文：王月山@《溯本尋屯》
今次第一次同大家見面，不如就同大家講下屯門嘅地理位置先，等大家對於呢個傳說中要「拎Visa」同埋「騎牛」嘅地區有多少少概念，歡迎各位苦主share呢篇文畀你啲朋友睇。又或者你自己住喺屯門，但其實都唔係好知嘅話，咁你都可以睇下，希望幫到大家。
話說香港人成日將屯門、元朗同天水圍痴埋一齊叫做「屯元天」，令到好多區外嘅朋友以為我哋三個地方就好似油麻地、尖沙咀同旺角噉樣，「油尖旺」三區，痴埋一齊咁近。
你話元天痴埋一齊，我都仲理解，因為天水圍係屬於元朗區嘅。但係屯門就完全唔關事，而且其實我哋三個地方一啲都唔近。
講面積，油尖旺區得6.55平方公里，而屯元天加埋係大約222.55平方公里。淨係睇個數，你都可以想像到其實屯元天每個地方可以距離好遠。就算講返屯門自己，喺兆康去屯門碼頭，唔計等車都要半個鐘，一定耐過你喺旺角去尖沙咀。
講交通，由屯門站去天水圍站，搭西鐵要8分鐘，如果你要去入啲，例如濕地公園，計埋等車閒閒地都要20-30分鐘；去元朗就更遠，西鐵要13分鐘，如果要落康樂路大棠路（aka元朗市中心）就再要駁程輕鐵，起碼都20分鐘走唔甩。比起油尖旺兩分鐘一個站，屯元天其實真係遠好多，更加唔好講西鐵本身就係班次疏到爆嘅交通工具。
你可能話，咁咪搭巴士囉！但可惜嘅係，而家貫穿屯元天唯一嘅巴士線係30分鐘一班，兜到傻嘅53號巴士。
咁如果喺市區返嚟呢？咁用巴士做例子，睇下由九龍返屯元天又係點。基本上，喺九龍入嚟都必定會經過長青隧道，之後就會到汀九橋。向左會上出名塞到爆嘅屯門公路，向右出就會去大欖隧道，之後先到元朗同埋天水圍。可以見到，屯門同元朗天水圍喺交通嚟講，好早已經分開兩邊，互不相干。
我諗，大家將我哋痴埋一齊叫嘅原因，除咗因為大西北喺香港人眼中都係郊區，要「騎牛」同用回鄉證，仲因為我哋都係用輕鐵作為主要嘅交通工具⋯⋯啩？
可能睇到呢度，你會覺得住咗喺屯門呢個咁偏遠嘅地方好可憐，前排更加有人喺forum話屯門係最垃圾地區之一。但係小編想同你講，住咗二十二年屯門嘅我，無論喺屯公塞咗幾多次車，定係每次同朋友喺市區玩完都係最夜返到屋企都好，我都仍然咁鍾意呢個要「騎牛」嘅地方。因為，呢個係我長大嘅地方，同時亦都有佢獨有而美麗嘅地貌。如果你肯花少少時間，去下屯門嘅小店、行下屯門嘅山、搭下輕鐵周圍去下，我諗，你都會愛上呢個地方。而且你亦都會明白，一個咁細嘅香港，同時存在住呢種大西北同市區嘅對比，係一件幾咁獨特同可愛嘅事。
我真係，好鍾意呢個地方。你，又明唔明？