（獨媒特約報導）武漢肺炎疫情自年初爆發，席捲全球，至今仍未平息。香港目前經歷第三波爆發，感染人數已突破4,000。疫情下人人自危，百業停頓，健身中心、遊戲機中心、遊樂場所、美容院等指定場所，3月時經歷42日停業，到7月第三波疫情爆發，又再被迫停業，現時仍重開無期。
多個業界紛紛促請政府提供協助，同時也有人嘗試自救。RMG泰拳健體中心負責人柯尊鼎指出，疫情期間生意額大跌八成以上，停業令再臨後，唯有推出戶外訓練課程，盼協助教練度過難關；但隨後政府又收緊限聚令至兩人，令每節課堂只能有一名學生，加上近日天氣炎熱，反應更是不理想。
柯尊鼎狠批政府防疫不力，「政治行先，抗疫最後」，但就要業界承受後果，又拒絕提供足夠支援，舉動「野蠻」，認為政府應該要給回「應得」的賠償，以防疫抗疫基金向業界發放20萬至100萬，「對我哋嚟講，呢個幾千呎地方，係呢十幾個freelance嘅全部，係我哋生活嘅所有。」
嘆境況入行廿年來最差 批政府無支援
踏入RMG泰拳健體中心，柯尊鼎為記者量體溫及消毒。柯表示，早於12月底傳出有疫情時，已開始進行清潔消毒，「因為我哋經歷過沙士」；農曆新年後準備好探熱器及消毒設施，因為「明白只要有一單喺我哋度發生，都可以話即刻玩完」。他稱不少學生稱讚中心環境清潔，奈何實在不敢出街，「學生唔係唔信任我，係啲香港人唔信任政府抗疫，佢哋唔敢出街。」
提起過往半年的辛酸史，柯尊鼎語帶傷感，嘆息連連。柯指入行20多年，從來未遇過如此慘烈境況，「我哋中心最正常嗰陣，夜晚一班起碼都26到30人一小時，但係2月份試過有幾晚，最旺嗰時7點半係得一個學生，甚至乎零都試過。」柯指中心原本有八名兼職教練、兩名文職及一名清潔員，其中一名文職已經離職，柯大嘆可惜，「坦白講好幫得手」；而教練全部沒有底薪，又因屬自由身（freelance），沒有強積金，只能透過「保就業計劃」獲發放一筆過7,500元補貼。
以為捱過42日停業令就可恢復正常，豈料7月又被政府「一嘢就搞掂咗」，「我睇到嘅唔係曙光，係更大嘅黑暗，更大嘅烏雲」。他認為政府的抗疫政策「20至30%係做俾人睇，70至80%係政治目的」，怒批政府把關不力，豁免指定人士檢疫，「點解中國三十幾個港口全部都要檢疫，唯獨香港呢個港口唔洗檢疫？點解中國大陸要強制香港人返去要檢疫，而香港人唔可以為大陸過嚟嘅做檢疫？」他指如果政府做足封關，仍無法遏制病毒，「其實我相信每一個香港人，都願意同你捱。但係依家似乎唔係囉，你淨係不斷叫我唔好乜、唔好乜，但係你自己就可以任意做好多嘢，其實成件事真係好好笑。」
柯提到涉及健身中心的確診個案，只於3月出現4宗，而且是追蹤患者時發現曾經到過大型健身中心，而非爆發群組感染。對於中小型健身中心從來沒有出現感染個案，卻被一併禁止營業，他感到不解，「香港政府可能覺得我哋係非主流項目，所以覺得係可以犧牲、可以停擺嘅，但係對我哋嚟講，呢個幾千呎地方，係呢十幾個freelance嘅全部，係我哋生活嘅所有。」
RMG泰拳健體中心負責人柯尊鼎
柯尊鼎指，包括他在內，目前很多行家都依靠積蓄維持經營，「有啲行家個中心比我更大、更有規模，都同我講話好慘，佢啲教練開始問佢借錢度日，成件事好愁。」柯估計行內約有7至8萬名從業員，包括全職、兼職、文職及管理層等，疫情下可能一半至六成人員失業，但「出面可以搵啲咩做呢？」
政府於第二輪防疫抗疫基金中，向每間合資格健身中心派發10萬元，但柯尊鼎認為只是「施捨」，中心一個月支出單是燈油火蠟就要20萬，還未計薪金，10萬元連交租都不夠。他強調政府防疫不力，有責任發放「應得」的賠償，「你喺完全唔了解嘅情況下，幫我哋決定咗要點做」。柯提到台灣政府抗疫經驗，「並唔係話台灣政府特別聰明，一個好簡單原因，就係每一個政客、每一個政府官員都要向市民交代；你做啲嘢出嚟唔能夠令人民安居樂業，你出年就唔洗選，下一屆就要倒台。」柯認為需要權力制衡，但刻下制度不斷被破壞，政府對於民望下跌無動於衷，「政府係可以完全唔理民意嘅，其實都幾無奈。」
推出戶外課程 炎夏反應不佳
為了維持教練的收入，及讓學員在疫情下保持運動，柯尊鼎推出戶外訓練課程，惟反應並不理想。柯解釋，戶外課程早於4月首次停業時推出，於公園授課，每節有一至三名學生，當時「2點幾3點一路去到7點幾8點，都有堂喺戶外度做，上一堂五、六百蚊，都叫可以維持生活」，「教練都好辛苦，冇冷氣，又要拎啲拳靶、拳套，同埋咁大支消毒噴霧，好辛苦先搵到卑微收入。」但到7月至8月，天氣轉熱，加上疫情令到很多人不敢外出，參加的學生便減少。
教練阿Ling（右）與學員Anita（左）為拳套消毒。
採訪當日，上課地點在花墟公園，室外溫度32度，體感溫度達37度。教練阿Ling帶備瑜珈墊、拳靶、拳套及一支消毒噴霧，在空曠地方與學員Anita進行訓練。每完成一節訓練，阿Ling就會為使用過的器材消毒。天氣炎熱，兩人不時補充水份避免中暑，公園內沒有太多人流。
阿Ling任職兼職教練9年，她認為「戶外訓練有好處有唔好處，戶外多啲空間，但係未必個個學生都接受到，加上夏天天氣真係熱，未必個個同學都接受到戴住口罩訓練。」阿Ling亦指，學員年齡層分佈廣泛，「冇可能叫一個老年人戴住口罩陪你訓練」。她指，現時平均一星期只有一至兩堂戶外課程，希望政府容許開放拳館，即使限制人數亦可，至少教練可在固定地方提供服務。
學泰拳約一年半的Anita指，於5月開始參加戶外訓練課程，「室內一班同學仔冷氣底下上堂，戶外出汗量大啲，訓練效率係唔同，比較鐘意小班形式教學。」Anita又稱讚教練的消毒措施做得十分完善，令她可以安心進行訓練。
感健身業意義大：生命影響生命
柯尊鼎提到，大眾對健身業存有誤解，印象停留在「呃人」、消費陷阱，或認為健身只是為了「夏天show隻手臂俾人睇」。他指行內的確有少數「黑店」，但「正正經經教人，攞個心出嚟，正常收費甚至便宜收費去從事呢個行業嘅人，係佔咗99%」。他又分享曾教導一名有頸椎及腰椎問題的長者，透過訓練增加肌肉量改善身體狀況；有人到中心打沙包洩憤，「香港人情緒問題嚴重，做運動可以釋放安多酚，打拳、打沙包都可以有效釋放情緒」；有學生有骨刺問題，打拳幾年後痊癒；他又曾將「雙失」少女培養為香港女拳王。
打拳對他而言，是「用生命影響生命」，非金錢可量度，「嚟上堂嘅除咗當我哋係朋友，佢哋係會衷心叫你一聲師傅，由心裡面尊重你。」他希望透過不同渠道，增加行業的透明度，讓公眾了解更多，不須再靠政府打救。