美蘇兩國冷戰，大家有無諗過原來一日最衰都係美國提出左一個比錢嘅計劃？小小國策足以掀動全世界、帶黎長久深遠嘅影響。喺眾多政策之中，經濟援助嘅爭議似乎最小，但原來佢就係冷戰嘅起因。
話說1947年，啱啱打完二戰，除左美蘇之外，大部分國家都疲弱到食都唔夠食，連英國都要行糧食配給，茶葉都要由政府分比你啊陰公。呢個時候，美國總統杜魯門就企出黎，推出圍堵政策，即係幫助所有反共國家。佢條o靚美國國務卿深知佢心意，推出左馬歇爾計劃：
美國向來係正義嘅代表，佢每個行動、每句說話，都係為左地球好，「提供人道救援及經濟援助」。所以今次呢個馬歇爾派錢計劃，係開放比所有歐洲國家，就算蘇聯呢啲踩界嘅都包埋，你都咪話唔大方！
但係我要強調一樣野：美國唔係正義，佢徹頭徹尾係個超級自私鬼。
呢個計劃用兩個字概括：狠毒。三個字：超狠毒！話美國趁火打劫一啲都唔過分。二戰期間，美國工業生產已經佔全世界三分之二，成大半個地球都比佢食左，工業發展咁把炮，美國梗係同愈多國家做生意愈好啦。至弊呢個時候，歐洲國家打完仗都七勞八損，個個都閂埋門唔同你做生意，又關稅又quota呢樣個樣，總之所有阻止貿易嘅措施都做齊！美國佬都咪話唔閉翳。
馬歇爾派錢計劃，一共派左136億美元（係美元！）比17個歐洲國家，係人聽到都心動。不過街市都無咁大隻蛤乸隨街跳，國際舞台更加無可能。要參加呢個馬歇爾計劃，係有附加條款：購買一定數量的美國貨、撒除貿易壁壘，同埋放寬外匯管制。
原來派錢計劃背後，都係美國嘅陰謀！
咁樣嘅附加條款令美國商品喺國際自由流通，美其名叫經濟援助計劃，難聽啲叫「經濟入侵計劃」，趁歐洲病、攞佢命！不停傾銷啲貨比佢地，1950-58年美國流入意大利嘅資金就上升左足足六倍。自從歐洲拎左美國啲錢、受左佢嘅恩惠之後，就被「美國化」（Americanisation)，乜鬼野麥當勞呢啲大企業入侵西歐，汽車、飛機全部都係made in U.S.，正正係多得呢個馬歇爾派錢計劃，美國先建立左霸權。
就咁聽落，其實都唔太差啫，做生意呢家野從來都係互惠互利架喇！咁你就真係太低估美國嘅外交手腕了，因為看似簡單嘅馬歇爾泵水計劃，背後隱藏住極大嘅政治陰謀。
因為對象開放比所有國家，但係受惠國必須主動申請。咁蘇聯呢個共產大佬係拎定唔拎呢？蘇聯拎左，國威盡失，所以佢係無理由拎架喇。佢唔拎，咁佢啲跟班呢？東歐國家都剛剛經歷完戰亂好慘架，最終蘇聯轄下嘅國家無一個拎個筆「贓款」，大家諗都諗到，如果東歐都拎，就係落蘇聯面子。最終呢個馬歇爾派錢計劃完美地逼使蘇聯又派錢比東歐（同年，蘇聯推出莫洛托夫計劃），並且將分裂歐洲嘅罪名推比佢。
「我當初係開放比所有歐洲國家架，係你地唔拎咋」
然而，美國啲附加條款貌似促進經濟自由，其實又係唔係？關稅、配額、外匯管理呢啲都係國家主權，當初一味抹殺呢啲政策，到左今日，歐洲成為全球最自由流動嘅經濟體，但係當補貼都要齊齊做個陣，國家根本無曬主權去實行經濟政策，終於搞到英國反枱、唔玩啦。
國際之間永遠無正義，派錢永遠唔係人道考慮，大國嘅所有決策都係諗過度過、益返自己嘅陰謀，所以，世界嘅人民當心了，唔好隨便接受大國嘅錢。錢買到嘅野，往往超出你想像。