作者按:凝光係一個倡導本土文化以及面向政黨嘅團體,希望以壓力團體嘅形式作為先導者,引導大眾對代議士嘅自發監察,鼓勵全民議政。我哋想凝聚社區嘅聲音,由下而上推動政制改革,從而令香港重光。眼見目前嘅社會情況,我哋提出五set 提案,希望拋磚引玉,引導群眾討論依場抗爭嘅前路,用收集到嘅民意令候選人承諾回應大家嘅訴求。
第一set提案就係特權法查警暴。
警暴相信係目前公眾最關注嘅問題。警方濫權濫暴,無法無天,大家都想懲治警暴,但又無計可施,佢哋既有政府包庇,暫時又未有另一個權力可以制衡佢哋。既然係咁,何不嘗試用權力及特權法?就喺呢個構想之下,凝光請咗張崑陽同岑敖暉同大家討論用特權法查警暴嘅可行性同出路。
張崑陽發言
向國際揭警暴證據
張崑陽指出,雖然國際關注香港人權情況,但奈何國際上如全球馬格尼茨基人權問責法,喺冇實質證據之下無法作出制裁,故此任何手段(包括民間提供/特權法等)可以揭示到警暴嘅證據都係有助國際間作出制裁行動。同時,香港不同單位亦可以製作不同報告,以證明香港警察有否違反濫捕 / 防止酷刑國際公約/公民及權力國際公約等。如果能夠成功令聯合國作出裁定,各國就可以於全球對黑警作出制裁。張崑陽特別指出立法會議員於國際制裁上擔任重要角色。佢哋於國際間係一個接收資訊嘅渠道,例如佢哋如何描述香港嘅情況,會直接影響國際對於香港情況嘅理解同睇法。事實上,外國亦曾約見香港不同派系嘅議員會面,以了解香港喺反送中運動下嘅情況。
新契機推國際戰線
國際戰線本來就係一個長期戰,雖然香港係有國際地位嘅大都會,但依然需要有不同政治運動、政治動能保持國際關注,國際疫情嚴重自身難保,加上美國國內大選將至,香港更需要新契機。故此,張崑陽認為通過利用特權法去揭示警暴惡行,或透過政府用不合憲手段阻止民主派系於議會內奪權,從而可創造憲制危機,皆能吸引國際注意以推動國際戰線。香港國際資金雲集,尤其美國資本,香港政治風波與外國資本息息相關,特權法更有可能製造契機逼使政府回應。
文宣、搜證靠手足
同時,張崑陽提醒香港人應善用文宣打輿論戰,目標係不能讓中國塑造道德威望站穩國際地位,向國際證明中國不可信,製造有利國際環境幫香港制衡中國。即使特權法通過,後續過程漫長 (例如1980南韓光州事件,至今依然未有定案),而且可預視會有有權力人士作假證供,包庇、阻礙調查等行為。故此民間配合亦重要,如搵資料配合搜證。
立會過半後需討論
當今局勢,如公民黨亦已願意否決財政預算,已證明此乃最大公因數。所以社會對立會過半後嘅未來路線作進一步討論可能更為重要,例如:迫使中共解散立法會出現憲政危機/再攻未來特首選委,希望去造就一個符合民意嘅特首。
總括而言,張崑陽認為通過特權法清算警暴短期內成效存疑,但重點在造就新契機打國際戰線,尤其現時國際疫情嚴重,美國大選將至,所以手足應盡量配合搜證調查警暴,可以揭示警暴嘅方法都盡做,為香港製造爆點吸引國際關注。手足亦應同時用文宣打輿論戰,阻止中國建立道德威望,否則香港處境更危險。
岑敖暉發言
立會揭警暴證據
特權法嘅執行應該毋庸置疑係大眾共識,岑敖暉認為問題在於特權法對於政治走勢 /警暴問題起唔到關鍵影響。再者有政權操弄,立會難以通過特權法,除非議會運作模式改變。但作為立法機關,有其官方地位、一切有文件紀錄,對於外國國會、政要亦意義重大。故此如果立法會可以喺制度內披露警暴嘅材料,對於其他戰線絕對有幫助。
警暴問題複雜難解
岑敖暉指出,現時運動陷入僵局,政府已熟習消解抗爭模式,需要有新舉動破局。而且香港政權專制屬性難改、由6月至今嘅處理亦己證明政權已將自身存亡與警暴掛鈎,同時亦已錯失黃金時間用現有制度方式追查 (point of no return),在現時制度下所有手段亦無法挽回香港人對警隊信心、威信、執法正當性。事實上,連北京亦明顯將管治正當性同維護警隊尊嚴連成一體,更光明正大將武警混入警隊執法。由此可見,由於警暴所涉及問題太深,範圍太大,事實上警暴再唔係單一嘅問題,係制度、政治屬性問題,故此不單獨立調查委員會,香港甚至已無任何單一機構有能力處理有關問題。
憲政危機推國際戰線
所以岑敖暉認為,今屆立會過半嘅重點並非在於政策落實/改變,而係造成憲政危機,雖然第一次選舉立會大型DQ嘅機會不大。反而喺過程中,港共會用言論試圖將民主派系議員污名。但當立會議員劃一地反對財政預算通過,迫使特首重組立會,出現第二次立會重選,繼而迫使政府以違憲手段阻止民主派系再次成功奪權 (包括大型DQ等)時,就會出現憲政危機。屆時就可以藉此引起國際關注,出現破局機會。但無可否認,此舉係一個結果無保證嘅操作,可能將香港推向另一絕境,但既然香港此存下去亦只會慢慢步向消亡,故此岑敖暉認為更加要孤注一擲。
手足最重要保命
現時疫情嚴重,岑敖暉提醒手足最重要係保命,幫輕醫護,否則香港社會危機將與外國現況一樣。總括而言,岑敖暉提出喺制度下無能為力,現狀之下香港係回天乏術。故此佢對立會嘅睇法係帶來「憲政危機」嘅變數,呢個變數係點無人知,甚至可能係極其兇險,但香港民主要成功,香港人係需要作出更大挑戰嘅嘗試,只有咁先可能存活。
凝光立場
總結以上,今次嘅討論會,要解決香港現時問題,兩位嘉賓都認為香港需要有一個破局嘅方法,可能係製造憲政危機,可能係用特權法揭露警暴問題嘅證據。凝光認同香港需要探求一個可行嘅破局之法,不論係制度內好,甚至係制度之外亦然,再次鼓勵大家可以係破局之法上持續不斷去討論。不過縱然大家路線不同,且特權法此路難行亦漫長,但兩位嘉賓都認同應該要做。就住警暴問題,如果可以喺制度下揭露證據,對於本土抗爭,以至國際制裁,亦係必不可少嘅一環。

