搵到主好人家入in house（企業內嘅傳訊部），係好多公關做咗幾年後嘅夢想。年約30嘅Mentee C最近去咗一間公營機構做Assistant Manager，跟住佢嘅係兩個40幾歲，喺公司其他部門做咗十幾年，但乜公關經驗都無嘅下屬。有時呢啲人會俾人叫做「老油條」。Mentee C要同呢兩個下屬合作，已經唔多愉快。而最近發生咗一件事，更加令佢大開眼界。話說有個活動， 要人遞咪俾台下觀眾， 其中一個下屬竟然話：「 呢個唔係我工作範圍，我唔會做㗎。」薄皮嘅Mentee C一時唔知點反應，唯有自己去做，不過條氣就一直都頂實。
依家好多時年輕嘅主管都需要帶一啲年紀比自己大一截嘅下屬，而對方往往都唔係咁願意合作。好多人認為在中國人社會，論資排輩係生活嘅一部份。但我唔明點解個社會常態一定係要年長嘅話事或教訓年輕嘅 ，而非以理及能力服人。因此，年輕管理者帶住人生經驗較多嘅下屬，甚是艱難。 不過現今世界變化得太快，需要好多「跳出框框嘅思維」(out of the box thinking) 。最近有一個研究發現，越少經驗嘅人，由於包袱越細，往往越有創意。所以現在經驗需有用，但已唔及20、30年前值錢。
遇到呢類唔合作嘅「老油條」下屬，其實同領導任何人一樣，就係要軟硬兼施。硬嘅就係訂立一個standard，清清楚楚、明明白白咁令下屬明白。每當下屬嘅表現唔到位，做領導嘅就應該要當面指出。軟嘅係讓下屬睇到一啲自己能夠做到，但卻做得未能達標嘅地方， 並讓佢知道點樣可以達標，咁樣先可以令佢心悅誠服。