極權時代，連以市民褔祉為首嘅民生議題，都可以成為打壓工具。
武漢肺炎疫情爆發以來，港共政權已多次借故褫奪市民權利，打壓反抗聲音：包括限聚令、延後立法會選舉等。至近日，林鄭更表示待疫情穩定後，會落實使用「港康碼」，透過中國檢測機構實行DNA及資料送中，同監控無異。
我地堅決反對「港康碼」，同時希望以民間行動自救。因此我地近日同本地檢測服務公司合作，為市民提供武漢肺炎民間檢測，等有需要嘅街坊可使用安全而保障私隱嘅檢測服務。
面對民間自救行動，政權嘅反應，則係極盡其所能事去打壓整個團隊。
自上周四記招後，我地團隊不斷受到唔同政府部門針對：
1） 記招當日已有便衣警察係門外監視
2） 有民政處職員及不願表露身份嘅可疑人物監視同事，甚至跟蹤議員
3） 多次獲黨媒認證，今日《文匯報》更以整版A1抹黑本計劃
4） 政府官方回應計劃，警告我地可能違法
面對多方打壓，我地係呢到首先希望澄清兩點：
一、 本團隊進行民間檢測，並非推動全民檢測，而係為保障有需要嘅港人提供多一個選擇
二、 必須強調，整個檢測程序均合乎專業標準，亦有醫生轉介。但由於政權打壓，無論係合作公司、實驗室，以至醫生，整個計劃參與者都收到政治壓力。
反觀政府方案卻可能違反專業守則。根據政府新聞稿指出我地計劃缺乏醫生轉介，然而由官方推行嘅全民檢測計劃卻向醫務化驗師管理委員會要求豁免醫生轉介。
自疫情爆發以來，無能政府封關不力，防疫措施更係無用擾民。近半年黎港人一直只能靠自己，自發代購或派發防疫物品等。如今民間推行防疫措施，竟招至政權如此高姿態打壓，可見全民檢測計劃箇中必有蹊蹺。大家必須多加留意，香港人，只能自救。
當民生議題都成為政治打壓工具，正正係白色恐怖嘅開始——我地永遠唔知道下一步、講咩說話、做咩行為都可能會被針對、盯上。今日推行民間檢測不妥，聽日可能係派發防疫用品，最後可能連籌辦社區活動都會被禁，這就是極權時代。
但無論如何，希望大家坐穩，我地必定咬緊牙關，撐到最後，絕不退縮。