（更新：本專頁隨即收到WWF前員工既內幕消息，睇到我地admin一百萬個嬲嬲上腦，內幕消息在留言內）
繼admin發現環保展製造大量垃圾，本專頁又收到另外知情人士報道，指有環保團體舉行活動時使用大量即棄餐具。這個環保團體，並非什麼新成立、蚊型或只有緊絀資源的環保團體，而是國際上數一數二知名的「世界自然基金會」（即WWF，又稱熊貓會）。
由於事件實在有點難以置信，但報料者又真係有圖有真相，以下為報料者於2017年10月28-29日於活動場地 （元洲仔自然環境保護研究中心, Island House） 的觀察：
1. 場地有食物及啤酒供應，但場地只有紙牒、膠杯及即棄餐具提供 （第二日雖轉用鐵匙，但膠杯及紙碗牒繼續派發）
2. 膠杯上印有「made from plants not plastic」，但就現場所見，所有膠杯及紙牒均放於同一垃圾桶內，未有人進行分類
3. 場內的當眼處只有垃圾桶，及另一個鋁罐回收桶
4. 垃圾桶均被棄置得滿滿的
為免冤枉好人或有其他內情，我們亦因應以上情況向WWF查詢，獲得的答覆重點如下：
WWF已引入多種環保措施，包括：
1. 鼓勵參加者自備水樽，提供免費供水站及收集飲料膠樽回收機
2. 準備了不鏽鋼餐具及玻璃杯供參加者使用，人數眾多時才提供可堆肥材料製成的餐具
3. 不同地點有回收站，職員和義工於活動期間及完結後進行回收
4. 設有網上報名節省紙張
5. 鼓勵參加者使用公共交通工具，有單車停泊點，減少碳排放
6. 禮品店有出售回收再造物料產品
7. 購買「碳補償」
其他原因及改善：
1. 提供即棄餐具因食物供應商未能配合
2. 了解可堆肥材料製成的餐具不是最環保的選擇，長遠本中心的活動會全面採用可重用餐具
專頁係10月31日再向機構電郵跟進提問，對方邀請專頁成員於2017年11月8日(星期三)下午4:30 到Island House作深入討論，無奈admin既成員都係餐搵餐食餐餐清既打工仔，雖然我地都好想同wwf作深入交流，但實在難以係平日突然請日假，希望佢地可以係電郵回覆，而表明我地既難處之後，對方亦都係兩日後回覆左我地。
驟眼睇，WWF亦似乎係場地同活動裡面提供左唔少環保措施，但… 以下仍是我百思不得其解既地方，以及我地對於以上回應既諗法 （簡短易睇版）：
1.「關於人數眾多」：
- 網上資料顯示需要提早報名，而報料者提供的照片亦顯示活動並非人山人海，可以一早估算參加者人數預備足夠可重用餐具
- 當日場地兩天參與人數為500人，最高峰時間為100人
- 搜尋過坊間租借餐具的機構，最多可以租借一日500人既餐具量，如果唔想用即棄餐具，有心有時間一定可以搵到替代即棄餐具方案。
2. 「關於所有膠杯、紙牒、碗及餐具為可堆肥物料」，WWF只有將部份堆肥，其餘作「回收處理」：
- 可堆肥物料或可降解物料一定要堆肥處理，唔係掉去堆填區就會消失降解左，否則同其他垃圾無異
- 懷疑WWF係咪真係有堆肥，因為相片顯示所有野已同其他垃圾撈埋一堆 （既然WWF話有就信住先）
- 被食物殘渣污染左既紙杯紙牒根本唔應該攞去回收
- Bioplastic係植物纖維，唔係plastic，唔應該攞去塑膠回收 （詳情請見相片另文）
- 既然明白用「即棄環保餐具」唔係最環保既方式，點解一直都要用？
3. 「關於網上報名同使用公共交通工具」：
- 好似係最低要求，列出係其中既環保措施似乎有點兒…
我都真係望過網上禮品店有咩野賣，發現原來WWF自己都有可重用既餐具賣，既然WWF係Island House 場主，又成日係個度攪活動，更加應該係自己場地keep返幾廿套熊貓會製造既餐具以備不時之需，仲可以順勢sell埋自己既product等有興趣既人都會買黎用，仲要你都有位放哂一箱箱既「即棄環保餐具」啦，將佢轉黎放可重用餐具應該困難不大掛~
4. 「關於禮品店有出售回收再造禮品」：
- 原來WWF自己都有賣由廢膠再造既可重用餐具。
- 既然WWF係Island House 場主，又成日係個度攪活動，有地方儲存即棄餐具咁即係都可以將佢轉黎放可重用餐具，查實真係無乜唔用自己品牌可重用餐具的理由
5. 「關於碳補償」：
- 「碳補償」理應用黎補償一d唔可以避免既碳排放 （例如運輸），而其他可避免既當然就係可免則免。
- 擔心好多機構只係用「碳補償」黎做擋箭牌，寧願係造成破壞之後購買「碳補償」補飛，都唔係設計活動之前仔細思量點樣做得更環保
- 將買「碳補償」筆錢放係點樣減少廢物產生上面唔係應該更加理想? 「碳補償」唔係贖罪券，俾大家破壞完俾左錢就令到個人舒服返哂。
6. 「關於WWF將使用即棄餐具既原因歸咎於食物供應者配合唔到」
- 講真，係咁多回應之中呢個我真係不能接受
- 如果對方配合唔到，WWF大可以搵過第二個配合到既餐廳
- 即使食物供應商到活動個日所有餐具突然間裂哂爛哂想搵一隻完整既杯牒都無，又或者傾好左而去到活動當日先羅哂d 即棄餐具黎陷你於不義 （機會微乎其微，以我地明查暗訪，呢間食物供應商已經同WWF合作多次）
- 參加者當時特意有問過工作人員提供餐飲係邊間餐廳，我仲打過去問，對方回覆我佢地到會服務係提供到可重用餐具（!?????????????），包括匙同牒等等 （究竟係邊個配合唔到邊個，不得而知）
- 睇到呢個解釋，真係一頭霧水，同時極之極之極之極之極之極之極之極之極之極之極之極之極之極之極之極之極之極之極之極之極之極之極之極之極之極之極之失望！
7. 「關於長遠本中心的活動會全面採用可重用餐具...」
- 即係之前你既活動都有用即棄餐具？你俾人揭發左先發呢個誓？一日唔揭發你都會繼續用！？
-----------------------------------------------------------------------
雖然WWF既工作集中於保育，但絕對唔代表可以忽視廢物問題帶來的影響。而且，WWF向來都關注海洋垃圾，絕對更加清楚廢物對海洋所帶黎既影響。（https://www.wwf.org.hk/）
不知者不罪，但我以上鋪出有關於「即棄環保餐具」既資料係網上隨機都搵到一堆，再加上呢個究竟係咪真係食物供應商「配合唔到」既疑團... 今次WWF「Trick or Treat For Tiger」活動，係「Trick or Treat 左大家」，我留返大家自行思考。
我唔知道用「即棄環保餐具」呢個決定係WWF機構裡面邊個人既決定，但係係環保團體工作既人應該比參加環保展既人多十倍既sense，非牟利團體已經唔係為賺大錢，而係真心為環保出一分力，但係連係活動提供餐具咁簡單既事上面都令到參加者同我地有咁多問號，就正如參加者所講: 「作為多年支持者，見到只識做門面功夫，好失望」，作為一個國際既環保組織，係環保議題的其中一個KOL，連自己係環保上面都唔以身作則，絕對會為機構既形象大打折扣。（亦有報料者提供，之前WWF已因為接受捐款問題而引起爭議： https://goo.gl/eLevAm ）
其實我地好感激WWF 咁認真及仔細地回覆我地既提問，要應酬我地呢咁麻煩既人實在唔係好受，但係過去咁多年，我對WWF都有好高期望，亦都係其中一個忠實fans, 所以請原諒我地咁大反應，我地對環保既堅持同認係絕對需要我地就住呢件事上面咁小題大造，用另一篇千字文去表述我地既諗法，我地唔希望可能因為某一/幾個人既草率決定或呢d （唔知係唔係）單一事件而影響整個機構既公信力。但我地真心希望呢次只係個別事件，亦希望WWF真係可以好似信入面所講日後做得更好，亦不論係WWF定係其他環保團體都好，都繼續記得自己機構既使命同理念，再一次「莫忘初衷」。
* 備註: 以上所寫既暫時只能就住報料者同WWF所提供既資料去作出評價，我地好希望由參加者、義工或者任何有關人士可以俾低你地既comment （或私人PM也可），進行環保公投，用你地雪亮既眼睛去評價究竟WWF係個活動做得好定唔好，好係邊度，唔好係邊度，令到唔單止WWF，其他團體以至到我地每一個都可以好好學習遺留左既環保細節。
** 補充: post 一出，已收到前員工報料 （戴定頭盔，我地係應對方要求所有野直接copy and paste出，我地亦都無能力去核實是否真有其事，以下情報是真是假由大家自行判斷）。
我地搜尋過坊間租借餐具的機構，最多可以租借一日500人既餐具量，如果唔想用即棄餐具，有心有時間一定可以搵到替代即棄餐具方案。
上圖：走杯go cup。今年9月於饒宗頤文化館市集提供借用可重用摺摺杯的情況，機構每次活動最多可租借1000個可重用杯。
下圖左：we-use餐具租用。可租借餐具多達500套，圖為今年2月PolyU Social Innovation Forum租借180套餐具情況
下圖右：we-use餐具租用。租借餐具的情況，可以見到咁多人既場合用租借餐具絕對無問題。
所有膠杯、紙牒、碗及餐具雖然為可堆肥物料，但所謂「可堆肥」，亦都需於指定既環境同溫度等等先可以令物料自然分解，如果好似幅相咁，所有膠杯餐具同其他垃圾包在垃圾袋內再送到堆填區，只會令佢地繼續原封不動長埋係地底深處，（所以本人好憎部份「可降解」的「環保即棄產品」，好似你用左佢，即使係用即棄野都可以用得心安理得D，但提供/售賣者唔俾埋方法處理佢，邊有人無啦啦個屋企有間工廠有個堆肥或有堆泥可以分解佢，所以佢個下場根本就同普通垃圾一樣!!!!!!!!同埋有部份可降解只係係塑膠之間加左可降解物料，佢地降解之後變成好多細細塊塑膠，你想執都執唔到仲更加難回收） 我地再問WWF有無回收所有可堆肥物料作適當處理，對方稍後指現正將部份作堆肥處理，由於堆肥面積有限，活動產生的廢物作回收處理。既然WWF 指出佢地會堆肥處理，咁我地都相信佢有咁做，但另外佢所指既回收處理。。。即係將有食物殘渣既紙牒同碗當廢紙回收？咁咪污染左其他回收物？另外，照道理唔係所有植物塑膠 （即係bioplastic） 都可以當普通膠回收（ http://www.packagingdigest.com/sustainable-packaging/how-sustainable-are... ），因為佢唔係全塑膠,咁樣撈埋一齊會影響左廢膠再造膠粒後出黎既質素，令回收業界都有d 頭痛（ https://www.google.com.hk/amp/s/www.alternet.org/story/151543/compostabl... ），所以WWF 將一堆唔知道應唔應該羅去回收既野羅去回收呢個處理手法。。。我地確實有d 保留。而我地亦都有上呢個可堆肥物料餐具供應商既網站睇過，佢地指出膠杯同餐具係compostable，但似乎就真係唔係俾人當係普通塑膠咁回收，所以WWF所指既「回收處理」... 嗯嗯
其實明明用可重用餐具已經可以解決到既問題，點解仲要用「可堆肥物料」呢？如果計埋製造呢d餐具再加埋後續處理既碳排放水用量等等，對比用可重用餐具，究竟邊一個先至係最值得選擇？（真心求教，究竟前者所耗用既資源對比後者個情況係點，有無研究開既朋友講兩句）