李家超公佈所謂嘅讓步，包括將移交罪行刑期門檻由3年變7年、啟動程序時候加入更多限制、加強保障疑犯利益，再喺政策聲明表明移交逃犯請求必須由能夠代表中央嘅機關提出。
政府睇落好似聽民意，但個啲真係叫讓步？
就算門檻好似高左，「送中」嘅本質同內涵冇變過。唔通換左種罪行，你就會相信中國個套「陽光司法」？唔通提高到7年門檻，中國就唔會換個罪行告你、引渡你？
更何況，今次修例唔只「送中」，係直情可以送你到世界唔同嘅極權、專制國家，亦都令香港陷於無盡嘅政治風險當中。
舉個例，泰國前首相他信成日都鍾意喺香港，修完例後，泰國政府就好易簡易去要求特首啟動引渡程序，將涉嫌貪污他信引渡返泰國。但明眼人都知道，呢個指控有政治動機喺後面，如果特首唔啟動或法院否決申請，會唔會令港泰或中泰關係變差，搞到好鍾意去泰國嘅香港人冇E道用呢？
同樣道理，就好似之前沙特阿拉伯有兩個女子逃亡到香港，咁係咪沙特政府又可以超低門檻去申請引渡？否決左，係咪又會令香港承受更大政治風險？
都仲未講到，如果中東地區又因為遜尼派、什葉派既派系衝突，要求香港政府引渡逃亡左既人返去，政府講明唔會因為宗教原因引渡，咁會唔會令香港承受埋宗教衝突帶來風險？
降低引渡門檻，到時唔單只捉蟲，更加係令香港承受更大政治風險，咁又何苦呢？
我地今日討論嘅議題，唔應該淨睇中國，而係應該將視野放大、放遠。如果第時香港因為修例降低門檻面對更大嘅政治同保安風險，想請問，到時係咪林鄭同整個班子承擔責任？
一時修例可能好爽，但香港後患必定無窮無盡。
9號，大家點都要出來行，香港政府、保皇派肯定唔會人數改變決定，但外圍政治形勢就肯定會睇住香港人嘅反應係咪會好強烈。要人地幫你、救你，首先都要自己救自己先。