《大師兄：洗腦課程（二）》
上集提要：本皇參觀完洗腦課程畢業典禮，呀星條蛋散成功哄到大師兄同其他幾位同事借財仔去玩呢個ＰＫ課程。
據我所知呢個課程，係受到多間國際機構一致好評，認為係訓練領袖嘅最佳出產地（吹到幾Ｌ大）
大師兄經歷咗一星期四日，每日至少三小時，有時至於連星期六，日都要返埋，大約一個月嘅訓練。
大師兄終於脫胎換骨！
由一個卑鄙嘅仆街變成一個愛與和平兼備嘅聖人！
【你係咪傻Ｌ咗？】
體驗到畢業典禮有幾咁恐怖，呢次大師兄畢業我都老虎蟹都唔去
（提提大家，上次畢業典禮完咗，在場已經有人因為太感動而立即表咗名）
幾日後大師兄，約哂以前班朋友出黎食飯（包括我）
當時大家心諗：「喂，我地明明已經無利用價值（即係拒絕左佢嘅銷售），點解會約我地嘅呢？」
大家就抱住一個「睇你搞邊科」嘅心態參加當晚嘅飯局。
遲到大王嘅大師兄竟然早到拎埋位，叫埋嘢食等我地開飯，當時已經覺得好恐怖！
本來諗住閒話家常先，誰不知大師兄立即比油踩入直路！
大：「我知道我以前做過好多錯事，令到大家好擔心我，不過我依家醒覺啦！我唔會再好似以前咁，我明白到自己嘅暗陰面！」
（當時大家瞪大隻眼望住大師兄心諗：你係咪傻Ｌ咗？）
大：「我真係好希望你地都可以一齊去體驗到，呢種真正了解自己嘅感覺呀！」
個陣我同大師兄一齊工作，從佢眼神我睇得出，佢唔再係個種純粹Sale嘢嘅狀態，佢絕對係講緊真心話。
因此我覺得更加恐怖！一個平時咁ＰＫ嘅人，突然講呢種神聖說話，我一度懷疑佢係咪知道自己有絕症。
佢的確係，不過係心理上個種。
【病入膏肓】
「我以前個種性格，係唔好架！我知道架！但我控制唔到，因為我無去了解過自己。信我啦，好無呀！我真係覺得呢個課程係幫到你地架。」
如果大師兄只係單純為錢，我反個白眼就算，但依家見到佢個種信念嘅強大，我的確表示擔心！
佢馬上向我地每個人送上一個擁抱，一個溫暖嘅擁抱
「我當你地每一個都係朋友黎架！」
大師兄眼角，竟然有滴淚水！！
大師兄離開後，我地立即開咗個緊急會議，一致認為大師兄已經進入一個極之恐怖嘅國度。
佢透露過先前借左個幾皮嘢黎參加呢個Ｘ街課程，佢仲會繼續借落去，因為佢玩緊個係初階（叫唔知乜７領袖課程40）
仲有中階，進階，高階。
唔理你咩階，總玩到你Ｘ街。
【媽我好Ｌ驚】
正當大家諗緊點樣可以救返大師兄，以免佢太過泥足深陷之時。
大師兄致電比我：
大：吹，我知道你對我好有意見，但我真係好想你成功架。
吹：呀……
大：你知道呢樣野對你有好處，不如你都去參加40啦？
吹：嗯……
大：咁你考慮乜？
吹：錢……
大：我知道你唔夠錢，你借住錢先你囉！
吹：下！？＠＠
（如果大家唔記得呢句野，可以睇返上一集）
#大師兄洗腦課程一
天呀！！！！佢真係痴Ｑ咗線呀！！！