【#大埔巴士事】一條一個鐘一班，看似與世無爭嘅巴士路綫，竟然成為北區同大埔議會之間又一次紛爭嘅導火綫。到底 74D（大埔九龍坑 ↔ 觀塘碼頭）呢條綫，應該何去何從？
【燈位】對於大埔新市鎮嘅朋友嚟講，74D 雖然要兜入白石角、科學園，但係因為上落少，又唔多燈位，所以時間差距唔會太大。加上佢返大埔方向飛起咗 74X 為人所詬病嘅鑽石山路段，彩虹之後就直上大隧，所以都有唔少朋友肯畀多 $4.7 上 74D。然而，政府呢期着手喺白石角創新路沿途路口裝燈，其中科進路口燈位已經開始運作，而科城路口亦都已經展開裝燈嘅前期工作。另一方面，大窩西支路近泰亨村同九龍坑 C 橋口亦都準備裝燈。呢六盞燈（計埋白石角雲滙出面嘅撳掣行人燈）對於 74D 行車時間同客量嘅影響都唔可以話唔大。
【總站】市場一直傳聞，當初將 74D 總站定為九龍坑而唔再遠啲，係因為九龍坑尚算大埔區範圍 *，唔入北區可以避免運輸署最棹忌嘅「多隻香爐多隻鬼」，更改服務唔需要受制於多一個區議會。北區方面想將 74D 拉入華明，其中一個理據係九龍坑冇正規嘅總站設施，巴士候命同車長休息都需要去北區區內嘅巴士站。查實政府起九龍坑轉角位起緊嘅和合石橋頭路靈灰安置所，已經起好咗一個附設嘅巴士總站，唔需要巴士再泊路邊；而預料都會設有廁所畀車長用。至於北區方面聲稱車長不滿九龍坑總站冇站長，其實車長會想有站長喺度，冇晒私人空間咩？而食飯方面，事實上 74D 啲車長通常都係做做下 74X 喺食飯前後開一兩轉 74D（冇記錯的話），夠鐘食飯架車就會返返大埔中心調回原綫（vice versa），或者喺做入九龍坑前 / 揸出觀塘之後喺觀塘碼頭食飯，大概就冇呢個喺九龍坑食飯嘅需要喇。
【紛爭】 面對北區方面拋出呢個議案，大埔區議員並冇本能反應地反對，反而拋出橄欖枝，運用體制內嘅權力邀請北區區議員上大埔交運會解話，並且喺公開尋求 74D 用家意見之後先表達立場。可惜北區方面對於 姚躍生議員 Manson Yiu 嘅橄欖枝似乎並唔領情，結果導致今次嘅紛爭。諗起早幾年大窩西支路爭取 73B 兜入去，時任林村谷議員陳匪灶良竟然係尋求陳帆用行政指令介入，立下壞先例，亦都加劇北區同大埔議會喺交通方面嘅矛盾。反之，今次姚議員主動聯絡鄰區議員參與本區討論，去處理跨區路綫問題嘅做法，值得以後各區效法。喺區議會屬下芸芸委員會嘅事務當中，幾乎只有交運會係會牽涉唔同地區嘅利益，其實係特別需要一個處理地區爭議嘅平台。
＊如果真係執着地方劃界的話，九龍坑落客站啱啱好過咗界屬於北區範圍；只不過九龍坑站附近有人住嘅地方都係大埔區範圍，除非你將橋頭路靈灰安置所計入去。