題為編輯所擬
曾幾何時我好鍾意足球，鐘意買嘅嘢、睇嘅嘢、儲嘅嘢、講嘅嘢都可以同足球有關，身邊嘅人都形容：「我嘅世界只有足球」，尤其喺我寫咗呢個page開始，我更加被認定我生命裡係唔可以冇咗足球。
但係過去呢一年，因為社運、因為疫症，我幾乎將最鍾意嘅足球一下子放低。就算有轟動轉會，你都無暇理會；即使有好睇戲碼，你都心不在焉；就算有波踢，你都冇心機踢，基本上都推晒；連有文寫嘅時候，我都唔係咁想寫。漸漸地，我嘅Page進入「有限度」運作；我嘅足球生涯都步入咗「半掛靴」階段。我諗，其實好多人都同我一樣。
以前我都有諗過，我到底幾時會唔再update 呢個page，又或者唔再踢波呢？我以為會好似啲球星退役咁會有一個確定日子，但原來我已經不知不覺咁步向緊。不過，姣婆守唔到寡，今日趁住有少少時間加仲未因疫症而再度封場，去到久違了嘅足球場，享受一下落場踩草嘅滋味。
有一段小插曲發生喺出發之前，我搵極個鞋櫃都搵唔到對釘Boot，我甚至連對鞋係咩色都唔太記得，唔係講笑。諗諗下先醒起，原來喺好耐之前某個嘅示威日子，喺開始之前偷少少時間去咗踢波，踢完放咗對鞋喺友人架車到，然後就去做嘢，講緊嘅我諗已經係7至8個月之前。
以前一個星期冇踢波都已經覺得耐，估唔到而家連自己幾耐冇踢波都唔記得。因為疫症，應該日日都要踢波嘅職業足球都可以三至四個月冇波踢，更何況係我哋呢啲業餘波友？
一班隊友大半年冇見，見返嘅感覺大家都唔同咗。以前本來好Fit 嘅隊友開始有少少「孕味」，而本來已經孕味濃嘅隊友，繼續佢嘅38週又N年嘅懷孕期。至於球技...唔好講啦，呢段日子大家都因為不同原因而少踢或者冇踢，莫講要踢出水準，夠氣夠力踢完場已經當你贏。以往可能你滿場飛，今日踢十令分鐘已經喘住氣向場波揮手嗌：「唔掂喇，換人。」友人可能揶揄你，叫你打少啲飛機，但其實你同佢都知道，其實唔關打飛機事，實情體力真係差咗好多。
如果要MK啲咁講係：「難道沒練習太耐，感覺都追不回來。」
個半鐘嘅比賽，隨住球場冇通知嘅情況下熄燈而結束。最後比數幾多？唔重要啦，都唔知幾時開始，有時踢波唔再係為咗要贏，而係為咗享受仲有機會落場踢返幾腳、幻想自己係美斯，但實際只係「連美斯」嘅滋味。感覺就係差啲，但FF 就係咁無限美。
「唉，而家疫症又爆，隨時真係封場，都唔知下次再踢係幾時。」友人食住飛波後煙說。
呢段日子嘅香港，真係好多嘢都話唔埋，話變就變，冇嘢你係知道；就算知，聽日都可以有變。但係依一刻我肯定知道嘅係：
好撚攰啊屌！
