區議員搞鳩外傭、性工作者、露宿者，以及其他人，當然唔會係最後一次。其實上兩個月筲箕灣已經有人搞鳩性工作者，不過唔知點解今次先嚟炎上。可能仇栩欣個page本身多人睇掛。
話說年初一（好似已經係上年嘅事）我地去旺角橋派呢張印尼文／英文防疫單張，我就係特登唔包叫人唔好外出嗰部份。
原因好簡單。外傭喺香港冇屋企，所以根本冇得留喺屋企。佢老闆屋企只係佢老闆屋企，對佢嚟講係工作地點，留多一刻就多一刻有機會俾人使去做嘢。當然，佢地都好可能會選擇減少外出，但結果係會將所有假日要做嘅嘢逼晒落同一日做。嗰個可能係佢成個月唯一一日可以做自己嘢嘅時間，道理人情上都冇得阻止，分別只係點樣因應情況協調下。
當然，瘟疫期間有好多特事特辦嘅嘢，但應該係反方向咁特事特辦。件事就係
1. 1月以嚟你估有幾多印尼人幫手訂口罩？唔知道，數唔到。即使係本地人，佢地訂口罩一樣處處碰釘做到人都癲。做人係要感恩圖報。
2. 宜家印尼瘟疫大爆發，每日加三百幾宗至今四千幾宗嘅官方數字絕對係遠遠低估。呢段時間本地人更加需要外出打工嘅親戚協助。
要勸諭嘅話，反而係勸諭下本區居民呢段時間點樣同佢地請嘅工人夾返工同休息嘅時間，而唔係增加佢地嘅困難。
香港人想外國幫我地抗爭呵？做好自己先啦～
p.s. 因為已經過咗三個月，圖中嗰張單張已經out晒。如果有相熟嘅工人姐姐，歡迎廣傳下面呢套由移工牧民中心 Mission For Migrant Workers 製作嘅印尼文及英文資料。