香港依個彈丸之地可以做嘅嘢唔多，行街就成為咗我地日常生活做得最密嘅消閒活動，而旺角絕對係其中一個最多人嘅地方。對我嚟講旺角要乜有乜，平貴真假一應俱全，行到餓又可以掃下街，真係可以媲美台灣夜市。
不過十個行過旺角嘅人八個都經歷過一個問題：人有三急。唔知係因為人太多路難行定係廁所分得太散嘅問題，每次我喺旺角一急起上嚟就有一種好驚瀨嘅感覺，特別係家樂坊比星巴克同H&M玩哂之後嗰頭真係唔知仲有咩廁所可以去。有一次我啱啱喺星巴克一上返行人路就急尿，落返去搵完一輪先發現咁大間鋪廁所都冇格。望住行人專用區嘅人海，我唔知膀胱僅餘嘅容量夠我喺個人海當中磨幾耐，我即刻諗成個旺角到底有咩地方係有廁所，最後發現最近都要去到朗豪坊--我知行人專用區間百老匯有個廁所，但係一嚟人好多連男廁都要排，二嚟佢真係好撚臭，臭到每次入去我都要閉氣。
喺家樂坊行去朗豪唔係話遠，但每次都要行好耐：唔知點解個個一到旺角就好似中咗魔咒咁行路會比平時慢幾倍，明明五分鐘到嘅路程可以行成廿分鐘（當然你可以話急尿嗰陣時間過得特別快，依樣真）。結果我到朗豪嗰陣己經係急步跑入去，之後發現仲要電梯上多層先有男廁，最後我喺廁所扯開（冇錯，真係扯）褲頭鈕再拉開拉鍊，一放小毛出嚟嗰下佢已經急不及待咁屙出嚟，我真係唔敢想像遲多一秒會點算。
太陽未落嘅旺角已經咁危險，但過咗夜晚十二點嘅旺角先係真正嘅「急尿修羅場」。當朗豪同新世紀嘅廁所唔再開，本身已經小廁所嘅旺角就更加令人絕望。有一晚同朋友喺尖咀飲咗幾杯之後上的士返旺角轉車，點知上車冇耐又開始急尿。喺新之城落車之後我原地轉咁個圈都唔覺邊度有廁所比我解決，搵咗好耐先記得新之城後面，十八座狗仔粉對面間24老麥有廁所可以去。過完一條條嘅馬路，爬完M記條樓梯（唔知點解旺角啲廁所係都要你上上落落先去到），我再一次喺瀨之前嘅一秒戰勝尿意，保得住我條褲同底褲嘅清白。
如果下次有旺角區議員政綱係增加廁所數量或者爭取商場廁所24小時開放，我包保我係第一個幫佢拉票嘅義工，就算佢係民建聯都咁話。唔好話我親共啊，當你急到就瀨嗰陣有人比間廁所你去，我諗就算佢要你同蔣麗芸扑嘢你都會肯。
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材