宏泰閣居民 李俊豪
【獨媒報導】經過承辦商、物管、消防和警察等多方作供，宏福苑火災聽證會今日（16日）再有居民坐上證人席。宏泰閣居民李俊豪在大火痛失母親、兄長、15 個月大姪女及印傭。他在會上憶述母親被困初時，還叮囑他與大嫂預備奶粉給姪女；視像通話期間，他見哥哥不斷拍打昏迷的母親和外傭，直至電話電力耗盡。他述說時多番哽咽，另提到大維修期間母親不時投訴工程，盼委員會能還家人公道。「如果冇呢場火，佢哋4個唔會走⋯⋯我唔奢望未來生活會點，但希望有生之年幫佢哋發聲。」獨委會主席陸啟康回應李時一度哽咽，不能言語，大狀杜淦堃與旁聽席居民、記者都紛紛取出紙巾抹臉。
母最初來電囑備奶粉餵姪女
李俊豪和父母、兄嫂、15個月大姪女欣欣、印傭一家六口居於宏泰閣1907室，他今日（16日）於聽證會作供指，大火當日兄長、媽媽、姪女和印傭在家，至於他和大嫂、父親則在得悉大火後趕回宏福苑。他憶述母親下午4時許來電，稱見家中有煙，已打999報警，但未知發生甚麼事，亦指未聞警鐘和消防鳴笛。「佢仲調返轉安慰我，『得啦，咁早，消防會搞得掂，放心啦。』」宏泰閣不久後停水停電，母親來電指姪女肚餓，囑李先生預備奶粉。
李先生其後每隔15分鐘致電媽媽，「聽到佢嬲嬲哋，點解咁耐都無人嚟救㗎？」直到入夜，哥哥撥來視像電話，李先生見單位家人全躲於大房，單位全黑，「見到我阿哥係咁拍打我媽媽、拍打工人姐姐，抱住欣欣」，相信是希望二人不要睡著。其間，有學生記者拍到李先生與大嫂在火場封鎖線外的畫面，見二人不斷對電話叫喊：「媽媽喺度，叻叻呀欣欣，叔叔喺度，OK㗎，得㗎……」片段早前在網上廣泛流傳，聞者心酸。
9時衝入封鎖線求助 聽見前線消防員答「真係攻唔到」
「（晚上）8點幾有消防打畀我，叫我阿哥留意電話，話佢哋隨時可以上到去，所以 FaceTime半個鐘之後停咗一陣，睇吓會唔會有消防打畀佢哋。」直到晚上9時至9時半，李先生再與家人視像通話，形容家人當時好緊張、「悲鳴、憤怒」。他向封鎖線警員展示電話畫面，獲帶往見指揮官，對方記下資料，指會立刻再請消防協助。焦急的李先生再衝入封鎖線，找到消防的指揮車求救，卻聽到前線消防員在無線電回答「宏泰14樓真係攻唔到，好大火」。李先生當刻無話可說，只能繼續看着電話畫面，與大嫂一直呼叫家人，直到一直撐住的兄長在鏡頭前倒下，直到母親的電話電力耗盡。
憶母和兄長均關注大維修 曾向部門投訴無果
獨委員首席代表大律師杜淦堃指出，李先生向獨委會提交的表格上，寫到對屋苑的多個觀察，包括工程公司霸道、工程顧問有問題，以及懷疑區議員與法團有不尋常關係等等。李先生回應提問時指，上屆法團主席鄧國權與大維修總承建商「宏業」簽約後，不少居民對此有意見，希望召開業主大會，「奈何幾次都唔知點解開唔到」。他又指一家人中，以母親和兄長最積極關注大維修問題，「聽我媽講，開會有好多唔識嘅人入咗去…… 我媽試過同 ICAC、民政處投訴，佢哋通常都係話你業主就跟返（建築物管理條例）344章。」去年兩次十號風球過後，居民要求「宏業」修補被吹爛的棚網，事後「宏業」職員曾向李先生的母親表示棚網有合格證書。李先生則不時見到工人在籃球場吸煙，與工人乘搭升降機時亦會嗅到煙味，並由母親直接向「宏業」投訴。
盼有生之年幫摯親發聲 陸啟康哽咽感謝作供
作供期間，李先生多度哽咽，強忍淚水作供，尾聲時訴說心聲。以下為原話紀錄：
「我住咗宏福苑40年，宏福苑嘅花草樹木、公園仔、籃球場……甚至每日落樓一陣涼風，都陪住我成長，對我嚟講係刻骨銘心時代嘅記錄。如果無大維修的話，其實唔會有天價工程；如果唔係有呢個工程，如果政府認真去聽，如果佢哋認真回應居民訴求，可能避免到呢場火。如果無呢場火，我會繼續住宏福苑；如果無呢場火，佢哋4個都唔會走。
所以，我想大家盡量將真相還原，還佢哋一個公道。我唔奢望我將來生活會點樣，但希望有生之年幫佢哋發聲，因為我覺得呢份憤怒、呢份痛、呢份唔甘心，唔係代表我自己，係代表我媽、我哥、欣欣 工人姐姐，佢哋永遠都講唔到嘅說話由我轉達出嚟。」
獨委會主席陸啟康感謝李先生作供時，指委員會已聽到對方的無奈和痛苦，之後一度哽咽，幾秒不能言語，稍後指委員會將盡全力還原真相，指「委員會對你哋所受嘅痛苦，我哋明白。希望我哋依家做嘅工作，可以令你哋有信心」，寄語李先生與家人能克服傷痛，相信很多香港市民都會支持他們。此時，大律師杜淦堃與旁聽席上居民、記者都紛紛取出紙巾抹眼鼻。
宏福苑火災獨立委員會 聽證會｜第十三日
FaceTime睹四摯親最後時刻 宏泰李先生痛陳不甘心：盼有生之年幫佢哋發聲
外牆打鑿公司承認完工後無拆封窗發泡膠 稱是老闆指示
前法團委員倡動用《國安法》查黃碧嬌 陸啟康：我哋無權
媽媽、兩外傭罹難 閉路電視見濃煙數十秒門縫攻入客廳
家屬憶述開會質問冇分3期搭棚 宏業覆法團前主席冀提早完工
母親到黃碧嬌街站申資助變簽授權 居民：區議員應中立
宏福苑火災獨立委員會 聽證會｜第十二日
至少4人拒作供 陸啟康稱知悉升級聽證會訴求 惟過早公布決定「唔聰明」
宏昌閣死者生前報警稱「好大煙」 警四問需否消防協助 終覆「有需要再打嚟」
副消防總長指世上未有正式滅火無人機 網上影片經生產商大量剪接
粵援未南下 消防指技術語言未相容 遇險時內地不講「Mayday」說「呼救」
999駁消防最長等15分鐘 副消防總長稱當日全港平均等58秒
坊間對死亡數字存疑 警方稱不能百分百確認 但無證據多於168人
多人未及轉駁消防便斷線 無硬性規定如何跟進 警可傳真、電郵、致電
靠拍攝600次電腦屏幕傳達求助資料至現場 篩走重複剩300個案
居民求助無指引提安全建議 為何回撥才提醒？ 副消防總長：要衡量儘快告知前線
全面疏散無告知求助居民 杜淦堃連番追問 陳健波一度叫停