著賣那多少是有的」，邊度黎都追唔番。咁即係話，基本上係反映左野味食物供應縺安全性同透明度出左問題。
一日重未鎖定到個病毒源頭，一日都有可能從源頭散播緊病毒。中講左咁多年食物來源要「全程可追溯」，到問題出現就發現原來得個講。
除左刻意隱瞞，追唔到食物來源既原因可能有二：
第一、 根本成個都係黑市野味市場，成個供應縺無論從貨源、通路、販子當然係隱藏，冇咁易被你搵到，分分鐘有埋地方政府／有勢力人士包庇，係一個中國菜籃子黑幕。
第二、 中國既農產品供應縺一直係批發市場主導模式，佔左所有農產品市場7-8成，同北美模式以超市主導好唔同，講緊每年上萬億生意。但私營批發市場一直存在好多問題，例如壟斷資訊、農產批發商背後既商販 （包括「二道販子」） 唔駛拎牌乜人都做得，流動性高，更難追溯來源。加埋近年網絡直銷及第三方物流模式衝擊，都開始出現惡性競爭，透過賣野味搵賣點，或者搵非法野味養殖場拉低批發成本，絕對唔出奇。
武漢個海鮮批發市場批發、零售、觀光三位一體，乜都混起黎賣，呢種實體批發市場空間的「髒、亂、差」現象，官方學者民間都不時批評，講過哂冇徹底改善然後出事，重要成為主要爆發疫症中介，呢啲就叫做人禍。
其實唔好以為依家中國賣既野味剩係野生，除非係一帶一路不斷捕捉人地國家既野味，真係唔知現時中國重剩番幾多「山珍」可以捉到做批發。要做到大眾畜牧咁既規模批發供應，就知佢一定要靠馴化集中養殖作主要供應，咁樣分分鐘比起野生捉重危險。
其實養殖野味市場係近年中國農村靜靜雞冒起，SARS隔左唔夠十年，就開始自欺欺人話蝙蝠先係SARS宿主唔關果子貍事，俾個理由自己全國大攪野味養殖業，將「特種養殖業」合法化、網上教養野味致富，有啲重包裝叫「綠色農業」，因為唔食野生食養殖就叫「綠色」。從此孔雀、野豬、竹鼠、駝鳥、果子貍養殖場應有盡有，又有批發市場通路，又有龐大消費市場支撐，當然商販可以比一般養殖賺多上十倍，但就會整到「全民大煉毒」，唔駛話武漢實驗室洩漏，基本上大量野味養殖場每日都做緊開放性病毒實驗。
近年愈見愈普及既城市政治生態學有句名言："There is nothing unnatural about New York city." 簡單黎講，即係話人為發展唔單只係影響緊自然環境，而係直情改造緊人同自然既互動關係，今天此道理尤其警世。
唔好再當食物供應縺剩係個工業／經濟成本效益問題，真係好好當番佢係食物咁特殊看待；唔好玩食物；食物供應縺如何病毒亦必如何；食物批發市場空間唔好批發零售共冶一爐；立法規管中國批發供應商販資格，呢啲觀點，未爆之前好多文章都已經提過哂。但係要真係做得到，事實上係對依家中國官員既文化水平、體制同既存利益結構好大既考驗。
亦唔好旨意官方會為你答以上問題，因為分分鐘查下查下，就會揭左成個野生產業縺同邊同高官咩勢力人士有關，唔駛講咁遠，你睇下油麻地果欄就知。但武漢人被佢害到咁慘，害到鄰居出哂事，到今日連個「食物」源頭都不明不白，係咪一個菜籃子黑幕，你地係有權調查下知道個真相。我都好想知，但暫時愛莫能助。