（獨媒報導）12名港人涉嫌觸犯內地「偷越國（邊）境罪」或「組織他人偷越邊境」，被關押於鹽田看守所，至今已有98天，並將被移送到檢察院作起訴。其中一人的女友Apple（化名）接受《獨媒》訪問時，形容男友天性樂觀、細心，而且「鐘意香港」；8月23日清晨，他留下「我好愛你」的訊息，從此失去下落，直到Apple從新聞中看到他的名字。
這98天，Apple並不好過。想念男友的時候，她會翻聽他以前的錄音訊息、看兩人的舊合照，叫自己「捱住」：「要照顧好自己、照顧好佢屋企人，大家情緒都好啲、時間日子快啲過，等佢返嚟就可以好似以前咁。」
距離重逢可能仍有好一段日子，但她相信男友會捱得過：「佢好堅強，我相信佢會返嚟我哋身邊。」如果可以，她想告訴他：「我唔會唔要佢，我會等佢返嚟。宜家日子可能難過啲，但之後會好起嚟嘅，因為有屋企人錫佢、有我陪住佢，我哋會幸福㗎。」
樂觀、細心、怕熱、搞笑——Apple眼中的男朋友
Apple一手抓住欄杆，輕巧地跨過去。正在海傍散步的人望過來，她也不在意，挑了一塊較平坦的石頭，坐下來看著海。「以前我喺附近返工，佢每日都嚟接我收工，食完飯就會坐喺度傾計。」
一年多前，Apple和男友在朋友介紹下認識，很快便走在一起。在Apple眼中，他是100分的男友——每天送她上班、接她收工，和朋友外出時會帶上她；她隨口說想去某間餐廳或地方，他會好好記住，計劃好路線後陪她去；女生每個月不適那幾天，他會親自切薑、煲薑茶，送到她家門口；她天生怕冷、他卻怕熱，Apple生病時他守在旁邊，熱得不停汗仍不敢開風扇。
「佢後尾同我講，『你病嗰日，係我人生中最難過嘅一日』。」Apple失笑：「佢冇講被拉嗰日、或者喺警署嗰日係最難過，反而係我病嗰日……」
說起男友，Apple的語氣特別輕快，嘴角總不自覺的上揚。她最愛形容他「搞笑」：「姨姨（男友的媽媽）有時會同我講男朋友細個啲趣事。佢細個比較活潑，有次姨姨叫佢『嗱，你唔好跳跳紮周圍走啊，一陣整親唔准喊啊！』點知佢行行吓『噗』一聲跌咗落地，跟住自己爬返起身，拐吓拐吓行返去媽咪面前話『媽咪，我真係好痛，我要喊啦！』跟住就『哇』一聲喊出嚟！」
Apple笑得眼睛瞇成一條線：「佢真係好搞笑！」
立場一致、尊重對方：佢話鐘意香港，香港係佢屋企
兩人是在反送中運動爆發後才一起的，政治立場也相同，故從不干預對方的決定：「我好清楚，無論我支唔支持，佢都會做佢認為啱嘅事。咁咪互相尊重，後續嘅事就由大家幫對方處理。」
去年男友被捕時，她最初嚇得頭腦一片空白，但很快便冷靜下來，立即找律師和聯絡男友家人。男友保釋出來後，她看到男友右邊身體的傷痕明顯多了，「我哋日日都見，冇可能唔知邊啲係新傷、邊啲係舊傷。」她逼問他受傷原因，他卻笑著轉移話題：「話『好熱啊好熱啊！去食嘢啦！』」
在Apple面前，男友總是嬉皮笑臉：「佢話我諗嘢比較負面，所以佢好多嘢寧願唔講。自己承擔到，佢就自己去做。」她形容，男友是個超級樂觀的「戇鳩仔」，「唔會諗太多，想去邊度就去，到發生事嘅時候先去搵方法解決」。
唯一一次他喝醉了，在Apple面前大哭，Apple才了解他心底的想法：「佢話『對唔住，你成日講好驚冇咗我幾年，我就笑笑口咁話幾年好快過。其實我都唔想咁，但如果真係好認真去講未來，我承諾唔到你啲咩。』」
她一口氣說了很多，幾乎把男友的話一字不漏的背出。「件事都發展到咁，其實佢都冇辦法。佢話佢鐘意香港，香港係佢屋企，咁……佢覺得自己做咗佢認為正確嘅事，但同時佢好對唔住我同屋企人，呢樣嘢對佢嚟講係一種煎熬。」
11月21日，多名家屬乘船到吉澳，在鹽田港對岸放寫上12人名字的氣球。（資料圖片）
男友離別前毫無預兆 23日清晨留言「我好愛你」
Apple最後一次見男友，是8月21日。那天他接Apple放工，之後在旺角逛了一會，到Apple說過想去的咖啡店吃蛋糕，又吃了壽司，之後送她回家。本來他們約好了22日再見，但當日Apple覺得有點累，著他不要來找自己：「我話『23號再見啦』，佢就話『好啊』，跟住就傾其他話題。」
「嗰陣冇諗過，原來之後冇得見。如果知道就會想見落去……」
Apple說，她和男友很少吵架，也從不會超過3小時不回覆對方訊息。23日那天清晨6時，男友傳了一句「寶寶，我好愛你」給她，之後再沒聯絡她。本來Apple以為他通宵打機，早上仍在睡覺，所以才沒有送她上班；但後來她傳訊息、打電話給男友，他也沒有回覆，於是她開始擔心：「出事了。」
問題是，她不知道男友出了甚麼事。她先聯絡男友家人，家人也不知道他為何失蹤；她想過報警，但要失蹤48小時警方才受理，「而且可能佢只係去咗玩。但以佢性格，冇可能唔話畀我知去咗邊……」
後來，她從新聞上得知男友的下落。最初聽聞有12名港人被中國海警拘留，她不覺得男友會是其中之一，甚至不太相信真的有香港人會偷渡；後來，有親中媒體報導12人的全名，她第一個反應仍是：「可能係同名同姓嘅人？」但理智告訴她，船上的其中一人就是她男友。
看到男友的名字時，她心底其實有點開心：「原來佢未死。」但她形容，隨之而來便是無止境的擔憂，心情像回到男友被捕那段時間：佢有冇被人打、幾時先出嚟？
「宜家好似重新經歷一次（忐忑的心情），但今次……已經90幾日啦。」
Apple手上一直戴著男友送的定情戒指。
首兩星期頹廢狂喊 為父母及男友家人重新振作
男友失聯的首兩個星期，Apple形容自己「全日淨係喊，出唔到去，返唔到工，唔食嘢」；每當她想像男友在看守所會有甚麼待遇，「就會喊到仆街」。
後來，她的家人忍不住開口質問她「到底要咁樣到幾時」，她才意識到不能頹廢下去：「我擔心男朋友、屋企人擔心我，嗰種擔心其實係一樣。……其實好無能為力，但同自己講『要照顧好自己、照顧好佢屋企人，大家情緒都好啲、時間日子快啲過，等佢返嚟就可以好似以前咁』。」
男友離開前把耳環、定情戒指等飾物全放在房間書桌上，Apple拿去他戴了數年的耳環，掛在頸鏈上。想念他的時候，她會翻聽男友以前的錄音訊息，又在社交媒體上貼出以前的合照：「逐啲逐啲po，彷彿佢仲喺度……對我嚟講（這樣做）係一種佢陪住我渡過呢段時間嘅感覺。」
直至兩星期前，男友終於寄來親筆信。他在信中提到自己「三餐定時」、「食好瞓好」，但Apple苦笑說：「緊係唔信啦。」不過，有信總好過冇：「起碼知佢人仲喺度、仲記得我，咁就好啦。……如果佢冇寫畀我，我一定好嬲，等佢返嚟養好身體就嚼死佢！」
為顧及男友家人匿名受訪 信男友「有日會返嚟我哋身邊」
Apple坦言，自己之前較少接受訪問，也不能在訪問時明言自己是誰的女友，是要顧及男友家人的感受。她指在事件初期，曾有記者到男友家外拍門要求訪問，令他們「擔驚受怕」；男友父母儘量避免接受訪問，是因為覺得自己不擅辭令、怕說錯話會弄巧成拙。
今次匿名受訪，Apple說是事先問准了姨姨才接受：「可以幫到佢（男友）幾多，我都會幫。」她說，現時只能不斷告訴自己：「捱唔住都要捱，捱得住先可以幫到佢、等到佢返嚟。」
前陣子，她拿了男友的生辰八字幫他算命，算命的人說他「傻人有傻福」，但Apple仍然半信半疑：「睇相啲人通常都唔會講到好差……」而且，還有另一件事讓她耿耿於懷：「個睇相佬話佢比較吸引男人，我聽完之後真係……啊！萬一佢喺（看守所）入面畀人蝦點算！？」
但她相信男友會捱得過這段時間：「佢好堅強，我相信佢會返嚟我哋身邊。」如果可以，她想告訴他：「我唔會唔要佢，我會等佢返嚟。宜家日子可能難過啲，但之後會好起嚟嘅，因為有屋企人錫佢、有我陪住佢，我哋會幸福㗎。」