Fallout 76 劣評如潮，係一面倒嘅劣評。
我身為Fallout嘅死忠，玩Fallout 3、New Vegas、4玩到好似美劇 “Westworld”啲人類咁投入，每個結局都要爆兩次那種。所以Fallout 76雖然劣評，但其實冇諗過買唔買，只係有諗過買唔買pre-order版。Pre-order要59.9美金，真係好貴，於是我等正式出咗之後，先喺香港買零售版，三百幾蚊港紙，至少平過Pre-order，萬一中伏都冇咁傷。
講番正題，我而家玩到Level 45，應該有資格評論Fallout 76好唔好玩了。
我嘅答案係：遊戲界嘅《阿嫂》終於誕生了。
《阿嫂》係被 史兄 條PK譽為「港產爛片高峰」嘅爛片。史兄講嘅爛片有呢五個特點：
(i) 套戲超級唔好睇
(ii) 同預期相差太大
(iii) 團隊（特別係導演）眼高手低／掛羊頭賣狗肉
(iv) 劇情不知所謂
(v) 中途有想離場、完場有想界櫈嘅感覺。（史兄，2018）
Fallout 76同《阿嫂》共通點，就係中晒呢五點，卡士大、雷聲大、冇貨賣，而且內容硬膠到超出人類想像，而且你到「結局」會吹到啤一聲咁爛。我到而家都未界凳離場，主要係因為我係近乎盲目嘅Fallout死忠，死忠程度甚於我對我女友，所以幾伏都仲想頂到結尾。
言歸正傳，Fallout 76其實係用單機神作Fallou 4引擎開發嘅MMORPG。相傳當年Fallout 4推出嘅時候令Pornhub流量大跌，都算係一隻AAA級大作。到Fallout 76，事前B社宣傳話係多人同時玩嘅Fallout，睇啲宣傳片講到好勁咁，有人話似係Fallout 版Monster Hunter，甚至有人估係Fallout版食雞。
到真係推出嘅時候，全世界幾乎所有打機Youtubers、討論區、Game評都係一面倒怒diu。
究竟Fallout 76衰乜？我觀察係咁：
1. 多bug：Fallout有bug唔係咩新聞，但都係要批評，佢初期啲bug多到啲Youtubers可以整好多條短片放上Youtube。呢啲bugs後來在12月的patch之後好了一點，但感覺就好11推出時(唔係BETA版)仲好似測試版咁流，你收人US$59.9，但推出隻好似未完成嘅game咁。
2. 冇NPC：Fallout 76設定係核戰廿幾年之後，理論上成個西維珍尼亞州嘅人類死晒，得番啲屍鬼、變種人同機械人。咁即係話個遊戲係一個NPC都冇，冇NPC嘅後果，係玩家去到呢個open world，除咗同server嘅玩家之外，係冇任何人類角色同你講嘢！冇人講嘢，咁個故事同埋啲任務就只能透過無止境咁多錄音帶、筆記、電腦文字紀錄嚟交代，而唔係由NPC交代，咁就弊喇，你去到個open world，絕大部份任務只能夠係由文字帶出，而冇任何角色叫你做嘢，感覺就好似玩閱讀理解咁，唔悶就奇。（懷念Fallout 4可以同你調情嘅異性NPC，仲有那些各有性格同苦衷嘅角色嗎？）
3. 玩家溝通困難：理論上Fallout 76裡面所有人類角色背後都係真人玩家。問題嚟喇，除非你早已經約好朋友來玩，否則你都會期望有機會同其他玩家溝通、組隊、互殺，但個遊戲嘅玩家之間只能用咪講英文或強國話真人對話，唔可以打字，玩家之間，如果唔想對住個咪開聲，只可以用幾個表情符號，咁其實係溝通唔到。你淨係討論下個打怪嘅目的地，都討論唔到。溝通唔到嘅後果，就係server上充斥住互相冇溝通嘅玩家，好寂寞。
4. 毫無故事：雖然係MMORPG，但都應該有啲有意思嘅故事同任務可以留住玩家唔log out。但呢度嘅所謂故事，可能因為做唔切、可能因為要慳錢、可能因為唔想已組隊嘅人用太多時間睇同做任務，所以要大量減少情節。冇lore，玩家就自然會覺得無聊。
5. 唔方便PvE、PvP，咁有咩好玩：其實你設計隻多人玩嘅MMORPG，你應該至少有啲地方係鼓勵合作，好似Mon Hunt咁，又或者好似食雞咁互相追殺，但係，個遊戲呢兩樣嘢都冇機制鼓勵玩家PvE或者PvP。B社設計嘅PvP方式，其實係唔鼓勵玩家互殺，咁有啲人想玩PvP點算？佢只係有好少地方係設計俾人盡情互殺，其餘絕大部份地方都係和平真好，咁成個遊戲啲玩家就好似個server裡面幾十個冇關係嘅遊魂野鬼咁行來行去。
6. 畫面質素差、幀數低到喊：同Fallout 4比較，76嘅畫面質素明顯差啲，有啲位感覺好似fan-made嘅MOD咁核突…. 而且可能因為係online game，佢要處理嘅內容太多嘅時候，每秒嘅格數就會突然大減，啲怪嘅動作一格一格郁、lag到喊出嚟。呢樣嘢當你地對付一大堆怪嘅時候，就好容易因為咁樣而死得好冤枉。
總括嚟講，Fallout 76悶、可玩性低、畫面動作唔流暢、故事弱、MMORPG唔似MMORPG、劇情game唔似劇情game。我玩嘅時候，試過好多次玩到瞓著，呢樣嘢係我打其他game冇可能發生嘅（每局要load好耐嗰啲戰略game除外）。你收人三百幾蚊一隻game，至少應該提供到三百幾蚊嘅AAA game嘅可玩度，而家Fallout 76只係一隻AAA價錢，但可玩度只係fan-made MOD級數嘅次貨，基本上係呃人。
Fallout 76唔止隻game差而俾人怒diu，佢今次仲衰到有隻千幾蚊嘅豪華版，送頭盔同袋，到出貨嘅時候，啲買家發現佢個袋同宣傳嘅布袋唔同，變咗材料cheap好多嘅膠袋，啲最忠心嘅fans俾多一倍價錢買豪華版，你唔止隻game貨不對辦，竟然連個袋都要呃人。全球劣評之下，結果76相比起Fallout 4銷量大跌8成，減咗價都冇起色，真係抵死。