全港最集中的九龍城公務員樓群即將重建，身為現任公務員的黃小姐對政府重建計劃做法感到非常憤怒，認為合作社公務員必須說真話，「無錯，係，政府可以強行將呢一班公務員趕走，但係政府已經日漸無統治威信，去到最後會點呢？去到國際媒體，人哋歐美會覺得點呢？」她又說，若果當年沒有第一代的公務員，就不會有現今的美善同道，而且就是因為一群公務員把樓宇保養得很好，市建局才會看上這地方，希望同樣作為長俸公務員的特首林鄭月娥「飲水思源」。
黃小姐不忿道，「喺米字旗年代，華籍公務員一直被外籍公務員低一級，特區政府經常講呢個不平等條約唔好，我哋依家（回歸後）會更好，但係原來個『更好』就係將啲舊嘅公務員趕盡殺絕，咁我就睇睇佢真係會點回應喇！」
她表示，特區政府要求公務員宣誓效忠是沒有問題，但宣誓效忠後卻把一群退休公務員、公務員及其家屬趕走，令她感到諷刺，「就算城市需要重新規劃或者重建都好啦，說實係咪真係要呢班公務員咁難做呢？一方面要公務員效忠，另一方面褫奪公務員本身應有福利？呢個會唔會係一個矛盾？」黃小姐亦質疑政府補償方案：「起合作社當時唔係淨係起棟樓，仲要幫政府修渠築路，起完要交返俾政府；我哋而家仲要俾地租，收咗我哋棟樓嘅時候呢啲點樣計先？」
重建計劃需要公務員合作社居民為將來的新居補地價，兩位退休公務員李uncle與葉先生均認為是褫奪了他們的福利，「我哋當時係自己向政府申請地，要俾錢嘅，有地價，要孭20年，當時發夢都諗唔到將來係要補地價。」葉先生悲憤地說，「我哋歷來咁愛錫棟樓，將佢整得井井有條，將佢保存得好整齊、企理，同同區樓宇相比永遠比唔上，係殘破舊。」
一生心血突然被奪走，葉先生形容政府做法「強取豪奪、非法、不擇手段」，「服務政府咁多年，政府簡直係無良。」
李uncle指為重建計劃爭取到底，不是考慮他們第一代人的利益，是為下一代着想。（照片由受訪者提供）
「我哋係付出咗一生嘅勞力，並唔係短暫，我做咗39年6個月公務員。」葉先生續說，「組成合作社要簽一張同意書，向政府借錢買地，分20年，加3厘息，喺人工扣，扣足240期，做到退休先可以擁有呢個物業。」
他指重建後的生活不會更好，政府是剝削他們，「我哋係業主身份，自己俾錢買地、起屋、設計，更加有感情。起一間屋，起一幢樓，都唔係一日建成，羅馬都唔係一日建成啦，係慢慢起，我哋喺度長年累月，累積心機落間屋到，係60年。」
「我哋好錫間樓，每5至6年做維修，整好佢，將佢現代化。我哋有閉路電視，有寬頻。（政府）用『（重建往後）單位數字多咗好多倍』呢一樣嘢嚟呃殺我哋一班退休公務員，呢個係一個地積比率問題，佢哋係攞咗我哋嘅地積比率嚟發展㗎。」
第二代居民Julia則指對合作社必然會有感情，形容當初第一代公務員居民興建合作社是一種成就：「當年第一代係做緊依家發展商嘅角色，起比自己住，但係間樓咁好要拆咗佢。」
她指，重建本意是希望改善社區，但現時的重建方案不但未有改善她的生活，而且令到她的生活質素更差，「香港仲有好多舊樓真係有危險，或者無乜維修，或者無升降機，（不過）呢度啲街都係比較企理，但係又要搞我哋呢一度，其他舊樓嘅居民有啲真係想市政局幫佢哋市區重建嘅，市建局又唔去做。」
現時九龍城公務員合作社的居民有四個要求和選擇：一、要求擱置計劃；二、爭取「原址原大」方案，即市建局要補償同區同等面積的單位，而不需補償金錢；三、搬到啟德新發展區；四、獲取金錢賠償後「離場」。
李uncle對「美善同村」的每一條路皆有情意結，皆因居民有份替政府修路。 （照片由受訪者提供）
黃小姐批評政府欲計劃將居民遷移至啟德做法可笑，「政府話喺啟德起一啲安置屋邨俾我哋，但係個面積就得3、400呎，居民就話可唔可以俾兩間我哋呀？佢話可以研究。問題就嚟啦，呢一個安置屋邨可能7年之後先搞得掂，呢7年就唔該你自己搵地方住喇，市建局就唔會支援你搬遷津貼、月租。」
「（居民）睇得出佢賠償金好低，街坊日後就要揸住呢一筆錢自己出去租屋，而家出面租金幾貴就知啦，然後捱7年，7年之後再用7年前嘅賠償金買返個居屋，有轉讓限制，租俾人又要補地價。租7年樓後，仲夠唔夠錢買返新起嘅資助屋邨呢？肯定唔夠。市建局而家所講嘅嘢而家都做唔掂。」
李uncle的女兒Cecilia主張擱置計劃，明言「完全唔想走。」李uncle則想離開，因為二人住6樓，李uncle年紀老邁，走6層樓梯很辛苦，「終有一日撐唔到上去。」他認為現時的政府是行政主導，擱置計劃機會微，所以他期望「原址原大」的方案，可以在同區居住相同面積單位，兼且能有升降機，可以讓他不用走樓梯。
不過「原址原大」實際可行性較困難，因為土瓜灣仍是舊區，沒有太多單位達千多呎，李uncle想了想，「唯有睇市建局嘅賠償合唔合理，（希望市政局）尊重佢自己嘅承諾（改善人民生活）。市建局最想嘅就係俾錢（賠償），賠償合理就ok，要遵守承諾。」
葉先生最希望保持「美善同村」小區的現狀，他從來沒有想過自己到了這個年紀，家才被拆，「『原址原大』都有個gap，有5至7年嘅時間搬走咗，呢段期間又點適應？講就話搬返嚟，但係呢一段時間可能已經適應咗第二度嘅生活，係咪又真係會搬返嚟呢？同埋啲傢俬、其他嘅設備又點？十年後又真係會返嚟咩？搬兩次咁麻煩？」
「依家起嗰啲都係納米樓，一間屋好細，我都希望有『原址原大』呢一個方案比我哋選擇，但係市建局（若果）話可以原區安置我哋，唔通俾返啲納米樓我哋？我哋唔係要求豪宅或者乜嘢，我哋係要求一個舒適嘅生活地方。」儘管葉先生年事已高，對他而言，行樓梯日趨困難，但想法與李uncle不同：「就算以後自己行唔到樓梯，可以買樓梯機用，好安全、好方便。」
黃小姐的態度比較強硬，她認為若果市建局最終的做法與自己希望的做法不相同，她亦不會離開：「我哋咪唔賣唔搬唔拆唔走！」
本文為九龍城區議會贊助，社區新聞工作坊學員作品。