民主派35＋目標若果達成，第一件事，就所有今日聽聽話話嘅保安，特別係有警察背景嘅，炒曬佢！禁止擔任立法會保安任何職位。連掃地都唔會請你地。《僱傭條例》即時解僱，一蚊都唔賠，有爭議就上勞審見，等佢哋享受下香港先進法治勞審制度。
屈手、壓頸呢啲毒辣招數，係黑警慣常對付示威者嘅暴力手段。今日我地見到立法會保安，用同一種手段對付民選議員，任何一個香港人被施暴，即係香港所有人被施暴，更何況，今日遭到施暴嘅，係數以萬計、數十幾萬計嘅民意代表？
任由前警員擔任保安，等於軍管立法會。依班人，做警察嘅時候，唔會遵守警例，做立法會保安，就更加唔會「守規矩」。容讓黑警係立法會保安體制中出現，即係等於縱容黑警維持秩序為名，打壓民選議員為實。
立法會招聘保安守則入面，講明有3年紀律部隊經驗、中五或同等學歷就得，即係速龍響條街施暴三年，就可以入立法會繼續施暴。35＋並唔係一個容易達成嘅目標，但入到去，一定要用盡所有手段斷黑警後路。