在蘋果日報和壹週刊有關「BNO永續簽證長住英國」的報導後，包括我在內的不少網民和專頁都有討論這個報導，而受訪者James Chan亦在「香港人在英國」專頁上留言回應，轉錄如下︰
James於回應指出，「無法例唔比你搵工見工」，「有人請就可以申請工作簽證」。但翻看報導及訪問片段，連「工作簽證」四個字都從未出現，若James認為訪問片段「大概意思响到」，只是缺少了部份細節，但回應內容又與訪問片段截然不同的話，那麼 James明顯已經搬了龍門，轉了口風。
「攞BNO 過英國揾工，有乜問題？唔得咪過德國法國囉。」的確，持有BNO到英國找工作不是問題，但由於BNO不具居英權、居歐權，在英國以至歐盟工作的話必須獲得相關的工作簽證，若逾期居留、非法工作的話，或會觸犯相關法律，甚至涉及刑事層面。
再者，James在訪問片段中提到「咁佢一路又唔俾你chop永久居留，但你BNO可以周圍去㗎嘛，等於英國passport一樣，佢又唔趕你走嘅，你又照打稅嘅，咁你同居民有咩分別呀？」最大分別在於，若BNO持有人不具合法簽證定居英國，其實連供NI的資格也沒有，若BNO持有人只以旅客身份逗留英國超過180日，即屬逾期居留，英國政府有權將任何逾期居留人士遞解出境並遣返原居地。
BNO上注明 “THE HOLDER OF THIS PASSPORT HAS HONG KONG PERMANENT IDENTITY CARD NO XXXXXX WHICH STATES THAT THE HOLDER HAS THE RIGHT OF ABODE IN HONG KONG. ”，目的就是一旦持有人被遞解出境並遣返原居地，相關政府人員可以從其護照得悉，須將該人遣返回香港，以免變成國際人球。
註︰原來的訪問片段有關BNO部份，逐字轉錄如下︰
「講返BNO呢樣，佢地其實大致上喺英國呢啲議員、政客係同意係應該俾香港人有居留權喺英國。因為佢地唔相信英國人會走過去嘅，佢地唔相信香港人以香港人嘅生活，佢地都了解到嘅，英國有好多香港人唔會過去嘅。」
「歷來英國政府係唔係太過覺得有一個問題，而但係當時如果你大大聲同普通嘅一般市民而佢地亦都唔了解香港嘅情況，唔了解大陸嘅情況，唔了解同英國政府、香港政府、各方貿易同埋政治關係嘅。純粹突然之間你話有咁多人，六百萬人喎，嗰陣時幾多嗰陣時我哋講緊四百萬人，四百萬人喎可以隨時過嚟？咁你嗰啲極右派咪可以攞呢樣野嚟搧動囉。所以佢哋嗰陣時喺國會裡面係無論如何唔可以用呢啲字眼去批嘅。但係，你唔好理國會嗰邊係共呀保守黨、係工黨、係民主黨，佢哋行埋一二角嗰班人唔係好似香港㗎，香港班打交㗎嘛，佢哋唔係㗎，行埋咗大家係死黨嚟㗎。咁佢地就傾掂左數啦基本上，就係用佢哋嘅傳統做法︰當睇唔到，當睇唔到。如果萬一香港人攞住BNO決定留低喺英國嘅，佢咪繼續申請囉，佢每次申請只要佢唔係攞緊綜援，只要佢唔係用緊國家資源，尤其是如果佢係度開落生意，做嘅嘢係有貢獻嘅有納稅嘅，咁何樂而不為啫？咁佢一路又唔俾你chop永久居留，但你BNO可以周圍去㗎嘛，等於英國passport一樣，佢又唔趕你走嘅，你又照打稅嘅，咁你同居民有咩分別呀？」
「總言之你期到你再申請囉，如果唔係你咪出去兜個圈返嚟囉。你知唔知香港有幾多外籍人士喺香港攞住三個月visa喺香港係住咗十年八年㗎？」
「我識有一啲呀係耐不耐『喂你去邊呀？』，『我過澳門呀』，『做咩呀？』我話，『唉三個月又到啦，又要過去打幾日轉一返返來咁又又又入左三個月囉』。
都係嗰句政府部門嘢，無人比壓力佢地去做事呢，政府部門係大致上係唔做嘢㗎嘛。我哋大致上喺英國嗰邊呢就好相信呢佢會用返佢呢個，呢個佢舊橋嚟嘅，英國好多時候有啲人呢過咗嚟英國，佢係黑市過嚟嘅，但已經嚟咗好耐，仔女都喺度生，跟住佢地就由佢留由佢留，總言之到時到候你簽紙，到時到候你申請，到時到候你咪出去法國度打個轉返嚟囉。嗱咁我又chop過囉。即係總言之你唔好有案底，總言之你唔好攞綜援，呀，就由你㗎啦。咁我覺得佢哋當時嘅態度就係話如果萬一呀香港淪陷呀，咁呀大件事咁啦，都唔會走到一百萬人過嚟嘅。十萬八萬我地處理得到嘅，歐聯又可以幫我地散一部份吖嘛。」